ტორპედოს მეპატრონე ქუთაისში არ არის, თუმცა არც იტალიაშია!.. საღორიას ბაზას საკარანტინოდ დათმობენ!..

კორონავირუსის გავრცელების საფრთხის გამო, ქუთაისის "ტორპედომ" და ფოთის "კოლხეთმა" საწვრთნელი პროცესი შეაჩერეს. ამის შესახებ ორივე კლუბმა ოფიციალური განცხადება გამოაქვეყნა.

"ქვეყანაში შექმნილი სიტუაციიდან გამომდინარე, ვგრძნობთ საზოგადოებრივ პასუხისმგებლობას და ვითვალისწინებთ რეკომენდაციებს. რისკების თავიდან არიდების მიზნით როგორც მთავარი, ისე ასაკობრივი გუნდები გარკვეული დროით წყვეტენ ვარჯიშს. ამასთანავე, მზად ვართ კლუბის საწვრთნელი ბაზა საკარანტინო ზონად მოვაწყოთ", - წერია ქუთაისელთა წერილში.

ცხადია, დავინტერესდით, ქუთაისური კლუბის იტალიელი მეპატრონე ფაბიო მანინის მდგომარეობით. მის სამშობლოში, სხვა ევროპული ქვეყნებისგან განსხვავებით, გაცილებით მძიმე მდგომარეობაა.

გავარკვიეთ, რომ მანინი ქუთაისში არ არის, თუმცა არც იტალიაშია. მას ბიზნესი თავის ქვეყანაში კი აქვს, მაგრამ ძირითად დროს სწორედ არაბთა გაერთიანებულ საემიროებში ატარებს. ასე რომ, მათ ვისაც მისი ბოლო ვიზიტის დროს მასთან ჰქონდა კავშირი, ნუ შეგეშინდებათ, ეს კაცი ჯანმრთელად არის და, როგორც გვითხრეს, "ტორპედოს" მომავალზე ფიქრობს.

ფოთის "კოლხეთმა" კი ფეხბურთელები განუსაზღვრელი დროით დაითხოვა. კლუბის განცხადებაში წერია: "მსოფლიოსა და ქვეყანაში კორონავირუსთან დაკავშირებით განვითარებული მოვლენებიდან გამომდინარე, სფფ- ხელმძღვანელობამ მიიღო გადაწყვეტილება მისი ეგიდით გასამართი ყველა ჩემპიონატი შეაჩეროს. ფოთის "კოლხეთმა" ფეხბურთელები განუსაზღვრელი დროით დაითხოვა და სავარჯიშო პროცესს მხოლოდ მაშინ განაახლებს, როცა ქართული ფეხბურთის უმაღლესი ორგანოსგან შესაბამის განკარგულებას მიიღებს".

შეგახსენებთ, რომ მსოფლიოსა და ქვეყანაში კორონავირუსთან დაკავშირებით განვითარებული მოვლენებიდან გამომდინარე, საქართველოს ფეხბურთის ფედერაციამ მიიღო გადაწყვეტილება, სფფ-ის ეგიდით გასამართი ყველა ჩემპიონატის, მათ შორის, ეროვნული ლიგის, ეროვნული ლიგა 2-ის, ლიგა 3-ის, ასევე ასაკობრივი ჩემპიონატების 1 აპრილამდე შეჩერების თაობაზე. ფეხბურთის ფედერაციის განცხადებით, ორგანიზაცია უმთავრესად ჩვენი ფეხბურთელებისა და გულშემატკივრის ჯანმრთელობასა და უსაფრთხოებაზე ზრუნავს.

ჩვენის მხრივ კი ვიტყვით, რომ ეს ის შემთხვევაა, ზოგი ჭირი რომ მარგებელია და, შესაძლოა, ქუთაისის "ტორპედოს" ეს პაუზა წაადგეს. გუნდმა დაკომპლექტება გვიან დაიწყო, სასურველი მოთამაშეები დროულად ვერ დაიმატა და არის იმედი, რომ "კორონაფანჯარაში" სასელექციო აქტივობა გააგრძელოს. მთავარია, ვითარება მთელ მსოფლიოში დაწყნარდეს.

2323
მკითხველის კომენტარები / 0 /
მსგავსი ამბები
რუბრიკის სხვა სიახლეები
;