'ტორპედომ' მხოლოდ ქუთაისში უნდა ითამაშოსო... რა სამუშაოები იგეგმება სტადიონზე?

ქუთაისის “ტორპედომ” მიმდინარე ეროვნული ლიგის პირველი ორი საშინაო მატჩი რამაზ შენგელიას სახელობის სტადიონზე გამართა. ახლა არენა კარგა ხნით დაიხურება და მისი განახლება დაიწყება.

ქუთაისის მერიამ 2017 წელს “ტორპედო” აუქციონზე 300 ათას ლარად გაყიდა. სტადიონი კი მის საკუთრებაში დარჩა, შესაბამისად, არენის მოვლა-შენახვის ხარჯებს დღემდე ადგილობრივი ბიუჯეტიდან ფარავს. სამუშაობის განხორციელებაზე ქუთაისის მერიამ ტენდერი გამოაცხადა. “რამაზ შენგელიას” განახლებისთვის 500 ათას ლარზე მეტის დახარჯვა იგეგმება...

რამაზ შენგელიას სახელობის სტადიონს ბოლოს რემონტი 2010 წელს, კლუბის მაშინდელმა მეპატრონე “ვისოლ ჯგუფმა” ჩაუტარა. დამონტაჟდა 14 700 მაყურებელზე გათვლილი ინდივიდუალური სკამი, ახალი ტაბლო და განათების სისტემა, გარემონტდა გასახდელები და პრესლოჟა, ხოლო ადმინისტრაციული შენობა ხელახლა ააშენეს.

უეფას IV კატეგორიის სტანდარტებს რომ შეესაბამებოდეს, ინფრასტრუქტურა მნიშვნელოვან განახლებას საჭიროებს. რეაბილიტაციის პროექტზე მუშაობა უკვე დაწყებულია და ეს სტადიონის დირექტორმა, თამაზ კიკვაძემ თქვა.

ცნობილი გახდა, რომ იგეგმება მოედნის საფარის შეცვლა და ინფრასტრუქტურული სამუშაოები. ტრიბუნებზე დამონტაჟდება სათვალთვალო კამერები, ცენტრალურ შემოსასვლელთან კი მოეწყობა ადგილი 150 ავტომანქანის პარკინგისთვის. გადაიხურება მსაჯთა და ფეხბურთელთა მოედანზე გასასვლელი.
ამას გარდა, იგეგმება ტრიბუნებზე ასასვლელი კიბეების რეკონსტრუქცია, VIP და პრესლოჟის, 30 ჟურნალისტსა და 20 ფოტოგრაფზე გათვლილი სივრცის, ასევე საკომენტატორო და საპრესკონფერენციო ოთახების განახლება, სტუმრებისთვის ახალი VIP-სივრცისა და “ტორპედოს” ისტორიის საგამოფენო ადგილის მოწყობა.
მოწესრიგდება სველი წერტილები, გასახდელები, საშხაპეები, მსაჯთა ოთახები და სამედიცინო კაბინეტები. ცალკე სამედიცინო ოთახი მოეწყობა სტუმარი გუნდისთვის. სარბენ ბილიკზე კაუჩუკის ზედაპირი ხელოვნური საფარით შეიცვლება.

მოედნის საფარის გამოცვლისთვის საჭირო ხარჯს სრულად ფეხბურთის ფედერაცია დაფარავს. ბალახთან ერთად უნდა შეიცვალოს სადრენაჟე და სარწყავი სისტემები. წესითა და რიგით, ეს სამუშაოები 4 თვეში უნდა დასრულდეს.

სტადიონის დირექტორი იმედოვნებს, რომ სამუშაოები ივნისში დასრულდება და “ტორპედო” ევროტურნირის მატჩებს საშინაო არენაზე ჩაატარებს...

მაგრამ მანამდე?..

