ტრანსფერ-ONLINE: 'რეალი' დიდ გეგმებს ამზადებს, 'ბარსელონა' ნეიმარს ელაპარაკება

13:16. რიშედლი ბაზური “ვოლფსბურგიდან” “უტრეხტში” გადავიდა. 22 წლის ნახევარმცველის საიჯარო ხელშეკრულება სეზონის ბოლომდეა ძალაში.

13:23. ლიბერიის პრეზიდენტ ჟორჟ ვეას ვაჟი ტიმოტი ვეა ნახევარი წლით “პარი სენ-ჟერმენიდან” “სელტიკში” გადავიდა. ამერიკელი უკვე შეუერთდა შოტლანდიის ჩემპიონს დუბაიში მიმდინარე შეკრებაზე.

13:40. “არსენალის” სომეხ ნახევარმცველს ჰენრიხ მხითარიანს კლუბის შეცვლას უწინასწარმეტყველებენ. ფეხბურთელი განიხილავს ტრანსფერის შესაძლებლობას იმ შემთხვევაში, თუ ლონდონური კლუბი შეიძენს დენის სუარესს, - წერს The Sun. ადრე “არსენალის” ხელმძღვანელობა აცხადებდა, რომ მზად არის, “ბარსელონას” ფეხბურთელში 15.6 მილიონი ევრო გადაიხადოს.

14:02. ფრენკი დე იონგის მომავალი 12 იანვარს გაირკვევა. “აიაქსის” ფეხბურთელთან და მის აგენტთან კავშირი კვლავაც “ბარსელონას” აქვს.

14:13. Metro დარწმუნებულია, რომ იანიკ კარასკო დატოვებს ჩინეთს. ბელგიის ნაკრების 25 წლის ნახევარმცველით დაინტერესებულნი არიან “მანჩესტერ იუნაიტედი” და “არსენალი”. ფეხბურთელი უფრო კარიერის გაგრძელების ლონდონური ვარიანტისკენ იხრება. ტრანსფერის სავარაუდო ღირებულებად 20 მილიონ ევროს ასახელებენ.

14:30. გაჩნდა დღის პირველი ინფორმაცია მადრიდის “რეალის” ინტერესების შესახებ. “სამეფო კლუბს” უკვე ამ ზამთარს აინტერესებს “ჯენოადან” კშიშტოფ პიონტეკის იჯარა.

14:58. ტიმო ვერნერის პიროვნება უკვე დიდი ხანია აინტერესებთ ტოპ-კლუბებს, მაგრამ Bild-ის აზრით, ყველაზე ახლოს “ლაიპციგის” ფორვარდის ტრანსფერთან “ბაიერნი” და “დორტმუნდი” არიან.

15:10. მსოფლიოს ჩემპიონის, საფრანგეთის ნაკრების ძირითადი მარცხენა მცველი ლუკა ერნანდესი დარჩება მადრიდის “ატლეტიკოში”, იმის მიუხედავად, რომ მის მიმართ დაინტერესებას გამოთქვამს “ბაიერნი”. ესპანელები მზად არიან შესთავაზონ მოთამაშეს ახალი სამწლიანი კონტრაქტი, - იტყობინება EstadioTVE. ადრე გერმანული კლუბი “ატლეტიკოს” 80 მილიონ ევროს სთავაზობდა - ეს “ბაიერნის” რეკორდია.

15:22. AS-მა გაავრცელა კიდევ ერთი ჭორი მადრიდის “რეალის” სავარაუდო ტრანსფერების შესახებ. ესპანურ გამოცემაში დარწმუნებულნი არიან, რომ ზაფხულში ფლორენტინო პერესი კრისტიან ერიქსენის შეძენას შეეცდება. დანიელი ფეხბურთელის კონტრაქტი 2020 წლის ზაფხულში იწურება, ამიტომაც “ტოტენჰემი”, რომელიც 250 მილიონ ევროს ითხოვს, უარს არ იტყვის მოლაპარაკებებზე. ზოგიერთი წყაროს ინფორმაციით, ტრანსფერის თანხა 112 მილიონი ევრო იქნება.

15:35. “საუთჰემპტონის” ახალ ბოსს რალფ ჰაზენჰიუტლს სურს “ევერტონის” ახალგაზრდა ფორვარდის ადემოლა ლუკმანის გადაბირება. მწვრთნელი ამ ფეხბურთელზე მაშინაც ნადირობდა, როცა “ლაიპციგს” ავარჯიშებდა, მაგრამ მაშინ ინგლისელებმა უარი თქვეს 22-მილიონიან წინადადებაზე.

