ტრანსფერ - Online: კურტუა თითქმის მადრიდელია, აზარი რჩება, პოგბას მსურველები არ ელევა, მოდრიჩი წავა?

13:17 Gazzetta Dello Sport მა დაწერა, რომ "შახტარის" ყოფილი ნახევარმცველი ბერნარდი მილანის "ინტერს" სჭირდება. ბრაზილიელზე პრეტენზიას "ჩელსი" აცხადებს.

13:21 "ბარსელონამ" ოფიციალურად წარადგინა არტურო ვიდალი. ჩილელმა პრეზენტაციაზე განაცხადა: "ბედნიერი ვარ. მოუთმენლად ველოდები მომენტს, როცა ვარჯიშებს შევუდგები ახალ პარტნიორებთან ერთად და ჩავიცვამ უდიდესი ისტორიის მქონე მაისურს. ეს სიზმარივითაა. იმედი მაქვს, ბევრ ტიტულს მოვიგებ. საკუთარ სიცოცხლეს მინდორზე დავტოვებ".

13:26 პოლ პოგბა "იუვენტუსში" დაბრუნდება, საპირისპირო მიმართულებით კი გაემგზავრება მირალემ პიანიჩი, - წერს Tuttosport.

13:27 ამბობენ, რომ პოგბა "ბაიერნსაც" აინტერესებს.

13:34 Sport.es იტყობინება, რომ "ბარსელონას" კიდევ ერთი მცველი მიდის "ევერტონში". იერი მინა 32 მილიონ ევროდ გადავა ინგლისში და ლივერპულურ კლუბთან 5-წლიან კონტრაქტს გააფორმებს. უფრო ადრე, "ბარსადან" "ევერტონში" ლუკ დინი გადაბარგდა.

13:39 ოფიციალურად! "სევილიამ" ოფიციალურად გამოაცხადა "ბარსელონადან" ალეიშ ვიდალის შეძენა. კლუბებმა 8.5 მილიონ ევროზე მოილაპარაკეს. სამი წლის წინ, "ბარსამ" ეს ფეხბურთელი "სევილიადან" 17 მილიონად იყიდა.

13:44 გაზეთ Bილდ-ის ინფორმაციით, "მანჩესტერ იუნაიტედმა" აქტიური მოლაპარაკებები დაიწყო ჯერომ ბოატენგის ტრანსფერზე. "იუნაიტედმა" ერთხელ უკვე შესთავაზა "ბაიერნს" 56 მილიონი ევრო, მაგრამ უარი მიიღო.

13:50 "მელბურნმა" გამოაცხადა კეისუკე ჰონდას ტრანსფერის შესახებ.

14:23 ოფიციალურად! "ბორდომ" ოპერატიულად იპოვა მალკომის შემცვლელი. ფრანგულ კლუბში ითამაშებს "გენტის" ფორვარდი სამუელ კალუ. ის მხოლოდ 19 წლისაა, ნიგერიიდანაა და მისი ტრანსფერი 8 მილიონი ევრო დაჯდა. ბელგიურ კლუბში კალუმ 48 მატჩი ჩაატარა, 10 გოლი გაიტანა და 13 საგოლე პასი შეასრულა.

14:28 Calciomerceto -ს მიაჩნია, რომ ურუგვაელი დიეგო ლაქსალტი "ზენიტში" გადავა სათამაშოდ. ნახევარმცველი, ჯერჯერობით, "ჯენოას" წევრია.

14:35 იმავე Calciomerceto -ს ინფორმაციით, "იუვენტუსის" ნახევარმცველი სტეფანო სტურარო სამ ინგლისულ კლუბს - "ვესტ ჰემს", "ნიუკასლსა" და "ლესტერს" აინტერესებთ. იტალიის ჩემპიონი 20 მილიონ ევროს ითხოვს.

14:42 Don Balon: "რეალი" 250 მილიონ ევროს გამოყოფს ჰარი კეინის შესაძენად და გადაუხდის იმ ოდენობის ხელფასს, რომელსაც კრიშტიანუ რონალდუ "იუვენტუსში" აიღებს.

14:53 Foot Mercato -ს განცხადებით, ადრიენ რაბიო "ბარსელონას" ნაცვლად, "მილანში" გადავა სათამაშოდ. "პარი სენ-ჟერმენის" საყრდენი იტალიას ირჩევს, რადგან კატალონელებმა უკვე შეიძინეს არტურო ვიდალი.

15:11 "ტოტენჰემი" სერიოზულად დაინტერესდა "კრისტალ პალასის" ფორვარდით უილფრიდ ზაჰათი, მაგრამ ტრანსფერის თანხად 84 მილიონი ევრო მოთხოვეს, - წერს Mirror. ადრე იტყობინებოდნენ, რომ 25 წლის გარემარბით "ჩელსიცაა" დაინტერესებული.

