ტრანსფერები-ONLINE: დიბალა თითქმის  მანჩესტერშია,  კუტრონე გამგელდა, რაკიტიჩი ინტერში? 

13:05 ოფიციალურად! “პარი სენ-ჟერმენმა” “ევერტონიდან” შეიძინა იდრის გეიე. 29 წლის ნახევარმცველი პარიზელებს 36.5 მილიონი ევრო დაუჯდათ. სენეგალელთან 2023 წლის ზაფხულამდეა კონტრაქტი.

13:18 ნიკოლა პეპე უკვე ჩავიდა ლონდონში, რათა “არსენალისთვის” გაიაროს სამედიცინო შემოწმება. ტრანსფერის თანხა 80 მილიონი ევროა, კონტრაქტის ხანგრძლივობა - ხუთი წელი. (L’Equipe)

13:29 პეპეს გარდა, “ლილი” დაკარგავს რაფაელ ლეაოს. ამ ფორვარდში “მილანი” 35 მილიონ ევროს გადაიხდის.

13:56 “მანჩესტერ იუნაიტედმა” ისევ მიმართა “ლესტერს” ჰარი მაგუაირის გადაბირების თაობაზე. მაგრამ “ლესტერი” უარს ამბობს 80 მილიონზე და ცენტრალური მცველის გაყიდვაზე.

14:34 “არსენალის” ცენტრალური მცველი შკოდრან მუსტაფი შეიძლება “მონაკოს” ფეხბურთელი გახდეს. დასახელდა ტრანსფერის სავარაუდო თანხა - 30 მილიონი ევრო. (L’Equipe)

14:52 ესპანური პრესა წერს, რომ “რეალმა” მოილაპარაკა პოლ პოგბას ტრანსფერზე. “მანჩესტერ იუნაიტედი” დათანხმდა 165 მილიონი ევროს მიღებას, ფრანგი კი წელიწადში 12 მილიონ ევროს.

15:03 “პარი სენ-ჟერმენმა” 180 მილიონ ევრომდე ჩამოიყვანა ნეიმარის ღირებულება და არავითარ შემთხვევაში არ დათანხმდება ბრაზილიელის რომელიმე ფეხბურთელში გაცვლას. (Diario Sport)

16:39 ცნობილმა ჟურნალისტმა ჯანლუკა დი მარციომ გაარკვია კევინ-პრინც ბოატენგის ახალი სამუშაო ადგილი - ეს არის “ფიორენტინა”.

16:49 ბოატენგის გზას შეიძლება დაადგეს 21 წლის მცველი პოლ ლიროლა. ფლორენციელები მზად არიან მასში 15 მილიონი ევრო გადაიხადონ.

17:12 “იუვენტუსმა”, შესაძლოა, პაულო დიბალა “მანჩესტერ იუნაიტედს” რომელუ ლუკაკუში გაუცვალოს, თან 20 მილიონი ევროც დაამატოს.

17:30 ოფიციალურად! შინჯი ოკაზაკიმ თავისუფალი აგენტის სტატუსით კონტრაქტი გააფორმა “მალაგასთან”. 33 წლის იაპონელი ინგლისის ჩემპიონი იყო “ლესტერის” რიგებში.

17:59 ოფიციალურად! “ვალიადოლიდმა” “რეალის” ცენტრალური მცველი ხავი სანჩესი გადაიბირა. ახალგაზრდა ფეხბურთელის შემთხვევაში ერთწლიანი იჯარა გაფორმდა.

18:10 “მილანი” ვერაფრით ახერხებს “ატლეტიკოდან” ანხელ კორეას გადაბირებას, მიუხედავად იმისა, რომ მზადაა 57 მილიონი ევრო გადაიხადოს 24 წლის არგენტინელში, - წერს ჯანლუკა დი მარციო.

18:21 ოფიციალურად! “შტუტგარტის” 24 წლის კონგოელი მცველი ჩადრაკ აკოლო “ამიენში” გადავიდა. ფრანგულ კლუბს ეს ტრანსფერი 3.5 მილიონი ევრო დაუჯდა. კონტრაქტი ოთხი წელი იქნება ძალაში.

18:33 გამოცხადდა “ფენერბაჰჩეს” ინტერესის შესახებ ერიკ მაქსიმ ჩუპო-მოტინგის მიმართ. თურქებმა “პარი სენ-ჟერმენის” ფორვარდისთვის 15 მილიონი ევრო მოამზადეს. (Sabah)

18:49 “ინტერისა” და “მანჩესტერ იუნაიტედის” წარმომადგენლები დაუკავშირდნენ ივან რაკიტიჩის აგენტებს, რათა სცადონ ხორვატის შეძენა. სხვა ინფორმაცია არ ვრცელდება, მხოლოდ იმას წერენ, რომ თავად ხორვატს “ბარსელონაში” დარჩენა სურს. (Marca)

19:01 ოფიციალურად! “ჰოფენჰაიმმა” 10 მილიონი ევრო გადაიხადა “კოპენჰაგენის” ფორვარდ რობერტ სკოვში. შარშან მან 34 მატჩში 29 გოლი გაიტანა. თავდამსხმელმა 2024 წლის ზაფხულამდე გააფორმა კონტრაქტი და 29-ე ნომერი აიღო.