15:47. “ბორდოს” 22 წლის გვინეელი ფორვარდი ფრანსუა კამანო სასწრაფოდ დასჭირდა ტიერი ანრის. L’Equipe-ის ინფორმაციით, “მონაკო” მოთამაშეში 15 მილიონ ევროს სთავაზობს. “ბორდო”, ჯერჯერობით, 20 მილიონს ითხოვს. ამ სეზონში კამანომ 17 მატჩი ჩაატარა და რვა გოლი გაიტანა.

16:02. ორშაბათს, დღის მეორე ნახევარში Don Balon-მა გამოაქვეყნა ინფორმაცია, რომ “რეალის” პრეზიდენტი ფლორენტინო პერესი უახლოესი 24 საათის განმავლობაში ჩაიყვანს “სანტიაგო ბერნაბეუზე” ედენ აზარს.

16:09. “ბაიერნმა” შესთავაზა “ჩელსის” საჭირო 39 მილიონი ევრო კალუმ ჰადსონ-ოდოისთვის.

16:18. Evening Standard-ის ჟურნალისტი საიმონ ჯონსონი დარწმუნებულია, რომ სესკ ფაბრეგასის ტრანსფერის თანხა 11.16 მილიონ ევროს შეადგენს, ხოლო ესპანელი 3.5-წლიან კონტრაქტს გააფორმებს.

“ჩელსი” უკვე ეძებს ვეტერანი ფაბრეგასის შემცვლელს. მთავარი კანდიდატები არიან - პარედესი და ბარელა.

16:27. ზამთრის სატრანსფერო ფანჯრისას, ერთ-ერთი მნიშვნელოვანი ტრანსფერი შეიძლება გახდეს “ჩელსიში” ქარიმ ბენზემას გადასვლა. როგორც გამოცემა The Mirror წერს, “რეალის” თავდამსხმელი ალვარო მორატასა და ოლივიე ჟირუს ერთ-ერთი ალტერნატივა იქნება, აგრეთვე, შესაძლოა, გახდეს ნაწილი გარიგებისა, რომლის მიხედვითაც, ბელგიელი ედენ აზარი “რეალში” გააგრძელებს კარიერას.

16:45. ერთბაშად ორი წყარო - Catalunya Radio და Mundo Deportivo წერს იმის შესახებ, რომ “ბარსელონა” ამზადებს ტრანსფერს ნეიმარის დასაბრუნებლად. არსებული ინფორმაციით, “ბარსელონას” მოქმედი სკაუტი ბრაზილიაში ანდრე კიური ამ დღეებში შეხვდა ნეიმარის გარემოცვას - აგენტ პინი ზაჰავისა და ფეხბურთელის მეგობარს ალვარო კოსტას. მხარეებმა ამ შეხვედრაზე განიხილეს ფეხბურთელის შესაძლო დაბრუნება.

16:51. პორტუგალიელი ვეტერანი პეპე “პორტუს” ფეხბურთელი გახდა. კონტრაქტი ორწლიანია. პეპე 2004-07 წლებში თამაშობდა “დრაკონების” რიგებში.

17:14. Football Italia-ს მიაჩნია, რომ “კალიარის” ნახევარმცველი ნიკოლო ბარელა “ჩელსის” გარდა, “არსენალსაც” აინტერესებს. ამ ფეხბურთელისთვის ასევე იბრძვის “ნაპოლი”, რომელიც მზად არის, 45 მილიონი ევრო გადაიხადოს.

17:28. Sky Sports-ის ინფორმაციით, “სამპდორიამ” “საუთჰემპტონს” 12 მილიონ ევროდ შესთავაზა მანოლო გაბიადინი. ეს იქნება ნახევარწლიანი იჯარის თანხა, თუმცა, ინგლისური კლუბი ჯერ ფიქრობს.

17:37. ანტონიო კანდრევამ განაცხადა, რომ დარჩება “ინტერში” “ვესტ ჰემის” მხრიდან ინტერესის მიუხედავად. 31 წლის ფეხბურთელი აპირებს ძირითადი შემადგენლობისთვის ბრძოლას.

17:52. Sky Sports-ის ჟურნალისტი კავე სოლჰეკოლი წერს, რომ ბარელას ან პარედესის გადასვლა “ჩელსიში”, საბოლოოდ, უახლოეს კვირას შედგება.

18:04. როგორც Daily Mail იტყობინება, “ტოტენჰემის” ნახევარმცველი მუსა დემბელე ჩინეთის “ბეიჟინგ გოანში” გადავა. აზიური კლუბი მზად არის, 13 მილიონი ევრო გადაიხადოს.

