ტრანსფერები - ONLINE: 22 იანვირს სატრანფერო ჭორ-მართალი

13:05 "მანჩესტერ სიტიმ" "ბილბაოდან" ცენტრალური მცველის ემერიკ ლაპორტის შეძენა დაგეგმა. პრემიერლიგის ლიდერი 66 მილიონ ევროს გადაიხდის, როგორც ბასკის კონტრაქტშია გაწერილი (El Chiringuito).

13:20 არტურო ვიდალი არ წავა "ბაიერნიდან". ამის შესახებ 30 წლის ფეხბურთელმა თავად განაცხადა. ჩილელს "ჩელსიში" წასვლა უწინასწარმეტყველეს ლეონ გორეტცკას შეძენის შემდეგ, მაგრამ ვიდალს ყველაფერი აწყობს მიუნხენში (Goal).

13:30 ოფიციალურად! "ფულჰემმა" იჯარით აიყვანა "საუთჰემპტონიდან" მეტ ტარგეტი.

13:37 ოფიციალურად! რობინ ვან პერსი ოფიციალურად წარადგინეს "ფეიენოორდის" მოთამაშის რანგში. ფორვარდი როტერდამულ კლუბში 13 წლის შემდეგ დაბრუნდა და 32-ე ნომერი აირჩია.

13:38 რაფინია ალკანტარა სულ უფრო ახლოსაა "ინტერთან". ის მილანის აეროპორტში შეამჩნიეს. წარმატებული მოლაპარაკებების შემთხვევაში, "ინტერი" 35 მილიონ ევროს გადაუხდის "ბარსელონას".

13:45 რობინიო, რომელსაც იტალიის სასამართლომ ცხრაწლიანი პატიმრობა მიუსაჯა, კარიერას თურქეთში გააგრძელებს. ბრაზილიის ნაკრების ყოფილი ფორვარდი "შივასფორთან" გააფორმებს კონტრაქტს, - წერს კლუბის ოფიციალური "ტვიტერი".

14:05 ხუან მატა, რომელსაც ზაფხულში კონტრაქტი ეწურება, არ ფიქრობს "მანჩესტერ იუნაიტედის" დატოვებას. ესპანელს იმედი აქვს, რომ ინგლისური კლუბი გაააქტიურებს ხელშეკრულების ერთი წლით გახანგრძლივების პუნქტს (Superdeporte).

14:27 აარონ ლენონი დაცემას განაგრძობს. ყოფილი ტოტენჰემელი "ბარნლიში" გამოკვლევის შედეგებს ელოდება, რათა იქ "ევერტონიდან" გადავიდეს. ორი წლის წინ, ლენონი ფსიქიატრიულ საავამდყოფოში მოათავსეს, რადგან თავის მოკვლა სცადა.

14:32 "ბილბაოს" მეკარე კეპა არისაბალაგამ, რომლის გადაბირებასაც "რეალი" ცდილობდა, კონტრაქტი გააგრძელა ბასკურ კლუბთან. ახალი ხელშეკრულებით, 23 წლის მეკარის გასაყიდი თანხა - 80 მილიონი ევროა. კონტრაქტის ხანგრძლივობა - 7 წელს უდრის.

14:45 "არსენალი" და "ლივერპული" ტომა ლემარისთვის ზაფხულში იბრძოლებენ. ორივე კლუბი მზად არის, "მონაკოს" 95 მილიონი ევრო გადაუხადოს.

14:30 ოფიციალურად! მატიო ფლამინიმ 18-თვიანი კონტრაქტი გააფორმა "ხეტაფესთან". ფრანგის ბოლო კლუბი იყო "კრისტალ პალასი", საიდანაც ის ზაფხულში წავიდა (Sky Sports).

15:06 "ჩელსიმ", შესაძლოა, სულ მალე გააფორმოს ორი მსხვილი გარიგება. ჯეკო და ემერსონი "რომადან" ახლოს არიან ლონდონში გადასვლასთან. ორივე ტრანსფერი 50 მილიონი ევრო დაჯდება (Sky Sports).

