ტრანსფერები - ONLINE: ნეიმარს მადრიდში ტრანსფერს დაჰპირდნენ

13:02 "არსენალი" აგრძელებს მოლაპარაკებებს "დორტმუნდთან" ფორვარდ პიერ-ემერიკ ობამეიანგის თაობაზე. გერმანული კლუბი მზად არის, გაუშვას ფორვარდი და სანაცვლოდ მიიღოს 60 მილიონი ევრო და ლონდონელთა ფორვარდი ოლივიე ჟირუ (Bild).

13:17 "ფეიენოორდის" ფორვარდით, ნიკოლაი იორგენსენით "ნიუკასლი" დაინტერესდა. ინგლისური კლუბი მზად არის, 17 მილიონი ევრო გადაიხადოს 27 წლის ფეხბურთელში (Sky Sport).

13:25 ზაფხულში "რეალი" მესამედ შეეცდება "მანჩესტერ იუნაიტედიდან" შეიძინოს მეკარე დავიდ დე ხეა. გარიგება შედგება, მაგრამ 100 მილიონი ევროს ხარჯზე (chadena ser).

13:32 "ინტერმა" დაიყოლია "ლივერპულის" ხელმძღვანელობა - სეზონის ბოლომდე იჯარით დათმოს ფორვარდი დანიელ სტარიჯი. იტალიურ კლუბს ექნება უფლება - 18 მილიონ ევროდ გამოისყიდოს ინგლისელი (Sport Italia).

13:53 "დორტმუნდი" თანახმაა, ცენტრალური მცველი ნევენ სუბოტიჩი "სენტ ეტიენში" გაუშვას. სერბი მალე სამედიცინო შემოწმებას გაივლის და თავისუფალი აგენტის რანგში ორწლინახევრიან კონტრაქტს გააფორმებს.

13:59 "ინტერის" ნახევარმცველი ჟოაო მარიო მალე "ვესტ ჰემში" ამოჰყოფს თავს. ლონდონელები 1.1 მილიონად იჯარით აიყვანენ პორტუგალიელს (La gazzetta dello sport).

14:15 "ბრაიტონი" ახლოს არის 10 მილიონ ევროდ "ბეტისის" 23 წლის ნახევარმცველ ვიქტორ კამარასას შეძენასთან (football espana ).

14:28 38 წლის ბრაზილიელი მეკარე ჟულიო სეზარი მოლაპარაკებებს აწარმოებს "ფლამენგოში" დაბრუნებაზე. ვეტერანმა შემოდგომაზე თავისუფალი აგენტის რანგში დატოვა "ბენფიკა" ( Globo Esporte).

14:31 "ბენფიკას" მარცხენა მცველი ალეხანდრო გრიმალდო ზაფხულში "ნაპოლიში" გადავა 30 მილიონ ევროდ. 22 წლის ფეხბურთელი ნეაპოლელებთან ხუთწლიან კონტრაქტს გააფორმებს, რომლის მიხედვითაც, წელიწადში 2 მილიონ ევროს გამოიმუშავებს (O Jogo).

14:38 "სასუოლოს" ფორვარდი მატეო პოლიტანო ახლოს არის "ნაპოლიში" გადასვლასთან (La Nazionale).

14:54 "არსენალის" ყოფილი მცველი ბაკარი სანია, რომელიც "მანჩესტერ სიტიდან" წასვლის შემდეგ, ნახევარი წელია თავისუფალი აგენტია, "ბენევენტოში" შეიძლება გადავიდეს.

15:24 "საუთჰემპტონი" მოელაპარაკა "მონაკოს" 26 წლის ფორვარდის გვიდო კარილიოს შეძენაზე. ტრანსფერის თანხა 21 მილიონი ევროა.

15:32 "იუვენტუსის" მარცხენა გარემარბმა კვადვო ასამოამ გადაწყვიტა - არ გააგრძელოს კონტრაქტი ტურინელებთან. ფეხბურთელით ინტერესდებიან - "რომა", "ინტერი" და "გალათასარაი" (Tuttosport).

15:47 "სანდერლენდის" ნახევარმცველ ჯეკ როდუელის გადასვლა ჰოლანდიურ "ვიტესში" ბოლო მომენტში ჩაიშალა.

16:01 ოფიციალურად! "ლაიპციგი" აგრძელებს ახალგაზრდა ტალანტების შეძენას. "ხარებმა" 20 მილიონ ევროდ აიყვანეს 16 წლის ნახევარმცველი მადს ბიდსტრუპი.

16:09 "რომას" სპორტული დირექტორი მონჩი იმედოვნებს "ბარსელონას" მცველის ალეიშ ვიდალის 10 მილიონ ევროდ შეძენას.

16:24 გერმანიაში დარწმუნებით იუწყებიან, რომ "ჩელსის" განაპირა მცველი ბაბა რაჰმანი წლინახევრიანი იჯარით "შალკეში" გადავა (Sky Germany).

16:31 კრიშტიანო რონალდოს მეგობარი მიგელ პაიშაუ ჰყვება, რომ "რეალის" ფეხბურთელმა პორტუგალიაში დაბრუნება მოინდომა. მისი სიტყვებით, ფორვარდს ლისაბონის "სპორტინგში" სურს დაბრუნება.