15:15 ტიბო კურტუამ "ჩელსის" ახალ მწვრთნელს მაურიციო სარის მოახსენა, რომ ლონდონური კლუბის დატოვება უნდა.

15:28 "ლილის" 27 წლის მცველი კევინ მალკიუი "ნაპოლიში" სამედიცინო შემოწმებას გადის.

15:34 14:28 Calciomerceto -ს მიაჩნია, რომ "ბარსელონამ" შეათანხმა პოლ პოგბას კონტრაქტი.

15:42 აქსელ ვიტსელი ახლოს არის "დორტმუნდთან". ბელგიელი ციურიხში ჩაფრინდა და შეუერთდება შვეიცარიაში შეკრებაზე მყოფ გუნდს.

15:48 კევინ გამეირო, დიდი ალბათობით, "ატლეტიკოს" "ვალენსიაზე" გაცვლის. ჟურნალისტმა ჯანლუკა დი მარციომ დაწერა, რომ კლუბები ახლოს არიან გარიგებასთან. ტრანსფერის თანხაა - 18 მილიონი ევრო.

16:00 "არსენალის" ფორვარდი ლუკას პერესი "ვესტ ჰემში" გადადის, - იტყობინება Sky Sport.

16:05 ედენ აზარი უბრუნდება "ჩელსიში" ვარჯიშებს და არსად წავა. Het Laatse News -ის ცნობით, "რეალი" ამ ზაფხულს ნამდვილად არ იყიდის ბელგიელს.

16:29 "მარსელი" შეეცდება იჯარით აიყვანოს "პორტუს" ნახევარმცველი მიკელ აგუ. ამ ფეხბურთელმა გასული სეზონი თურქეთის "ბურსასფორში" გაატარა.

16:37 SomersetLive-ს მიაჩნია, რომ ჯონ ტერი კარიერას გააგრძელებს მეორე ლიგის "იეოვილში". იქ მისი ძმა მუშაობს.

16:42 "ლოკომოტივი" დაინტერესებულია "ბარსელონას" ფორვარდ მუნირ ელ-ჰადადით.

16:45 ოფიციალურად! აქსელ ვიტსელი ნამდვილად ითამაშებს "დორტმუნდში". ამის შესახებ დაწერა კლუბის ოფიციალურმა "ტვიტერმა". ფეხბურთელთან კონტრაქტი 2022 წლის ბოლომდე გაფორმდება. გერმანელებმა ბელგიელში 20 მილიონი ევრო გადაიხადეს. ვიტსელი სეზონში 10 მილიონ ევროს გამოიმუშავებს.

16:45 ბერნარდი უფრო მეტად "მილანს" სჭირდება, - მიაჩნია ჩალციომერცატო-ს. დღის პირველ ნახევარში გაჩნდა ინფორმაცია, რომ ბრაზილიელის "ინტერიც" არის დაინტერესებული. "მილანი" მზად არის შესთავაზოს ბერნარდს სამწლიანი კონტრაქტი და 3.5 მილიონი ევროს ოდენობის ხელფასი.

17:10 ლეონ ბეილიმ ინტერვიუში განაცხადა, რომ არ არის დარწმუნებული - გააგრძელებს თუ არა მომავალ სეზონში "ლევერკუზენში" თამაშს. იამაიკელი ფეხბურთელით ინტერესდებიან - "ჩელსი", "რომა" და "ლივერპული".

17:26 ოფიციალურად! "ჩელსის" ფეხბურთელი, ამერიკელი მეტ მიაზგა, რომელსაც ჯონ ტერის მემკვიდრედ მიიჩნევდნენ, იჯარით ფრანგულ "ნანტში" წავიდა.

17:41 "ვალენსიას" ფორვარდმა როდრიგომ, შესაძლოა, უკვე ამ ზაფხულს შეიცვალოს კლუბი. ესპანური გუნდის ხელმძღვანელობამ გამოაცხადა, რომ ფეხბურთელის შეძენის მსურველებმა 120 მილიონი ევრო უნდა გაამზადონ.

17:50 Daily Express იუწყება, რომ აარონ რემზიმ უარი თქვა კვირაში 300 ათას ფუნტსა და "არსენალთან" ახალ კონტრაქტზე. შეგახსენებთ, რომ უელსელით დაინტერესებულია "ბარსელონა", "ჩელსი" და სხვა კლუბები.

18:14 ოფიციალურად! "ბლექბერნმა" ოთხი წლით გაიფორმა "ნიუკასლის" ფორვარდი ადამ არმსტრონგი. გასული წელი 21 წლის ფეხბურთელმა სწორედ "როვერსში" გაატარა იჯარით. გარიგებით თანხაა - 1 900 000 ევრო.

