ტრანსფერ-ONLINE: იკარდი 'რეალში' გადავა, რემზი 'იუვეში'

13:35 ბრაზილიელმა ვეტერანმა ვაგნერ ლავმა, შესაძლოა, გაწყვიტოს კონტრაქტი „ბეშიქთაშთან“, რადგან თურქული მხარე ხელფასს აღარ იხდის. „ჩვენ კარგი დამოკიდებულება გვაქვს კლუბთან, მაგრამ თუ მოთამაშეს ასე ეპყრობიან, ჩვენ სარჩელით ფიფას მივაშურებთ“, - განუცხადა Globoesporte-ს ლავის აგენტმა დიოგო სოუზამ.

13:41 ფრენკი დე იონგი დათანხმდა „ბარსელონაში“ გადასვლას. El Mundo Deportivo იტყობინება, რომ ჰოლანდიელი ხუთწლიან კონტრაქტს მოაწერს ხელს, „აიაქსი“ კი მიიღებს 75 მილიონ ევროს. ჯერჯერობით უცნობია, როდის გადაბარგდება „კამპ ნოუზე“ - ზამთარში თუ ზაფხულში.

13:44 ცნობილია, რომ „რეალი“ დაინტერესებულია „პორტუს“ ცენტრალური მცველით ედერ მილიტაოთი. ახლა კი 20 წლის ბრაზილიელისთვის ბრძოლაში ჩაებნენ „მანჩესტერ იუნაიტედი“ და „მანჩესტერ სიტი“. ამის შესახებ წერს Sky Sports.

13:52 Sky Sport Italia იტყობინება, რომ „ჩელსიმ“ უარი თქვა ნიკოლა ბარელასა („კალიარიმ“ ფეხბურთელი 50 მილიონი ევრო დააფასა) და გონსალო იგუაინის შეძენაზე და გადაერთო „ზენიტიდან“ ლეანდრო პარედესის გადაბირებაზე.

13:56 Sky Sport Italia-ს ცნობით, მანოლო გაბიადინი აუცილებლად გაემგზავრება იჯარით „საუთჰემპტონიდან“ „სამპდორიაში“. კლუბებმა უკვე ყველაფერზე მოილაპარაკეს.

13:59 მთავარი ბელგიელი ინსაიდერი კრისტოფ ტერიე წერს, რომ ტორგან აზარი, დიდი ალბათობით, არ გადავა „დორტმუნდში“, თუმცა ამ ინფორმაციის დადასტურება არ არსებობს.

14:02 Marca იტყობინება, რომ „რეალი“ ახლოს არის „მალაგას“ ცენტრალური მცველის ჩეჩუს შეძენასთან.

14:07 ფრენკი დე იონგმა ოფიციალურად დაადასტურა, რომ „აიაქსში“ ამ სეზონის ბოლომდე დარჩება.

14:10 გილიემ ბალაგემ „ტვიტერში“ დაწერა, რომ ალვარო მორატა არ გადავა „სევილიაში“ ამ სატრანსფერო ბაზრისას. ესპანურ კლუბს „ჩელსის“ პირობები არ მოეწონა.

14:24 ჩინურმა „დაფან ილიანმა“ ედინსონ კავანის შეძენაზე შეტყობინება გაუგზავნა „პარი სენ-ჟერმენს“, თუმცა, თავად ურუგვაელმა უარყო აზიელების წინადადება. ამის შესახებ დაწერა Le10Sport-მა.

14:29 „ლივერპულს“ სურს „ბარნლის“ ცენტრალური მცველის ჯეიმს ტარკოვსკის შეძენა. იურგენ კლოპის გუნდის დაცვის ხაზში ბევრი ტრავმირებულია და ერთხელ მოედანზე 16 წლის კი-ჯან ჰუვერი გაუშვეს. ტარკოვსკიში „ბარნლი“ 55 მილიონ ევროს ითხოვს, - იტყობინება The Sun.

