ტოტენჰემის ქამბექი ტურინულ თრილერში [VIDEO]

ჩემპიონთა ლიგის პლეი-ოფის პირველი ეტაპის პირველ მატჩში "იუვენტუსმა" "ტოტენჰემს" უმასპინძლა და 2:2 დაუზავდა.

მატჩის დინამიკა პირველივე წუთებზე გამოიკვეთა.

ანგარიში მე-2 წუთზე გონსალო იგუაინმა გახსნა, რამდენიმე წუთის შემდეგ კი ლონდონელთა კარში თერთმეტმეტრიანი დარტყმა დაინიშნა, რომელიც "პიპიტამ" ზუსტად შეასრულა და დუბლი გაიფორმა.

აღსანიშნავია, რომ "დეზების" მეკარემ, უგო ლორისმა ორივე ეპიზოდში შეახო ბურთს ხელი, თუმცა გუნდის გადარჩენა ვერ შეძლო.

ეს ყველაფერი პირველ 10 წუთში მოხდა. კატასტროფული სტარტის გამო, სტუმრებს გონზე მოსასვლელად 10 წუთი დასჭირდათ, რის შემდეგაც მატჩის სადავეები იგდეს ხელთ და მთელი ტაიმის განმავლობაში უპირატესობას ფლობდნენ.

25-ე წუთზე კრისტიან ერიკსენის ბრწყინვალე გადაცემის შემდეგ ჰარი კეინმა "ბიანკონერის" კარში თავური დარტყმით გადაგზავნა ბურთი, თუმცა ჯანლუიჯი ბუფონმა საოცარი რეაქცია გამოავლინა და ჰარის გოლის გატანა არ დაანება.

10 წუთის შემდეგ, "იუვენტუსის" მცველების შეცდომის შედეგად ბუფონთან პირისპირ დარჩენილმა კეინმა იტალიელს დუელი მოუგო, მარტივად მოატყუა და ცარიელ კარში ბურთის გადაგზავნა არ გასჭირვებია.

ამ გოლით კეინმა "ლივერპულის" ლეგენდარული ფეხბურთელის, სტივენ ჯერარდის რეკორდი გაიმეორა და მეორე ინგლისელი გახდა, რომელმაც ჩემპიონთა ლიგის 1 სეზონში მეტოქის კარი 7-ჯერ აიღო.

გოლის გატანის შემდეგ, ინგლისელებმა შეტევებს მოუხშირეს, თუმცა კეინის გოლის შემდეგ ყველაზე სახიფათო ეპიზოდების შექმნა მაინც იტალიელებმა შეძლეს, თუმცა იგუაინს ერთი მომენტი რომ არ გაეფუჭებინა, ისე როგორ ჩაივლიდა დღე...

პირველი ტაიმის უკანასკნელ წუთზე დუგლას კოსტამ შესანიშნავი დრიბლინგი შეასრულა და შეხვედრის არბიტრს მორიგი თერთმეტმეტრიანი გამოსტყუა, რომელიც იგუაინმა გააცუდა.

მეორე ნახევარი ნაკლებად დინამიური გამოდგა, თუმცა გულშემატკივარს მოწყენის საშუალება მაინც არ ჰქონია.

აღსანიშნავია, უგო ლორისის შესანიშნავი სეივები, ფედერიკო ბერნარდესკის დარტყმების შემდეგ.

71-ე წუთზე "იუვენტუსის" კარის მიმართულებით სახიფათო ჯარიმა დაინიშნა, რომელიც, სტანდარტების სპეციალისტმა, კრისტიან ერიკსენმა გოლად აქცია. ბუფონმა მოძრაობა ბურთის საპირისპირო მიმართულებით დაიწყო და ახლო კუთხეში გაუშვა, მაგრამ, მთავარი, იტალიელთა ცოცხალი კედლის გაურკვეველი სისტემა იყო, რომელიც საკვანძო ეპიზოდში დაიშალა და ამან გამოიწვია შეხვედრის მეოთხე გოლი.

საბოლოო ჯამში, შეხვედრა ლოგიკურად დასრულდა. არც ერთი გუნდი იმსახურებდა გამარჯვებას და არც მეორე, შედეგი კი, რა თქმა უნდა, ლონდონელებისთვის უფრო მისაღებია.

განმეორებითი შეხვედრა ლონდონში 7 მარტს გაიმართება.

შეხვედრის პარალელურად "მანჩესტერ სიტიმ" "ბაზელი" 0:4 გაანადგურა.

 

 

572
მკითხველის კომენტარები / 0 /
მსგავსი ამბები
რუბრიკის სხვა სიახლეები