ტრანსფერები-ONLINE: ბარსელონამ ნეიმარი საბოლოოდ  გადაწყვიტა, მონაკომ  იკარდისთვის ნაპოლის აჯობა?

13:30 „პარი სენ-ჟერმენმა“ ახალი პირობა წაუყენა „რეალს“. ნეიმარის სანაცვლოდ პარიზელებს სურთ ვინისიუსი და რაფელ ვარანი. ამ შემთხვევაში, თანხის დამატება საჭირო არ იქნება. (Telefoot)

13:41 ოფიციალურად! „ბარსელონას“ შემტევი ფილიპე კოუტინიო „ბაიერნის“ ფეხბურთელი გახდა. გერმანიის ჩემპიონმა ბრაზილიელი ერთი წლით იჯარით აიყვანა და გამოსყიდვის უფლებაც მიიღო. ამისთვის „ბაიერნმა“ 20 მილიონი ევრო გადაიხადა, გამოსასყიდი თანხა კი 120 მილიონი ევრო იქნება. კოუტინიო ახალ კლუბში მე-10 ნომრით ითამაშებს, რომელიც „ბაიერნში“ არიენ რობენს ეკუთვნოდა.

14:36 „ატლეტიკომ“ გამოიწვია სარჩელი, რომელიც ივლისის დასაწყისში შეიტანა ლა ლიგაში. ის უკავშირდებოდა ანტუან გრიზმანის ტრანსფერს „ბარსელონაში“. როგორც გაირკვა, კატალონურმა გრანდმა წესების დაცვით გადაიბირა ფრანგი ფეხბურთელი. (Sport)

14:52 ლეროი სანე „ბაიერნში“ არ გადავა. „ჩვენი შემადგენლობა დაკომპლექტებულია და აღარ ვაპირებთ რაიმეს შეცვლას“, - განაცხადა მიუნხენური კლუბის პრეზიდენტმა ული ჰიონესმა და დახურა სატრანსფერო კამპანია.

15:51 „პარი სენ-ჟერმენში“ ნეიმარის შემცვლელი შეიძლება გახდეს პაულო დიბალა. პარიზელები აპირებენ 80 მილიონი ევრო შესთავაზონ „იუვენტუსს“. გარიგება შეიძლება ოთხშაბათს გაფორმდეს.

16:08 „რეალმა“ უარყო შესაძლო გაცვლა ნეიმარსა და ვინისიუს-ვარანის დუეტს შორის. (Mundo Deportivo)

16:27 „მონაკომ“ და „ნაპოლიმ“ წინადადებით მიმართეს „ინტერს“ მაურო იკარდის თაობაზე. პრეტენდენტები არიან, აგრეთვე, „რომა“ და „იუვენტუსი“. (Sky Sport Italia)

16:34 ოთხი იტალიური კლუბი - „ინტერი“, „ნაპოლი“, „ლაციო“ და „ფიორენტინა“ იბრძვიან ფერნანდო ლორენტესთვის, რომელიც თავისუფალი აგენტია. უფრო ახლოს მიზანთან არის „ლაციო“, რომელმაც უფრო ადრე დაიწყო მოლაპარაკებები ესპანელთან. (Corriere dello Sport)

16:43 ოფიციალურად! „სერკლ ბრიუგემ“ „ბოლონიადან“ იჯარით აიყვანა ნახევარმცველი გოდფრიდ დონსი.

16:53 წარმატებით მიმდინარეობს მოლაპარაკებები ალექსის სანჩესთან დაკავშირებით, რომელიც ოთხშაბათს, დიდი ალბათობით „ინტერის“ ფეხბურთელი გახდება. ლაპარაკია უფასო იჯარაზე, თანაც ხელფასის სამ მეოთხედს ჩილელს „მანჩესტერ იუნაიტედი“ გადაუხდის. (Gazzetta dello Sport)

17:19 „რეალმა“ „პარი სენ-ჟერმენს“ ახალი წინადადებით მიმართა - ნეიმარის სანაცვლოდ სთავაზობს ხამეს როდრიგესსა და 165 მილიონ ევროს. (AS)

17:24 ალექსის სანჩესის გარდა, „ინტერი“ კიდევ ერთ ჩილელზე - არტურო ვიდალზე აწარმოებს მოლაპარაკებებს. ეს ფეხბურთელი „ბარსელონას“ აღარ სჭირდება. (Gazzetta dello Sport)

