ტრანსფერ-ONLINE: 'რეალმა' თვალი დიბალას დაადგა, კეინს მალკომით შეცვლია, პერისიჩი 'ინტერიდან მიდის, მორატა 'ატლეტიკოშია'

13:05 „აიაქსისა“ და ჰოლანდიის ნაკრების ნახევარმცველი ფრენკი დე იონგი იმდენად ძლიერად აინტერესებს „ბარსელონას“, რომ კატალონელები მზად არიან 80 მილიონი გადაუხადონ ამსტერდამელებს, ხოლო ფეხბურთელს წელიწადში 16 მილიონი ევრო დაუნიშნონ. (Catalunya Radio)

13:07 „იუვენტუსის“ ფორვარდი პაულო დიბალა „რეალის“ მთავარი სამიზნეა ზაფხულის სატრანსფერო ბაზარზე. მადრიდელები უკვე ამზადებენ 102 მილიონ ევროს 25 წლის არგენტინელისთვის. (The Sun)

13:10 ოთხშაბათს, მარიო ბალოტელი სამედიცინო შემოწმებას გაივლის „მარსელში“. „ნიცას“ მიერ დაწუნებული ფეხბურთელი „ვესტ ჰემს“ არ უნდა. (Sky Sports)

13:15 გონსალო იგუაინი ოთხშაბათს ჩავა ლონდონში „ჩელსისთვის“ სამედიცინო შემოწმების გასავლელად. „მილანმა“ უკვე გადაიბირა კშიშტოფ პიონტეკი და უპრობლემოდ უშვებს არგენტინელს. (Sky)

13:17 პატრიკ გროშოვსკი შეიძლება „ვესტ ჰემში“ გადავიდეს. ლონდონელებმა გაძლიერება „პლზენის“ ფორვარდის სახით იპოვეს. ამ ფეხბურთელს მიმდინარე სეზონში „ბერნაბეუზე“ აქვს გატანილი „რეალისთვის“. ფასი ხუთი მილიონი ევროა. (Mirror)

13:26 იდრიას გუეიე ერთ ნაბიჯშია „პარი სენ-ჟერმენში“ გადასვლასთან. „ევერტონი“ 40 მილიონ ევროს ითხოვს, თუმცა, უფრო რეალური თანხა - 25 მილიონია. პარიზელები მზად არიან გააფორმონ ოთხწლინახევრიანი კონტრაქტი. (L’Equipe)

13:29 „დორტმუნდმა“ მოლაპარაკებები დაიწყო უილფრიდ ზაჰას წარმომადგენლებთან. გერმანელები „კრისტალ პალასში“ კრისტიან პულიშიჩის შემცვლელს ხედავენ.
13:37 „მანჩესტერ იუნაიტედმა“ დაბლოკა ნებისმიერი მოლაპარაკებები „არსენალთან“ ერიკ ბაილისთან დაკავშირებით. ლონდონელებს მცველის იჯარით აყვანა უნდოდათ. (Daily Mail)

13:46 „რეალი“ და „მანჩესტერ იუნაიტედი“ ებრძვიან ერთმანეთს „პორტუს“ ფეხბურთელის ედერის გამო. ინგლისელებს იმედი აქვს, რომ ედერს ზაფხულში 48 მილიონ ევროდ გამოისყიდიან. ჯერი მადრიდელებზეა. (Daily Mail)

13:51 „იუვენტუსი“ ახლოს არის მორიგ იაფ, მაგრამ მნიშვნელოვან გარიგებასთან. „არსენალი“ მიჰყიდის ტურინელებს აარონ რემზის სულ რაღაც 11 მილიონ ევროდ, თუ თავად მოახერხებს ხამეს როდრიგესისა და დენის სუარესის იჯარით აყვანას. უელსელი უკვე „იუვენტუსის“ ფეხბურთელია - ოღონდ, იჯარით სეზონის ბოლომდე. (Independent)

14:04 ალვარო მორატა სამედიცინო შემოწმებას გაივლის „ატლეტიკოში“. მადრიდელები იჯარით აიყვანენ ესპანელს და მისი 55 მილიონ ევროდ გამოსყიდვის უფლება ექნებათ. (Daily Mail)

14:10 ალანი უკვე მზად არის „პარი სენ-ჟერმენში“ გადასასვლელად. „ნაპოლი“ მოთამაშისთვის 120 მილიონს ითხოვს, პარიზელები 80 მილიონს იხდიან.

14:15 „მანჩესტერ იუნაიტედი“ იბრძვის „ლაიპციგის“ სპორტული დირექტორისთვის პოლ მიტჩელისთვის. „იუნაიტედმა“ ისტორიაში პირველად გამოაცხადა ამ ვაკანსიის შესახებ და სწორედ ამ ჩინოვნიკის დაქირავება უნდა.

