ტორპედოს უკრაინელი ფორვარდი, რომელმაც სამშობლოში დაბრუნებაზე უარი თქვა და ქუთაისში დარჩენა ამჯობინა

ვიტალი პონომარქუთაისის "ტორპედოში" მარტში ჩაირიცხა, გუნდთან ერთად რამდენჯერმე ივარჯიშა და ერთი თამაშიც ჩაატარა. მაგრამ კორონავირუსის გავრცელების საფრთხის გამო, იძულებული გახდა, საფეხბურთო აქტივობა მალევე შეეჩერებინა, ისევე, როგორც მთელი გუნდს.

საქართველოს ეროვნულ ლიგაში აპრილამდე პაუზაა. უკრაინულმა გამოცემა "ნაშიდცუპმა" პონომარზე მასალა მოამზადა და ამჟამინდელ მდგომარეობაზე ელაპარაკა.

"ახლა ვიტალი, ისევე, როგორც ყველა მისი თანაგუნდელი, სპეციალური გეგმის მიხედვით ინდივიდუალურად ვარჯიშობს. მიუხედავად იმისა, რომ პონომარ საქართველოში უკრაინის საელჩოდან დაურეკეს და სამშობლოში დაბრუნებაში დახმარება შესთავაზეს, მან ქუთაისში დარჩენა გადაწყვიტა. ახლა მისი მეუღლე ოლია და ვაჟი ანდრიუშა ალექსანდრიაში ცხოვრობენ. ისინი კარანტინის დასრულებას ელიან, რათა ვიტალის საქართველოში ეწვიონ. თუ ყველაფერი კარგად იქნება, ჩემები ორ კვირაში ჩამოვლენო, ამბობს ის", - ვკითხულობთ უკრაინულ გამოცემაში.

პონომარის თქმით, უცხოეთიდან სხვა წინადადებებიც ჰქონდა: "გულწრფელად გითხრათ, უკრაინული გუნდების მხრიდან რაიმე კონკრეტული ვარიანტი არ მქონდა. უცხოეთში თამაში გადავწყვიტე, რადგან მე მინდოდა კარიერაში რაღაც ახალი გამომეცადა. ეს ჩემი პირველი უცხოური გამოცდილებაა და იმედი მაქვს, რომ დადებითი იქნება. დიახ, უცხოეთიდან სხვა ვარიანტებიც იყო, თან ეს იყო არა მხოლოდ საუბრები, არამედ კონკრეტული წინადადებებიც. მაგრამ ყველაზე ნაყოფიერად მოლაპარაკებამ ქართულ კლუბთან ჩაიარა. "ტორპედოს" ვარიანტი ძალიან სწრაფად გამოჩნდა, ისევე, როგორც ჩემი გადასვლა გადაწყდა სწრაფად - სულ რამდენიმე დღე დასჭირდა ამ საქმეს".

პონომარმა საქართველოში ცხოვრებასა და თანაგუნდელებთან ურთიერთობაზე ილაპარაკა: "კარგად, ნორმალურად მოვეწყვე, ბინითაც დამეხმარნენ. ინგლისური კარგად არც ვიცი, მაგრამ ცოტათი უკვე მესმის და ჩემს თანაგუნდელებს ამ ენაზე ველაპარაკები, ვარჯიშები და თეორია ქართულ ენაზე ტარდება, მაგრამ თუ რამე გაურკვეველია, მთავარი მწვრთნელი მას რუსულად განგვიმარტავს".

უკრაინელი თავდამსხმელი საქართველოში ჩამოსვლის დეტალებსა და კარანტინზეც ყვება: "საქართველოში თურქეთიდან ჩამოვფრინდი. თელ-ავივში იყო გადაჯდომა. საქართველოში ჩემთან ბევრი პოლიციელი მოვიდა, რომლებიც აეროპორტში დამხვდნენ, დაიწყეს კორონავირუსზე შემოწმება, გამიზომეს ტემპერატურა, შეამოწმეს ჩემი პასპორტი და მკითხეს, ა მიზნით ჩამოვედი ქვეყანაში. ამის შემდეგ აეროპორტი დავტოვე. ახლა ქალაქში უამრავი ნიღბიანი დადის, სუპერმარკეტებში ყველა მოლარე ნიღბებსა და ხელთათმანებშია. ბევრი რამაა დაკეტილი - კაფეები, სპორტული დარბაზები... საქართველოს ჯერ კარგად არც ვიცნობ და, შესაძლოა, სხვა რაღაცებიც დაიხურა. კლუბის ბაზაც დაიხურა და სურთ, ამ შენობაში ვირუსით დაავადებული ადამიანები მიიღონ".

პონომარი დასძენს, რომ საქართველოს დატოვება არ ისურვა: "დამირეკეს, რომ საქართველოდან წავსულიყავი, მაგრამ არ შემიძლია, რადგან ხელშეკრულება მაქვს. ჩვენ ჩაკეტილები ვართ - ძირითადად ბინაში ვზივარ. გარეთ მხოლოდ დღეს გავედი, ინდივიდუალურ პროგრამით რომ მევარჯიშა. ვცდილობ, არსად წავიდე. ერთკვირიანი სავარჯიშო პროგრამა მოგვცეს, მაგრამ არა - ბაზაზე".

უკრაინელი ფეხბურთელი ქუთაისით მოხიბლულია: "ძალიან ლამაზი ქალაქი და მთებია. ბევრგან მიმიწვიეს, მაგრამ ჯერ წასვლა ვერ მოვახერხე. რაც შეეხება თამაშს, კახა კალაძის ყოფილ გუნდს, "სამტრედიას" შევხდით და პენალტით წავაგეთ. სამზარეულო? ყველაფერი ცხიმიანი და ცხარეა, სადაც ხორცია. ეს მძიმე საკვებია. მაგრამ ახლა კაფეები დახურეს და ვცდილობ, ასეთი საკვები ნაკლებად მივიღო, ამიტომ საჭმელს სახლში ვამზადებ".

782
მკითხველის კომენტარები / 0 /
მსგავსი ამბები
რუბრიკის სხვა სიახლეები
;