19:11 “პარი სენ-ჟერმენის” მწვრთნელი თომას ტუხელი შეეცდება კიდევ ერთი ტრანსფერის განხორციელებას. გერმანელ სპეციალისტს სურს “აუგსბურგიდან” თანამემამულე ფილიპ მაქსის გადაბირება - მცველის გამოსყიდვა 20 მილიონად არის შესაძლებელი.

19:22 ოფიციალურად! “ნოტინგემმა” ერთი სეზონით აიყვანა ევროპის 21-წლამდელთა ჩემპიონი რაფა მირა. ფეხბურთელი “ვულვერჰემპტონმა” დათმო.

19:45 თურქი ტალანტის ემრე მორის აგენტმა ერიკ ალონსომ თავის “ტვიტერში” დაწერა, რომ მისი კლიენტი “გალათასარაიში” გააგრძელებს კარიერას. ამ მომენტისთვის ფეხბურთელი “სელტას” ეკუთვნის და მისი ღირებულება 2 მილიონი ევროს.

20:03 იგივე ჯანლუკა დი მარციო წერს, რომ დიბალას აგენტი ინგლისში, კერძოდ, მანჩესტერში ჩავიდა. ის “იუნაიტედთან” არგენტინელის პირადი კონტრაქტის პირობებს განიხილავს და ითხოვს თავისი კლიენტისთვის 9 მილიონ ევროს.

19:22 ოფიციალურად! ნადიმ ამირიმ “ჰოფენჰაიმი” “ლევერკუზენით” შეცვალა. “ბაიერს” ეს ფეხბურთელი 11 მილიონი ევრო დაუჯდა, ხოლო ნახევარმცველთან ხუთწლიანი კონტრაქტი გაფორმდა.

20:36 “რენის” 21 წლის ფორვარდი ისმაილა სარი “უოტფორდში” გადავა 33 მილიონ ევროდ. (The Sun)

20:47 “ზენიტის” არგენტინელი ნახევარმცველი მატიას კრანევიტერი “გალათასარაის” ყურადღების ცენტრში მოექცა. ფეხბურთელი ამგვარი ტრანსფერის წინააღმდეგი არ არის. (Fotospor)

20:57 “რომას” კვლავ სურს “იუვენტუსიდან” ფორვარდ გონსალო იგუაინის გამოსყიდვა. ტურინელებს დიდად არ სჭირდებათ არგენტინელი, ამიტომაც ტრანსფერი 36 მილიონად სავსებით შესაძლებელია. (Corriere dello Sport)

21:18 ოფიციალურად! პატრიკ კუტრონე უკვე “ვულვზის” მოთამაშეა. მან “მგლებთან” 4-წლიანი კონტრაქტი გააფორმა, ტრანსფერის თანხამ კი 4 მილიონი ევრო შეადგინა.

21:29 ოფიციალურად! “აიაქსი” აგრძელებს შემადგენლობის გაძლიერებას ახალი სეზონის წინ. მათ “ფრაიბურგიდან” გადაიბირეს ალექს მენდესი. 18 წლის ამერიკელთან ოთხწლიანი კონტრაქტი გაფორმდა.

21:42 ყატარის “ალ სადისა” და ალჟირის ნაკრების ფორვარდი ბაღდად ბუნეჯა “მონაკოს” ინტერესთა სფეროში მოექცა. წინასწარი მონაცემებით, ტრანსფერის თანხა 15 მილიონ ევროს შეადგენს. გასულ სეზონში “ალ სადის” რიგებში ალჟირელმა 22 მატჩში 39 გოლი გაიტანა. (France Football)

21:55 “ბარსელონა” იმედოვნებს, რომ მოახერხებს ამ ზაფხულს მეოთხე შენაძენის გაკეთებას. ეს იქნება არა ნეიმარი, არამედ “ბეტისის” მარცხენა მცველი ხუნიორ ფირპო. ამის შესახებ უკვე დიდი ხანია იწერება, მაგრამ კლუბები ტრანსფერის თანხაზე ვერ თანხმდებიან - “ბარსელონა” 25 მილიონს იხდის, გამოსასყიდი თანხა კი 40 მილიონია.

ყოველდღიური სპორტული გაზეთი "ლელო"
631
მკითხველის კომენტარები / 0 /
მსგავსი ამბები
რუბრიკის სხვა სიახლეები
;