14:36 ლონდონის „არსენალის“ ნახევარმცველმა აარონ რემზიმ ხუთწლიანი კონტრაქტი შეათანხმა ტურინის „იუვენტუსთან“, - წერს გაზეთი The Guardian. 28 წლის რემზი წელიწადში რვა მილიონ ევროს მიიღებს. შესაბამისად, ის გახდება ყველაზე მაღალანაზღაურებადი ფეხბურთელი „იუვენტუსში“ კრიშტიანო რონალდუს შემდეგ.

14:40 Marca წერს, რომ „ბარსელონას“ პრეზიდენტი ჟორდი ბარტომეუ პირადად მონაწილეობს ამ ზამთარს დენის სუარესის გაყიდვაში. ფეხბურთელს „არსენალში“ გადასვლა სურს.

14:49 უკრაინელი რუსლან მალინოვსკი „გენკიდან“ „რომაში“ გადავა. ტრანსფერი, სავარაუდოდ, ზაფხულში შედგება. ბელგიური კლუბი 12 მილიონ ევროს მიიღებს. რომაელებს უკვე მისცეს თანხმობა თავად ფეხბურთელმა და მისმა აგენტებმა. ამის შესახებ „ტვიტერზე“ ჯანლუკა დი მარციომ დაწერა.

15:04 Sport Bild წერს, რომ „ბაიერნი“ დაუკავშირდა „პარი სენ-ჟერმენს“ ადრიენ რაბიოს თაობაზე, მაგრამ ფრანგი ნახევარმცველისთვის „ბარსელონა“ და „იუვენტუსი“ უფრო მომხიბვლელია.

15:09 L’Equipe იტყობინება, რომ „მონაკო“ „ლილისგან“ მცველ ფოდე ბალოს შეიძენს. ტრანსფერის თანხა 13 მილიონი ევრო იქნება, კონტრაქტის ვადა - 4.5 წელი.

15:14 „ჯენოას“ ფორვარდი კრისტიან კუამე ახლოს არის „ნაპოლისთან“. კლუბებმა უკვე მოილაპარაკეს ტრანსფერზე, მაგრამ საქმეში, შესაძლოა, „იუვენტუსიც“ ჩაერიოს, - წერს Calciomercato.

15:18 „ინტერმა“ დააგდო ივან პერიშიჩის ფასი - ახლა, ხორვატის შეძენა შეიძლება არა 55 მილიონ ევროდ, არამედ, 33 მილიონად. ნახევარმცველთან კონტაქტი აქვს „მანჩესტერ იუნაიტედს“, - იტყობინებიან Tuttosport და Daily Mirror.

15:26 El Mundo Deportivo-მ ჩამოთვალა ყველა ფორვარდი, რომლებსაც „ბარსელონა“ აკვირდება. 32 წლის ლუის სუარესის შესაცვლელად, კატალონიელებს სურთ ჰარი კეინი „ტოტენჰემიდან“, ტიმო ვერნერი „ლაიპციგიდან“, ლუკა იოვიჩი „აინტრახტიდან“, მაქსი გომესი „სელტადან“, კასპერ დოლბერგი „აიაქსიდან“ ან კშიშტოფ პიონტეკი „ჯენოადან“.

15:31 მაურო იკარდი „რეალში“ გადავა. როცა ვანდა ნარა ლაპარაკობდა იმაზე, რომ „ინტერთან“ კონტრაქტი აღარ გაგრძელდება, ფლორენტინო პერესი უკვე ახლოს იყო არგენტინელის გაფორმებასთან. იკარდი ექვსწლიან კონტრაქტს გააფორმებს და მადრიდში 12-15 მილიონ ევროს გამოიმუშავებს სეზონში. ამის შესახებ დაწერა Don Balon-მა.

15:41 ოფიციალურად! „ლესტერის“ ფორვარდი ფუსენი დიაბატე იჯარით თურქეთის „შივასსფორში“ გადავიდა. „მელიების“ რიგებში ჩატარებულ 19 მატჩში მან მხოლოდ ორი გოლი გაიტანა.

15:51 ინსაიდერი აბდელა ბულმა წერს, რომ „ბარსელონას“ მიერ ადრიენ რაბიოს გაფორმება ჭიანურდება იმის გამო, რომ ფრანგს სურს, კონტრაქტში ჩაიწეროს შემდეგი პუნქტი: მას არ დააყენებენ საყრდენ ზონაში.