15:20 ჰან-კვან სონი "კალიარიდან", შესაძლოა, "იუვენტუსში" გადავიდეს. ჩრდილოკორეელი ფეხბურთელის ტრანსფერისთვის 15 მილიონი ევრო იქნება საჭირო (Gazzetta dello sport).

15:36 "ატლეტიკოს" ნახევარმცველს ნიკოლას გაიტანს ხუთი წინადადება აქვს: "ბოკა ხუნიორსი", "ინტერი", "მონტერეი", "სუონსი" და "შანხაი შენჰუა" (Marca).

16:05 სლიმანი, შესაძლოა, "ჩელსიში" გადავიდეს. წერენ, რომ ალჟირელის იჯარით აყვანა სურთ. შარშანდელ სეზონში სლიმანი "ლესტერში" 33 მილიონ ევროდ გადავიდა (Mirror).

16:15 ლასანა დიარამ სამედიცინო შემოწმება გაიარა "პარი სენ-ჟერმენში". "რეალის", "არსენალისა" და "ჩელსის" ყოფილი ფეხბურთელი პარიზში თავისუფალი აგენტის სტატუსით გადადის. 32 წლის ნახევარმცველთან 1.5-წლიანი კონტრაქტი გაფორმდება. დიარა ამ სეზონს "ალ-ჯაზირაში" იწყებდა (Le Parisien).

16:28 მარიო ბალოტელი სამშობლოში ბრუნდება. იტალიელი ფორვარდი ზაფხულში თავისუფალი აგენტის სტატუსით გადავა "იუვენტუსში" და ხუთწლიან კონტრაქტს გააფორმებს (Daily Mail).

16:41 "სუონსიმ" 10 მილიონი ევრო შესთავაზა "აიაქსს" ამინ იუნესის სანაცვლოდ. (Sky Italia)

16:49 შეტევითი ხაზის გასაძლიერებლად, "ჩელსი" ასევე განიხილავს 36 წლის პიტერ კრაუჩის კანდიდატურას (Inderpendent).

16:59 დანიელ სტარიჯმა "ლივერპულს" მიმართა "სევილიაში" გაშვების თხოვნით, მაგრამ ინგლისურ კლუბს არ სურს იჯარა. ყველაზე რეალური ვარიანტია - "ინტერი", რომელიც ჯერ იჯარით აიყვანს ინგლისელს და შემდეგ გამოისყიდის. "ლივერპული" 27 მილიონ ევროს ითხოვს.

17:30 ოფიციალურად! "კრისტალ პალასმა" აიყვანა ნახევარმცველი ერდალ რაკიპი "ბენფიკადან". კლუბებმა სეზონის ბოლომდე იჯარა გააფორმეს.

17:41 ენდი ქეროლი, სავარაუდოდ, ვეღარ გადავა "ჩელსიში". ფორვარდმა ფეხი მოიტეხა და სამი თვე გაუცდება (Daily Mail).

17:50 ოფიციალურად! "პორტუმ" ხელშეკრულება გააფორმა "პორტიმონენსეს" ფეხბურთელ პაულინიო სოარეშთან. 23 წლის ბრაზილიელი ნახევარ წელს იჯარით გაატარებს. პაულინიომ მე-6 ნომერი აირჩია.

17:51 ოფიციალურად! ავსტრიის "შტურმის" მცველი ხარალამბოს ლიკოიანისი "კალიარის" ფეხბურთელი გახდა. საბერძნეთის ნაკრების მოთამაშემ ოთხწლინახევრიანი კონტრაქტი გააფორმა.

18:12 ოფიციალურად! ნახევარმცველი კენი მაკლინი "აბერდინიდან" "ნორვიჩში" გადავიდა.