14:30 მარსელომ განუცხადა ფლორენტინო პერესს, რომ „რეალის“ დატოვება უნდა. ბრაზილიელი დათანხმდა კრიშტიანო რონალდოს რჩევას იტალიაში გადასვლასთან დაკავშირებით. მარსელომ უთხრა პერესს, რომ თუ „იუვენტუსი“ წინადადებით მიმართავს, მას სურს ამ შანსის გამოყენება. (Tuttosport)

14:40 „ინტერი“ გაყიდის ივან პერიშიჩს 40 მილიონ ევროდ. ხორვატით დაინტერესებულნი არიან „ატლეტიკო“ და „მანჩესტერ იუნაიტედი“. (AS)

14:50 „მანჩესტერ იუნაიტედის“ ყოფილი მთავარი მწვრთნელი ჟოზე მოურინიო „პარი სენ-ჟერმენის“ პრეზიდენტს შეხვდა. პარიზული კლუბი უკვე განიხილავს თომას ტუხელის შეცვლის ვარიანტებს, თუ გუნდი ვერ გავა ჩემპიონთა ლიგის მეოთხედფინალში.

15:02 „მანჩესტერ სიტი“ პრეტენზიას აცხადებს „აიაქსის“ ცენტრალურ მცველზე მატეის დე ლიგტზე. პეპ გვარდიოლას გუნდის კონკურენტები არიან „რეალი“, „ბარსელონა“ და პსჟ. (tribalfootball.com)

15:06 „მონაკოს“ მცველი ანტონიო ბარეკა, შესაძლოა, „ნიუკასლში“ გადავიდეს. ინგლისური კლუბი შეეცდება ფეხბურთელის 11 მილიონ ევროდ წაყვანას. (Sky Italia)

15:25 სანამ „რეალი“ ამზადებს 102 მილიონ ევროს დიბალასთვის, მადრიდელებს კონკურენტი გამოუჩნდათ. კერძოდ, „სიტი“ ცდილობს არგენტინელის „ეტიჰადზე“ გადაბირებას. შესაძლოა, ზაფხულში მანჩესტერული კლუბი კუნ აგუერომ დატოვოს. (Sun Sport)

15:40 „რომა“ მთავარი პრეტენდენტია „ბრეშიას“ 18 წლის ნახევარმცველ სანდრო ტონალიზე, რომელსაც ახალ პირლოს ეძახიან. რომაელებმა აჯობეს „იუვენტუსს“, „მილანს“, „ჩელსის“, „ინტერსა“ და „არსენალს“. (Sportitalia)

15:48 მხოლოდ „ბაიერნს“ არ სურს „ჩელსის“ ნახევარმცველის კალუმ ჰადსონ-ოდოის გადაბირება. „ლივერპული“ ჩაერთო 18 წლის ბიჭისთვის ბრძოლაში და მხარეებმა მოლაპარაკებებიც გამართეს. კალუმის კონტრაქტი „ჩელსისთან“ კიდევ წელიწადნახევარია ძალაში. (Bild)

16:05 „ნიუკასლი“ პრეტენზიას აცხადებს „ატლეტიკოს“ შემტევ ჟელსონ მარტინშზე. ინგლისურ კლუბს პორტუგალიელის იჯარით აყვანა სურს სეზონის ბოლომდე. (Mirror)

16:15 ოფიციალურად! „რედინგმა“ სეზონის ბოლომდე იჯარით აიყვანა „არსენალის“ მეკარე ემილიანო მარტინესი.

16:35 „ტოტენჰემს“, „საუთჰემპტონსა“ და „მანჩესტერ იუნაიტედს“ აინტერესებთ „ლიდსის“ 18 წლის ფეხბურთელი. ჯეკ კლარკი - გარემარბია, რომელმაც 13 მატჩში ორი გოლი გაიტანა და ამდენივე პასი შეასრულა. (Sky)

16:45 „ნიცამ“ მარიო ბალოტელის შემცვლელი „რეინჯერსში“ იპოვა. ფრანგები ცხრა მილიონ ევროს იხდიან ალფრედო მორელოსში. ასეთ დაბალ თანხას სტივენ ჯერარდმა საკუთარი ფეხბურთელის მიმართ უპატივცემულობა უწოდა. მორელოსი წელიწადნახევრის წინ, 1.2 მილიონ ევროდ იყიდეს ჰიკ-ისგან. ამ სეზონში მას 34 მატჩში 20 გოლი და 10 საგოლე პასი აქვს. (Daily Record)

17:25 „პარი სენ-ჟერმენმა“, შესაძლოა, შემადგენლობა ევროპის ჩემპიონით შეავსოს. პარიზელებმა მოლაპარაკებები დაიწყეს „ბაიერნთან“ რენატო სანჩესთან დაკავშირებით.

