ტოკიოს ოლიმპიადის გზაზე: ქართველმა მოფარიკავეებმა ამერიკას სძლიეს

2020 წლის ტოკიოს ოლიმპიურ თამაშებში მსოფლიოს რეიტინგით მოხმალავე ვაჟთა რვა უძლიერესი გუნდი იბრძოლებს მედლებისთვის, ამიტომ საკლასიფიკაციო ქულებისთვის უშეღავათო ბრძოლაა გაჩაღებული, განსაკუთრებით - მსოფლიოს თასის ეტაპებზე. ასე იყო ვარშავაშიც, სადაც მსგავსი შეჯიბრების პირად-გუნდური პირველობა გაიმართა. სხვადასხვა ქვეყნის 24 ნაკრები და 202 მოფარიკავე ეცილებოდა ერთმანეთს საპრიზო ადგილებს. მათ შორის იყვნენ ქართველი მუშკეტერები - სანდრო და ბექა ბაზაძეები, მიხეილ მარდალეიშვილი და საბა სულამანიძე.

გუნდური შეჯიბრების სტარტზე ქართველმა მოხმალავეებმა ჩილეს ნაკრები დაამარცხეს სოლიდური სხვაობით - 45:23, შემდეგ მის გზას გაუყენეს ოლიმპიური თამაშების ვერცხლისა და ბრინჯაოს მედალოსანი, 2013 წლის მსოფლიოს ჩემპიონატისა და 2015 წლის პირველი ევროპული თამაშების მეორე პრიზიორი რუმინეთის ძლიერი გუნდი - 45:35.

მეოთხედფინალში ჩვენებმა რუსებთან წააგეს 42:45. მეხუთე ადგილისთვის პაექრობაში ქართველი მოხმალავეები ფრანგებს ვერ გაუმკლავდნენ - 38:45, სამაგიეროდ, მომდევნო შეხვედრაში ამერიკელებს აჯობეს - 45:42 და მე-7 ადგილი დაიკავეს, რითაც 28 სარეიტინგო ქულა დაიმსახურეს. ამჟამად ჩვენები 170 ქულით მეთერთმეტე ადგილზე არიან და მე-10 ადგილზე მყოფ უკრაინას 3 ქულით ჩამოჩებიან. ვარშავაში საპრიზო ადგილები ასე განაწილდა: 1. კორეა, 2. ირანი, 3. უნგრეთი.

რაც შეეხება პირად პირველობას, სანდრო ბაზაძემ ჯგუფში ექვსიდან ხუთი ორთაბრძოლა მოიგო, მერე პლეი ოფში უილიამ დიარსა (დიდი ბრიტანეთი, 15:14) და იუნჰო კიმს (კორეა, 15:10) სძლია, მესამე წრეში კი კამილ იბრაგიმოვთან (რუსეთი) დამარცხდა - 5:15 და 31-ე ადგილს დასჯერდა. რიოს თამაშების მონაწილე ქართველი მოხმალავე ამჟამად რეიტინგში 74 ქულით მეოცეა.

1005
მკითხველის კომენტარები / 0 /
მსგავსი ამბები
რუბრიკის სხვა სიახლეები
;