16:39 ოფიციალურად! "ხეტაფეს" მეკარე ვისენტე გუაიტა კარიერას ინგლისში გააგრძელებს. "ხეტაფე" მის სანაცვლოდ 8 მილიონ ევროს ითხოვდა. "ვესტ ჰემი" 4 მილიონს გადაიხდის, დანარჩენს თავად მეკარე დაამატებს.

16:47 ოფიციალურად! "ლევანტემ" სეზონის ბოლომდე იჯარით აიყვანა "სელტას" მეკარე ივან ვილიარი.

17:12 "უოტფორდი" აპირებს, "გიოტებორგიდან" შეიძინოს 21 წლის მეკარე პონტუს დალბერგი. ტრანსფერის თანხად 3.8 მილიონი ევრო სახელდება.

17:20 ოფიციალურად! "რივერ პლეიტმა" იჯარით აიყვანა "პორტუს" შემტევი ნახევარმცველი ხუან ფერნანდო კინტერო. 25 წლის ფეხბურთელის იჯარის ხელშეკრულება 2018 წლის ბოლომდეა ძალაში.

17:38 "რომას" ჯერჯერობით არ აწყობს "ჩელსის" წინადადება ედინ ჯეკოს თაობაზე. იტალიურ კლუბს 30 მილიონი ევრო უნდა, "ჩელსი" კი მხოლოდ 25 მილიონს იხდის.

18:28 "ვერონას" ფორვარდი ჯანპაოლო პაცინი, შესაძლოა, "ტორინოში" გადავიდეს. ტურინელები 33 წლის ფეხბურთელის იჯარას გეგმავენ (თუტტოსპორტ).

18:36 "ტოტენჰემს" "ნაპოლის" გვინეელი მცველი ამადუ დიავარა მოუნდა. ლონდონელები მზად არიან, აფრიკელში 38 მილიონი ევრო გადაიხადონ (Calcio Napoli 24).

18:44 "ინტერი" და "ვესტ ჰემი" ლისაბონის "სპორტინგის" საყრდენი ნახევარმცველისთვის ვილიამ კარვალიოსთვის ბრძოლას აპირებენ (Gazzetta dello sport).

18:59 "მანჩესტერ იუნაიტედი" 60 მილიონ ევროდ აპირებს "ნაპოლის" მცველის ფაუზი გულამის შეძენას (Rai Sport).

19:05 საფრანგეთის ნაკრების ყოფილი ნახევარმცველი ფლორან მალუდა კარიერას ლუქსემბურგში გააგრძელებს. 37 წლის ფეხბურთელმა კონტრაქტი გააფორმა კლუბ "დიფერდანჟთან". გარიგების დეტალები ცნობილი არ არის. ფრანგის ოფიციალური პრეზენტაცია დღეს შედგება. მალუდას წინა კლუბი ინდოეთის დელი დაინამოსი" იყო, რომელიც გასული წლის ზაფხულში დატოვა.

19:12 ოფიციალურად! "სენტ ეტიენის" ფორვარდი ლოის დიონი "ბრისტოლ სიტიში" გადავიდა. 25 წლის ფორვარდის ტრანსფერის თანხა უცნობია.

19:18 "პარი სენ-ჟერმენის" პრეზიდენტი ნასერ ალ-ჰელაიფი ფორვარდ ნეიმარს მადრიდის "რეალში" გაშვებას დაჰპირდა იმ შემთხვევაში, თუ პარიზული კლუბი მიმდინარე სეზონში ჩემპიონთა ლიგას მოიგებს (The Times).

19:27 ოფიციალურად! "მანჩესტერ იუნაიტედის" 20 წლის მცველი აქსელ ტუანზებე "ასტონ ვილას" შეუერთდა, სადაც იჯარით ამ სეზონის ბოლომდე ითამაშებს.

19:34 ოფიციალურად! "ვერდერმა" სეზონის ბოლომდე იჯარით აიყვანა "ბაიერნის" 19 წლის მარცხენა მცველი მარკო ფრიდელი.

19:34 ოფიციალურად! გაბიგოლი, რომელიც "ინტერს" ეკუთვნის და სეზონის პირველი ნახევარი "ბენფიკაში" გაატარა, "სანტოსში" დაბრუნდა სეზონის ბოლომდე იჯარის წესით.

20:10 "არსენალისა" და "დორტმუნდის" მოლაპარაკებები პიერ-ემერიკ ობამეიანგის ტრანსფერზე ჩიხში შევიდა. გერმანელები უკმაყოფილონი არიან იმით, რომ ლონდონელები მხოლოდ 50 მილიონ ევროს იხდიან (Kicker).

20:18 "პარი სენ-ჟერმენის" არგენტინელი პლეიმეიკერი ხავიერ პასტორე ახლოს არის იტალიაში დაბრუნებასთან - ფეხბურთელში 30 მილიონს იხდის "ინტერი".

20:25 თითქმის გადაწყვეტილია, რომ მცველი სტეფან დე ვრეი გააგრძელებს კონტრაქტს "ლაციოსთან". 25 წლის ფეხბურთელით "ბარსელონა" და "ინტერი" ინტერესდებოდნენ (Corriere dello sport).

20:56 ოფიციალურად! ბრაზილიელი ვეტერანი ფორვარდი ვაგნერ ლავი "ალანიასფორიდან" "ბეშიქთაშში" 3.2 მილიონ ევროდ გადავიდა.

ყოველდღიური სპორტული გაზეთი "ლელო"
1532
მკითხველის კომენტარები / 0 /
მსგავსი ამბები
რუბრიკის სხვა სიახლეები
;