ტრანსფერის მოლოდინში. ირაკლი სიხარულიძე დინამოც მიწვევს და სხვა გუნდებიც

ირაკლი სიხარულიძე კვლავ ახალ გუნდში გადასვლის მოლოდინშია. გუშინ გავრცელებული ინფორმაცია, თითქოს, ეროვნული ლიგის საუკეთესო თავდამსხმელი, ფეხბურთელი და ბომბარდირი თბილისის "დინამოში" ჩაირიცხა, "ლელომ" თავად ფეხბურთელთან გადაამოწმა, მაგრამ ეს ჯერ არ დადასტურებულა.

"დაინტერესება თბილისის "დინამოდან" ნამდვილად არის და, რა თქმა უნდა, ეს მახარებს. ამ კლუბში გავიზარდე და პირველი ნაბიჯები გადავდგი. თუმცა, დაინტერესება უცხოეთიდანაც არის და ჯერ არ გარკვეულა, სად ვითამაშებ. წესით, ეს რამდენიმე დღეში მეცოდინება", - ამბობს სიხარულიძე.

მისი თქმით, ფორმის შესანარჩუნებლად თავის ყოფილ კლუბ "ლოკომოტივში" ვარჯიშობს: "თბილისის "ლოკომოტივის" მადლობელი ვარ, რადგან გუნდში არ ვირიცხები და ვარჯიშის საშუალებას მაინც მაძლევენ.

ახლა ყოველდღიურად გუნდთან ერთად ვვარჯიშობ და ვცდილობ, ტრანსფერის გარკვევამდე ტონუსში ვიყო".

სიხარულიძემ იმ მიზეზზეც გვითხრა, რის გამოც "ზამთრის თასზე" არ ითამაშა: "ყოველდღე გუნდის საკითხის გადაწყვეტას ველოდები.

"ლოკომოტივში" თამაში მსურდა, მაგრამ რომელიმე კლუბს რომ დაერეკა და წასვლა დამჭირვებოდა, შუა გზაში ბიჭების მიტოვება არ გამოდიოდა. ამის გამო მოვერიდე ტურნირში მონაწილეობას".

ყოველდღიური სპორტული გაზეთი "ლელო"
1276
მკითხველის კომენტარები / 0 /
მსგავსი ამბები
რუბრიკის სხვა სიახლეები
;