18:21 ეგვიპტის ფეხბურთის ასოციაციის პრეზიდენტმა აბო რიდამ განაცხადა, რომ მომავალ ზაფხულს "რეალის" მთავარი სატრანსფერო სამიზნე მოჰამედ სალაჰი იქნება (The Sun).

18:30 ოფიციალურად! "უდინეზეს" ფორვარდი რიად ბაიჩი "ისთანბულში" გადავიდა. 23 წლის ბოსნიელი თურქეთში იჯარით ნახევარ წელს გაატარებს.

18:45 ზაფხულში "რეალის" კიდევ ერთი სამიზნე ჰარი კეინი იქნება. მადრიდელები აპირებენ დიდი ფული მიიღონ კრიშტიანო რონალდოს "მანჩესტერ იუნაიტედში" ან პსჟ-ში გაყიდვით და შემდეგ, 200 მილიონი ევრო გადაუხადონ "ტოტენჰემს" კეინში (Sunday Times).

19:02 "ევერტონი", "ნიუკასლი" და "ბრაიტონი" იბრძვიან "ბრისტოლის" მარცხენა მცველ ჯოუი ბრაიანისთვის. ფეხბურთელი დაახლოებით 8 მილიონი ევრო ღირს (Mirror).

19:32 პიერ-ემერიკ ობამეიანგმა სტანდარტული ვარჯიში ჩაატარა "დორტმუნდში". ეს გაბონელის პირველი ვარჯიშია მას შემდეგ, რაც ფორვარდი ჩამოაშორეს "ჰერტასთან" პარასკევის მატჩს საქმისადმი არაპროფესიული მიდგომის გამო (იგულისხმება "არსენალთან" მოლაპარაკებები).

19:52 ობამეიანგმა და "არსენალმა" შეათანხმეს კონტრაქტი. უახლოეს ორ-სამ დღეში კლუბებმა ერთმანეთში უნდა მოილაპარაკონ და მაშინ გამოცხადდება გარიგების შესახებ ოფიციალურად.

20:54 "მანჩესტერ სიტის" აკადემიის შეფი ბრაიან მარვუდი საფრანგეთში გაემგზავრა, რათა საქმეში ნახოს "ლილისა" და საფრანგეთის U19 ნაკრების ფეხბურთელი ბუბაკარი სუმარე. თინეიჯერს, რომელიც 21 მილიონი ევრო ღირს, ახალ პოლ პოგბას უწოდებენ. ამ ბიჭზე, ასევე, პრეტენზიას აცხადებენ "ევერტონი" და "ლესტერი" (Mail).

20:55 მას შემდეგ, რაც კეპა არისაბალაგამ "ბილბაოსთან" გააგრძელა კონტრაქტი, "რეალმა" გადაიფიქრა მისი შეძენა. მადრიდელები ტიბო კურტუას ვარიანტს დაუბრუნდნენ (Telegraph).

21:00 ოფიციალურად! "მანჩესტერ იუნაიტედმა" და "არსენალმა" დაადასტურეს ალექსის სანჩესისა და ჰენრიხ მხითარიანის გაცვლითი ოპერაცია. 29 წლის ჩილელი "იუნაიტედში" 7-ნომრიანი მაისურით ითამაშებს. მან 4,5-წლიანი კონტრაქტი გააფორმა.

სანჩესის საბაზისო ხელფასი კვირაში 350 ათასი ფუნტია. ამას ემატება ასევე კვირაში 100 ათასი ფუნტი საიმიჯო უფლებებისთვის და კიდევ 144 ათასი - ბონუსების სახით.

"მანჩესტერს" სანჩესის გადაბირება სულ 35 მილიონი ფუნტი დაუჯდა, საიდანაც 20 მილიონს "არსენალი" მიიღებს, ხოლო 15-ს სანჩესის აგენტი ფერნანდო ფელიჩევიჩი.

ყოველდღიური სპორტული გაზეთი "ლელო"
1565
მკითხველის კომენტარები / 0 /
მსგავსი ამბები
რუბრიკის სხვა სიახლეები
;