ტორპედოს მწვრთნელ კახა ჩხეტიანის სკანდალური განცხადება!..

ქუთაისის "ტორპედომ" წყალტუბოში "საბურთალოსთან" 2:3 წააგო. საქართველოს სუპერთასის მოქმედი მფლობელი ცუდ დღეში რომაა, ყველამ იცის. "ტორპედოში" ფინანსური კრიზისია.

ადრე დავწერეთ, რომ ქუთაისური გუნდი, რომელიც შემადგენლობით, შეიძლება, უძლიერესია საქართველოში, დაშლის პირასაა.

ჩვენი სიტყვები "საბურთალოსთან" მატჩის შემდეგ "ტორპედოს" მთავარმა მწვრთნელმა კახა ჩხეტიანმა გაამყარა. ამ სიტყვებს წაიკითხავდით ჩვენი კორესპონდენტის, დავით კოხრეიძის რეპორტაჟში.

თუმცა აქ ხაზგასმა აუცილებელია, რადგან გამგებმა კარგად უნდა გაიგოს - დიახ, საქმე ეხება ქართული ფეხბურთის ერთ-ერთ ძლიერ, ისტორიულ ბრენდს, რომელსაც მალე ევროპალიგის საკვალიფიკაციო ეტაპზე მოუწევს თამაში და ქვეყნის პრესტიჟის დაცვა.

ჩხეტიანი ამბობს: "მიჭირს ამის თქმა, მაგრამ... შესაძლოა, მომდევნო მატჩამდე დავიშალოთ. რაც შეეხება ამ თამაშს, ჩვენი გუნდის ხასიათი ვერ იყო ისეთი, როგორიც ასეთი დაპირისპირების მოგებას სჭირდება".

დაგვრჩა მხოლოდ იმედი, რომ "ტორპედო" გადარჩება, თუმცა... ეს იმედი დიდი არ არის.

6876
მკითხველის კომენტარები / 0 /
მსგავსი ამბები
რუბრიკის სხვა სიახლეები
;