17:30 მაურო იკარდი მალე ახალ კონტრაქტს გააფორმებს „ინტერთან“. მილანელთა კაპიტნის ხელფასი წელიწადში შვიდ მილიონამდე გაიზრდება.

17:32 ჩაიშალა დენის სუარესის გადასვლა „არსენალში“. ლონდონელებს სურდათ იჯარა გამოსყიდვის უფლებით, „ბარსელონას“ - აუცილებელი გამოსყიდვა 20-25 მილიონად. (ESPN)

18:01 ჯოშ მაია ახლოს არის „სანდერლენდიდან“ „ბორდოში“ გადასვლასთან. გარიგების თანხაა ოთხი მილიონი ევრო. მაიამ ამ სეზონში 16 გოლი გაიტანა და უარყო ინგლისური კლუბის ახალი კონტრაქტი. (Sky Sports)

18:13 ოფიციალურად! „შახტარმა“ კონტრაქტი გააფორმა „ალექსანდრიას“ ცენტრალურ მცველთან ვალერი ბონდარენკოსთან. ხელშეკრულება ხუთი წელი იქნება ძალაში. ბონდარენკო შეცვლის იაროსლავ რაკიცკის, რომელიც „ზენიტში“ გადადის.

18:35 გონსალო იგუაინმა სამედიცინო შემოწმება გაიარა. არგენტინელი უკვე მივიდა „სტემფორდ ბრიჯზე“ კონტრაქტის გასაფორმებლად. (Sky Sports)

19:07 ოფიციალურად! „მარსელმა“ გამოაცხადა მარიო ბალოტელის ტრანსფერის შესახებ. იტალიელი „ნიცადან“ იჯარით გადავიდა ახალ კლუბში და იქ სეზონის ბოლომდე დარჩება. მარტო ამ გადასვლისთვის ბალოტელი ოთხ მილიონ ევროს მიიღებს. გარდა ამისა, გამოიმუშავებს 1.4 მილიონს ბონუსის სახით, თუ ზაფხულამდე 10 გოლს გაიტანს და სკანდალში არ გაეხვევა.

20:02 „ტოტენჰემმა“ იპოვა ჰარი კეინის შემცვლელი. ლონდონელები იმედოვნებენ, რომ ტრავმირებულ ფორვარდს „ბარსელონადან“ მალკომით შეცვლიან.

20:57 ლეანდრო პარედესი სულ მალე „პარი სენ-ჟერმენში“ აღმოჩნდება. არგენტინელი უკვე პარიზშია და კონტრაქტის გაფორმებისთვის მზადაა. „ზენიტი“ 45 მილიონ ევროს მიიღებს. (Paris United)

20:57 მეჰდი ბენატია შეხვდა „იუვენტუსის“ ხელმძღვანელობას მომავალი კარიერის განსახილველად. მასზე პრეტენზიას აცხადებენ „არსენალი“, „ფულჰემი“ და კლუბები ჩინეთიდან, საამიროებიდან და ყატარიდან.

21:23 ოფიციალურად! „ბარსელონამ“ გამოაცხადა „აიაქსის“ ნახევარმცველის ფრენკი დე იონგის ტრანსფერის შესახებ. ჰოლანდიელი კატალონიაში 2019 წლის ზაფხულში გადავა. დე იონგის კონტრაქტი 2024 წლის ზაფხულამდე იმოქმედებს.

23:35 ოფიციალურად! „ჩელსიმ“ გამოაცხადა, რომ გონსალო იგუაინი „იუვენტუსისგან“ („მილანშიც“ განათხოვრებული იყო) ნახევარწლიანი იჯარით გადაიყვანა. გარიგების თანახმად, „არისტოკრატები“ სეზონის ბოლოს იგუაინს 31.6 მილიონ ფუნტად გამოისყიდიან.

23:50 ოფიციალურად! კშიშტოფ პიონტეკი „მილანის“ ფეხბურთელი გახდა. „ჯენოა“ ამ გარიგებით 35 მილიონ ევროსა და ბონუსებს მიიღებს, 23 წლის პოლონელი კი, კონტრაქტის მიხედვით, „როსონერიში“ 2023 წლის 30 ივნისამდე უნდა დარჩეს.

ყოველდღიური სპორტული გაზეთი "ლელო"
820
მკითხველის კომენტარები / 0 /
მსგავსი ამბები
რუბრიკის სხვა სიახლეები
;