16:06 London Evening Standard წერს, რომ „ბარსელონამ“ შეიძლება გაყიდოს ფილიპე კოუტინიო, რათა დააგროვოს თანხა ნეიმარის „პარი სენ-ჟერმენიდან“ დასაბრუნებლად.

16:14 A Bola-ს ინფორმაციით, „ბენფიკას“ ბოსებს სურთ ხელში ჩაიგდონ ჟოზე მოურინიო. ლისაბონური კლუბის პრეზიდენტმა ლუიშ ფელიპე ვიეირამ დაადასტურა: „ფული პრობლემა არ არის“.

16:18 Il Mattino ამტკიცებს, რომ „პარი სენ-ჟერმენი“ სულ მალე გადაუხდის „ნაპოლის“ 90 მილიონ ევროს ნახევარმცველ ალანის სანაცვლოდ.

16:25 „ბაიერნის“ მარჯვენა მცველმა რაფინიამ დაადასტურა, რომ აწარმოებს მოლაპარაკებებს „ფლამენგოში“ საზაფხულო ტრანსფერზე. „ვნახე „ფლამენგოს“ პროექტი და მომეწონა. მინდა გავაგრძელო ტიტულების მოგება და ამგვარ შესაძლებლობას სწორედ ამ კლუბში ვხედავ“, - უთხრა რაფინიამ გაზეთ Lance-ს.

16:39 ანდალუსიურმა გამოცემა Estadio Deportivo-მ დაწერა, რომ „არსენალმა“ სარფიანი წინადადებით მიმართა „სევილიას“ ევერ ბანეგას ტრანსფერზე. 30 წლის ნახევარმცველი ლონდონში 7 მილიონ ევროს გამოიმუშავებს წელიწადში.

17:07 „პარი სენ-ჟერმენი“ ფრენკი დე იონგის გარდა, „აიაქსის“ კიდევ ერთი ნახევარმცველით ინტერესდება. დონი ვან დე ბეკი გადავა პარიზულ კლუბში, თუ დე იონგი „ბარსელონას“ აირჩევს. ასე მიაჩნია LEquipe-ს.

17:12 „ვალენსია“ ამ ზამთარს შეწყვეტს მიში ბატშუაის იჯარას. „დღეს, ჩვენ მოლაპარაკებებს ვაწარმოებთ რამდენიმე კლუბთან, - თქვა „ვალენსიას“ გენერალურმა დირექტორმა მატიე ალემანიმ. - მოთამაშემ იცის ამის შესახებ და ჩვენ ყველაფერს ვაკეთებთ, რომ ყველა მხარემ კომფორტულად იგრძნოს თავი“. ბელგიელი „ჩელსის“ საკუთრებაა.

17:28 ოფიციალურად! მეკარე ჟოელ პერეირა დაბრუნდა „ვიტორიადან“ „მანჩესტერ იუნაიტედში“. სეტუბალურმა კლუბმა დაადასტურა, რომ მანჩესტერელებმა ნაადრევად შეწყვიტეს პორტუგალიის ახალგაზრდული ნაკრების მეკარის იჯარა.

17:38 De Telegraaf წერს, რომ „აიაქსი“ მოელაპარაკა მექსიკურ „ამერიკას“ 18 წლის ფორვარდის დიეგო ლაინესის ტრანსფერზე. ამსტერდამელებმა მოუგეს კონკურენცია „ბეტისს“.

17:41 Spazio Milan-ის მტკიცებით, „მილანი“ არ გაუშვებს ამ ზამთარს გონსალო იგუაინს.

17:45 ოფიციალურად! იბაი გომესი დაბრუნდა „ბილბაოში“. ბასკურმა კლუბმა დაადასტურა უკუტრანსფერი „ალავესიდან“. გომესმა 2022 წლის ზაფხულამდე გააფორმა კონტრაქტი.