18:11. “ტულუზას” 19 წლის უნივერსალი ჟან-კლერ ტოდიბო ამ სეზონის დასრულების შემდეგ გადავა “ბარსელონაში”. კონტრაქტი ოთხწლიანი იქნება, კატალონიელები ფეხბურთელს უფასოდ მიიღებენ, რადგან ფრანგს კონტრაქტი უმთავრდება.

18:27. პეტრ ჩეხი არ აპირებს “არსენალიდან” წასვლას. ჩეხს არ აწუხებს, რომ აღარ არის “მეთოფეთა” ძირითადი მეკარე.

18:32. მუნირი აღარ ითამაშებს “ბარსელონას” რიგებში. “ხეტაფესთან” მატჩის წინ, ერნესტე ვალვერდე დაელაპარაკა 23 წლის ესპანელს და გამოუცხადა, რომ ვეღარ ხედავს მას ძირითად შემადგენლობაში. უფრო ადრე, მუნირმა უარი თქვა “ბარსასთან” კონტრაქტის გაგრძელებაზე.

19:44. ინგლისურ პრესაში წერენ, რომ “ბაიერნს” არ მიუღია არანაირი თანხმობა “ჩელსისგან” კალუმ ჰადსონ-ოდოის ტრანსფერზე.

20:06. ცნობილი ჟურნალისტის ჯანლუკა დი მარციოს ვებგვერდი გვამცნობს, რომ ალენ ჰალილოვიჩი მორიგ ახალ კლუბში გადავა. 22 წლის ხორვატს ელოდება “ბეშიქთაში”.

20:21. “კრუზეიროს” 18 წლის მეკარე გაბრიელ ბრაზაო “არსენალსა” და “მანჩესტერ იუნაიტედს” მოუნდათ. უფრო ადრე, ამ ფეხბურთელით დაინტერესება გამოთქვეს “ინტერმა” და “რომამ”, რომლებიც მზად არიან 2.5 მილიონი დახარჯონ.

20:33. “პორტუს” ნახევარმცველი ექტორ ერერა, დიდი ალბათობით, ამ სეზონის შემდეგ დატოვებს პორტუგალიურ კლუბს. მექსიკის ნაკრების 28 წლის ფეხბურთელი ზაფხულში თავისუფალი აგენტი გახდება. ერერათი დაინტერესებულნი არიან “რომა”, “მილანი” და “ინტერი”.

20:41. “შალკეს” დაცვის ხაზის გაძლიერება “იანგ ბოიზის” მცველის კევინ მბაბუთი სურთ. 23 წლის შვეიცარიელის ღირებულება 9.5 მილიონი ევროა.

20:48. ალვარო მორატა “ჩელსიდან” “სევილიაში” გადავა. ესპანური კლუბი დაინტერესებულია იჯარით, რომლის ღირებულებაა 5.58 მილიონი ევრო.

21:02. ჯანლუკა დი მარციომ დაწერა, რომ ვალტერ ბირსამ სამედიცინო შემოწმება გაიარა, რათა “კიევოდან” “კალიარიში” გადავიდეს.

21:27. “უოტფორდიდან” “უდინეზეში” ნახევარი წლით გადავიდა სტეფანო ოკაკა-ჩუკა. ფეხბურთელს 9 იანვარს წარადგენენ.

21:33. ჯენარო გატუზომ დაბლოკა “ლაიპციგში” ჰაქან ჩალჰანოგლუს ტრანსფერი.

21:39. “შახტარი” შემადგენლობას შეავსებს 19 წლის ისრაელელი ნახევარმცველით მანორ სოლომონით. ფეხბურთელმა უკვე დატოვა ფეთაჰ-თიქვას “მაკაბი”. უკრაინის ჩემპიონი ექვს მილიონ ევროს გადაიხდის. კონტრაქტი ოთხწლიანი იქნება.

21:45. დიეგო სიმეონეს უმცროსმა ვაჟმა ჯანლუკა სიმეონემ კონტრაქტი გააფორმა ლა-პლატას “ხიმნასიასთან”. 20 წლის ფორვარდი ამ კლუბში 2021 წლამდე დარჩება.

21:47. France Football-მა დაწერა, რომ “მანჩესტერ იუნაიტედს” სურს კალიდუ კულიბალის შეძენა ზამთრის სატრანსფერო ბაზრისას. “ნაპოლი” არ აპირებს 27 წლის სენეგალელის 100 მილიონ ევროზე ნაკლებ ფასად გაშვებას.

ყოველდღიური სპორტული გაზეთი "ლელო"
816
მკითხველის კომენტარები / 0 /
მსგავსი ამბები
რუბრიკის სხვა სიახლეები
;