18:09 „მანჩესტერ იუნაიტედი“ მოლაპარაკებებს აწარმოებს ერიკ ბაისთან კონტრაქტის გაგრძელებაზე. მოქმედი ხელშეკრულება 2020 წლის ზაფხულში იწურება. (The Sun)

18:36 რამდენიმე ინგლისური წყარო წერს, რომ მარკოს როხო დატოვებს „მანჩესტერ იუნაიტედს“. არსებობს, აგრეთვე, კონტრაქტის გაწყვეტის ვარიანტი, ოღონდ ეს „იუნაიტედს“ 15 მილიონი ევრო დაუჯდება. როხო უკმაყოფილოა კლუბის ხელმძღვანელობით, რომელმაც ჩაშალა არგენტინელის ტრანსფერი „ევერტონში“.

18:53 „იუვენტუსში“ უკვე აღარ აკეთებენ აქცენტს ემრე ჯანზე. ნახევარმცველისთვის ბრძოლაში ჩაებნენ „ბაიერნი“ და „პარი სენ-ჟერმენი“. თუმცა, „ბაიერნმა“ უკვე გამოაცხადა, რომ დაასრულა სატრანსფერო კამპანია.

19:02 ორშაბათს, „ბარსელონაში“ გაიმართა დირექტორთა საბჭოს სხდომა, სადაც გადაწყდა ნეიმარის შეძენა. უახლოეს დროში, „პარი სენ-ჟერმენი“ ოფიციალურ წინადადებას მიიღებს. (RAC 1)

19:11 „მონაკო“ და „პარი სენ-ჟერმენი“ დაინტერესებულები არიან ტეემუ ბაკაიოკოთი. ჯერჯერობით, დეტალები უცნობია. (Daily Express)

19:21 გაირკვა, რომ „ნაპოლი“ და „მონაკო“ ერთნაირ თანხას სთავაზობენ „ინტერს“ იკარდის სანაცვლოდ - 65 მილიონი ევრო. მაგრამ მონაკოელებმა ძალიან აჯობეს ნეაპოლელებს ხელფასის ოდენობით - 12 მილიონი 7.5 მილიონის წინააღმდეგ.

20:10 ლორენცო ტონელი, შესაძლოა, „ნაპოლიდან“ „ფიორენტინაში“ გადავიდეს. ნეაპოლელები, რომლებმაც მცველში 2017 წელს 10 მილიონი ევრო გადაიხადეს, აღარ აკეთებენ აქცენტს ამ ფეხბურთელზე. (Sky Italia)

20:42 „რომა“ აგრძელებს ცენტრალური მცველის ძიებას. დეიან ლოვრენთან ჩაშლილი გარიგების შემდეგ, „მგლები“ რუგანიზე გადაერთნენ. დედაქალაქური კლუბი ერთწლიანი იჯარისთვის ხუთ მილიონს გადაუხდის „იუვენტუსს“.

20:51 „მანჩესტერ იუნაიტედი“ ამ ზაფხულს აღარ დათმობს პოლ პოგბას. „ის დარჩება. ამაში არანაირი ეჭვი არ მეპარება. არაფერი გასაკვირი არ არის იმაში, რომ ის სიამოვნებას იღებს ჩვენს გუნდში თამაშზე“, - განაცხადა ოლე-გუნარ სულშერმა.

21:26 შკოდრან მუსტაფი უახლოეს პერიოდში იჯარით „რომაში“ გაემგზავრება. რომაელები მზად არიან მომავალი წლის ზაფხულში გამოისყიდონ გერმანელი 27 მილიონ ევროდ. „არსენალში“ არავინ არ არის მუსტაფის წასვლის წინააღმდეგი. (La Gazzetta dello Sport)

21:35 „ვესტ ჰემი“ ახალ მრავალწლიან კონტრაქტს ამზადებს მანუელ ლანცინისთვის. (Sky Sports)

21:40 „არსენალი“ მუშაობს პიერ-ემერიკ ობამეიანგის ახალ კონტრაქტზე. მიმდინარე ხელშეკრულება 2021 წლის ზაფხულში იწურება. (The Times)

21:56 ნიკოლა კალინიჩმა, შესაძლოა, დატოვოს „ატლეტიკო“ - მასზე პრეტენზიას „ესპანიოლი“ აცხადებს. ხორვატი აღარ სჭირდება დიეგო სიმეონეს. (Marca)

ყოველდღიური სპორტული გაზეთი "ლელო"
1465
მკითხველის კომენტარები / 0 /
მსგავსი ამბები
რუბრიკის სხვა სიახლეები
;