სად გამართავს “ტორპედო” საშინაო მატჩებს, ეს უახლოეს დღეებში გაირკვევა. ქუთაისელთა მთავარმა მწვრთნელმა კახა ჩხეტიანმა ამ თემაზე სპორტულ გადაცემაში (“სპორტი იმედზე”) ილაპარაკა და ორი ვარიანტი დაასახელა - წყალტუბოს განახლებული არენა ან სამტრედიის “ეროსი მანჯგალაძე”.

ამაზე ქუთაისელ გულშემატკივრებს ცალსახად უარყოფითი რეაქცია ჰქონდათ. სოციალურ ქსელებს თუ გაეცნობით, ნახავთ, რომ ისინი კატეგორიულად ითხოვენ - “ტორპედო” ქუთაისში დარჩეს და ახალაშენებულ “აია არენაზე” ითამაშოს. “ლელოს” კლუბში უთხრეს, რომ ეს ვარიანტიც განიხილება.

ამას გარდა, გულშემატკივრებმა მნიშვნელოვანი საკითხი დასვეს და ჩვენს არქივშიც მოვძებნეთ ერთი საინტერესო რამ: 2018 წლის 31 იანვარს “ლელოში” გამოქვეყნდა წერილი - “როდის დააგებენ მოედნებს?” ამ წერილიდან გაგახსენებთ, რომ ქუთაისში ახალი სტადიონი ფეხბურთისთვისაც შენდებოდა და რაგბისთვისაც.

“2017 წელს სპორტისა და ახალგაზრდობის სამინისტროს პროექტის განხორციელება დაიწყო, რომელსაც მხარი სახელმწიფომ დაუჭირა და რომლის თანახმადაც, თბილისსა და ქუთაისში საერთაშორისო სტანდარტების 10 მოედანი უნდა აშენდეს. ქუთაისში, ნიკეას ქუჩაზე, “აია არენასთან” ახალი პროექტი უკვე ხორციელდება და სამი მოედანი კეთდება - 2 ბუნებრივი მოედნით, ხოლო 1 - ხელოვნური საფარით.

ერთი ბუნებრივსაფარიანი ფეხბურთელებს გადაეცემათ, სადაც მოეწყობა გასახდელები, განათების სისტემა და 300-მდე მაყურებელზე გათვლილი ტრიბუნები. დანარჩენი ორი მოედანი კი რაგბის მოემსახურება. კულტურისა და სპორტის სამინისტროს ცნობით, ქუთაისში მოედნების მშენებელობა უახლოეს მომავალში დასრულდება”, - წერდა “ლელო”.

“ქუთაისში მოედნები მოემსახურება ფეხბურთისა და რაგბის ეროვნულ და ასაკობრივ ნაკრებებებს, ასევე სხვადასხვა გუნდებს”, - ამბობდა მინისტრის მოადგილე შალვა გოგოლაძე.

მშენებლობაზე ფეხბურთის ფედერაციის პრეზიდენტი ლევან კობიაშვილიც ლაპარაკობდა: “ჯერჯერობით, ქუთაისში სამუშაოები იდეალურად მიმდინარეობს და ახალი მოედნების მშენებლობა მალე დასრულდება. ამ პროექტს დიდი მნიშვნელობა აქვს და დიდი მადლობა მინდა გადავუხადო როგორც ჩვენს მთავრობას, ასევე სპორტის ყოფილ მინისტრ ტარიელ ხეჩიკაშვილს, რომლის წვლილიც ამ პროექტის განხორციელებაში ძალიან დიდია. ახალი ინფრასტრუქტურა ქართულ ფეხბურთს ძალიან სჭირდება და დარწმუნებული ვარ, ამ მოედნებზე არაერთი ნიჭიერი და წარმატებული ქართველი ფეხბურთელი გაიზრდება”.

ყოველდღიური სპორტული გაზეთი "ლელო"
1485
მკითხველის კომენტარები / 0 /
მსგავსი ამბები
რუბრიკის სხვა სიახლეები
;