ტოჩინოშინი დაბრუნდა. რა გეგმები აქვს ქართველ ოძეკის იაპონიასა და საქართველოში?

11 აგვისტოდან ქართველი ოძეკი ტოჩინოშინი (ლევან გორგაძე) ზაფხულის ტურნეს (ჯუნგიო) შეუერთდა, მან ვარჯიშები განაახლა. ზაფხულის ჯუნგიო 28 ივლისს დაიწყო, მაგრამ ქართველი სუმოისტი ტრავმების (მუხლის და მხრის) გამო რეაბილიტაციის პერიოდს გადიოდა.

ტოჩინოშინი სუმოს ქარავანს ქალაქ სენდაიში შეუერთდა. როგორც იაპონური მედია წერს, ტოჩინოშინი ბრწყინვალედ დაბრუნდა, მან, სულ მცირე, 6 რიკიშისთან გამართა ბრძოლები და ერთხელ მიტაკეუმი ცურიდაშის ილეთით დაამარცხა. "კარგია, სწორედ ასეთი ვარჯიშებისთვის ვარ აქ", - განაცხადა ტოჩინოშინმა. ტოჩინოშინი პირველი ოძეკია, ვინც ჯუნგიოს შეუერთდა.

ქართველი ოძეკი ამბობს, რომ ჯერ ბოლომდე არ მომჯობინებულა: "თუ არ ივარჯიშე ცოტ-ცოტა მაინც, ფორმაში ვერ შეხვალ და ბაშოზე გასვლა სარისკო იქნება", - განაცხადა ტოჩინოშინმა, რომელიც აგვისტოს დასაწყისში ტოჩიგის პრეფექტურაში ცხელ აბაზანებს იღებდა და ასე იშუშებდა ტრავმებს.

ჯუნგიო კი 25 აგვისტომდე გაგრძელდება და ტოკიოს პრეფექტურის ქალაქ კიტეში დასრულდება. 26 აგვისტოს მორიგი ბანძუკე გამოქვეყნდება, რომელშიც ქართველ ოძეკის კადობანში ჩააყენებენ - სექტემბრის ბაშოზე მან აუცილებლად უნდა შეძლოს დადებითი ბალანსის დაფიქსირება (მინიმუმ 8 გამარჯვება), წინააღმდეგ შემთხვევაში, ოქტომბერში ოძეკის რანგიდან ჩამოაქვეითებენ. აკი ბაშო ტოკიოში 8-22 სექტემბერს გაიმართება.

ტოჩინოშინის სასახლე

როგორც ტოჩინოშინმა იაპონურ მედიას განუცხადა, ის საქართველოში სახლს აშენებს, არც ისე შორს მშობლების სახლიდან მცხეთის რაიონში, რომელიც გაზაფხულზე დასრულდება. ტოჩინოშინის რეზიდენციაში, რომელსაც იაპონელებმა "ტოჩინოშინის" უწოდეს, სავარჯიშო დარბაზი, კალათბურთის მოედანი, რესტორანი, ბარი, აუზი, საუნა.

ეს ყველაფერი იქნება, როგორც ოძეკის პერსონალურ მოხმარებაში, ასევე ის გამოფენს თავის ტიტულებს სუმოში, მავაშის, რომელთა ნახვაც სუმოს ფანებს შეეძლებათ. შესასვლელზე კი მისი შიკონა (საბრძოლო სახელი) იქნება ამოტვიფრული. განათების ინსტალაცია კი ისეთ გარემოს შექმნის, როგორიც დოჰიოზეა.

"ჯერ ამ შენობის ვალი ბოლომდე არ გადამიხდია, აზარტში შევედი", - ამბობს ტოჩინოშინი.

679
მკითხველის კომენტარები / 0 /
მსგავსი ამბები
რუბრიკის სხვა სიახლეები
;