18:23 ოფიციალურად! "ასტონ ვილამ" განაახლა ურთიერთობა "მანჩესტერ იუნაიტედის" მცველთან აქსელ ტუანზებესთან. შარშან ამ ფეხბურთელმა იჯარით ითამაშა ბირმინგემელთა რიგებში.

18:39 ნიკოლა კალინიჩი "მილანიდან" "ატლეტიკოში" გადავა. ხორვატმა, რომელსაც არ გამოუვიდა "როსონერიში" თამაში, მადრიდში კევინ გამეიროს შეცვლის.

18:47 France Football-მა დაწერა, რომ ნაბილ ფეკირით "ჩელსის" ახალი მთავარი მწვრთნელი მაურიციო სარი დაინტერესდა.

18:52 აქსელ ვიტსელს "დორტმუნდში" 28-ე ნომერი მისცეს.

19:09 რუბენ ლოფტუს-ჩიკი იჯარით "კრისტალ პალასში" წავიდა. ამის შესახებ დაწერა პრემიერლიგის ოფიციალურმა ვებგვერდმა.

19:16 25 წლის ხორვატმა მცველმა ბორნა ბარიშიჩმა სამედიცინო შემოწმება გაიარა და დაასრულა გადასვლა "ოსიეკიდან" "რეინჯერსში".

19:27 "ტოტენჰემი" ფიქრობს "სელტას" ნახევარმცველის სტანისლავ ლობოტკას ტრანსფერზე. ფეხბურთელის ფასი 35 მილიონი ევროა.

19:38 "კრისტალ პალასი" დაინტერესებულია "ზალცბურგის" ისრაელელი ფორვარდით მოანეს დაბურით.

19:48 ოთხშაბათს ან ხუთშაბათს გაიმართება ფლორენტინო პერესისა და ლუკა მოდრიჩის შეხვედრა. ისინი განიხილავენ ხორვატის მომავალს "რეალში" და სავარაუდო ტრანსფერს მილანის "ინტერში", - წერს ჯანლუკა დი მარციო.

20:30 ოფიციალურად! "მონპელიემ" დაადასტურა ჟერომ რუსიიონის წასვლა "ვოლფსბურგში". 25 წლის ფრანგი ბუნდესლიგაში სულ რაღაც 5 მილიონ ევროდ ითამაშებს.

20:46 "ფულჰემმა" ახალი სეზონისთვის მორიგი შენაძენი გააკეთა - "არსენალიდან" იჯარით აიყვანა კალუმ ჩემბერსი, - წერს Mirror.

20:55 Mundo Deportive -ს ინფორმაციით, "ჩელსი" უახლოეს ხანებში გამოისყიდის "ატლეტიკოს" მეკარე იან ობლაკს. სლოვენიელის გასაყიდი თანხაა - 100 მილიონი ევრო.

21:19 გაჩნდა ვიდალის "ბარსელონაში" ტრანსფერის საბოლოო დეტალები. კატალონური კლუბის ვიცე-პრეზიდენტის ჟორდი მესტრეს ინფორმაციით, 31 წლის ჩილელმა სამწლიანი კონტრაქტი გააფორმა, ხოლო ხელშეკრულებაში მის გასაყიდ თანხად ჩაიწერა - 300 მილიონი ევრო. "ბარსამ" ფეხბურთელი 18 მილიონ ევროდ შეიძინა.

21:26 London Evening Standard -ის ცნობით, "არსენალი" მზად არის მოისმინოს წინადადებები დენი უელბეკის შეძენაზე. შესაძლო პრეტენდენტთა სიაში არიან - "ბორნმუთი", "საუთჰემპტონი" და "ევერტონი".

21:38 The Telegraph  წერს, რომ ტიბო კურტუა არ დაბრუნდა "ჩელსის" რიგებში და არც მიზეზები აუხსნია. როგორც ჩანს, "რეალი" სულ უფრო ახლოსაა.

21:44 "მარსელმა" და "სენტ ეტიენმა" 7.5 მილიონ ევროდ მოილაპარაკეს რემი კაბელიას გადასვლაზე.

21:49 ოფიციალურად! "ნიუკასლმა" "ვესტ ბრომვიჩიდან" გადაიბირა სოლომონ რონდონი. გარიგებით დეტალები უცნობია.

21:51 "ჩელსი" შეიძენს ჯეკ ბატლენდს, რომელმაც უნდა შეცვალოს ტიბო კურტუა. ბელგიელის "რეალში" გადასვლა თითქმის გადაწყვეტილია, მით უმეტეს, გავრცელდა მისი ესპანეთში გადაღებული ფოტო.

ყოველდღიური სპორტული გაზეთი "ლელო"
1131
მკითხველის კომენტარები / 0 /
მსგავსი ამბები
რუბრიკის სხვა სიახლეები
;