17:53 ოფიციალურად! უკრაინელი ფორვარდი ევგენი სელეზნიოვი „მალაგაში“ გადავიდა. ის სეზონის ბოლომდე ითამაშებს სეგუნდაში.

18:08 „ატლეტიკომ“ შეიძლება გაყიდოს ნიკოლა კალინიჩი, რათა დაფაროს ალვარო მორატას ხელფასი. ამაში დარწმუნებულია The Independent.

18:23 ჟოზე მოურინიომ O Jogo-სთან ინტერვიუში განაცხადა, რომ არ მიუღია შეთავაზება „ბენფიკასგან“ და საერთოდ არ სურს პორტუგალიურ ლიგაში მუშაობა.

18:26 „ტოტენჰემმა“ დაუმიზნა „ჰოფენჰაიმის“ ნახევარმცველ ფლორიან გრილიტშს. ავსტრიელის ფასი 20 მილიონია.

18:44 სომხურმა პრესამ დაწერა, რომ „ზენიტია“ დაინტერესებული „არსენალის“ ნახევარმცველ ჰენრიხ მხითარიანით.

19:15 პრემიერლიგის რამდენიმე კლუბს სურს „ლესტერის“ ფორვარდის შინჯი ოკაზაკის შეძენა. Sky Sports წერს, რომ ერთ-ერთი „ჰადერსფილდია“.

19:19 რობერტ ლევანდოვსკის ყოფილმა აგენტმა ცეზარ კუხარსკიმ თქვა, რომ პოლონელმა უარყო „პარი სენ-ჟერმენისა“ და პრემიერლიგის ტოპ-კლუბების წინადადებები, რადგან ფეხბურთელის მეუღლეს არ სურს საფრანგეთში ან ინგლისში გადასვლა. „არის ერთი ცხადი ვარიანტი - ესპანეთი და მადრიდის „რეალი“, - თქვა კუხარსკიმ Pilka Nozna-სთან კომენტარში.

20:18 მარკო არნაუტოვიჩის აგენტმა და ძმამ დანიელმა talkSport-თან ინტერვიუში განაცხადა, რომ „ვესტ ჰემის“ ფორვარდს სურს ჩინეთის სუპერლიგაში გადასვლა. „მას უნდა ახალ ბაზარზე გასვლა და ტიტულებისთვის ბრძოლა“, - თქვა დანიელ არნაუტოვიჩმა.

20:30 ოფიციალურად! ჰოლანდიელი მარჯვენა მცველი მარვინ ზეგელარი „უოტფორდიდან“ „უდინეზეში“ გადავიდა. იჯარა სეზონის ბოლომდეა ძალაში.

20:49 ჰაქან ჩალჰანოგლუ ჯერ ისევ შეიძლება გადავიდეს „ლაიპციგში“. თურქის ტრანსფერი ჯენარო გატუზოს ვეტოს გამო ჩაიშალა, მაგრამ, ახლა, გერმანელებმა 20-მილიონიანი წინადადება გაამზადეს. თან ჩალჰანოგლუს სურს „ლაიპციგში“ თამაში.

20:54 „შივასსფორი“ დარწმუნებულია, რომ იჯარით აიყვანს მარლოშ მორენოს „მანჩესტერ სიტიდან“. ამის შესახებ წერს ESPN. 22 წლის მორენომ უნდა შეცვალოს „ბაშაქშეჰირში“ წასული რობინიო.

21:15 „მანჩესტერ იუნაიტედს“ სურს გაუგრძელოს კონტრაქტები ანდერ ერერას, ხუან მატასა და ეშლი იანგს.

21:35 ოფიციალურად! ფორვარდი ჯერომ სინკლერი დაბრუნდა „სანდერლენდიდან“ „უოტფორდში“.

21:57 „ევერტონი“ დაინტერესებულია მიში ბატშუაით, რომელთან იჯარის გაწყვეტა სურს „ვალენსიას“, - იტყობინება Daily Mail.

ყოველდღიური სპორტული გაზეთი "ლელო"
969
მკითხველის კომენტარები / 0 /
მსგავსი ამბები
რუბრიკის სხვა სიახლეები
;