ტუზი დაგვეცა: შევაფასოთ ჩვენი შანსები ევროტურნირებზე

უკვე ვიცით იმ კლუბების ჩამონათვალი, რომლებიც ჩემპიონთა და ევროპალიგის პირველ საკვალიფიკალიფიკაციო ეტაპზე ერგოთ მეტოქეებად ქართულ გუნდებს.

რა თქმა უნდა, დღეს ჩვენი საკლუბო ფეხბურთი ისეთ დღეშია, შორსმიმავალი დასკვნებისგან თავი უნდა შევიკავოთ, მაგრამ ფაქტია ისიც, რომ გვარიანი ტუზი დაეცათ ჩვენს გუნდებს და ეს ის შანსია, რომელიც უთუოდ უნდა გამოვიყენოთ.

რა გვაძლევს ამის თქმის საშუალებას? ამაზე ქვემოთ ვილაპარაკოთ. ახლა კი მხოლოდ ზოგადად ვთქვათ, რომ ყველა ქართული გუნდისთვის წილისყრა გაცილებით მძიმეც შეიძლებოდა, ყოფილიყო...

საბურთალო შესასრულებელი მისია

მაშ ასე, მივყვეთ თანმიმდევრობით. საქართველოს ჩემპიონი “საბურთალოა”. სწორედ გიორგი ჭიაბრიშვილის მიერ გაწვრთნილი გუნდი წარადგენს საქართველოს ევროპის უმთავრეს საკლუბო ტურნირზე და ჩვენც მისით დავიწყოთ.

სელტიკი (შოტლანდია), ყარაბაღი (აზერბაიჯანი), შერიფი (მოლდოვა), სლოვანი (სლოვაკეთი), დუდელანჟი (ლუქსემბურგი) - ეს იყო თბილისური კლუბის 5 სავარაუდო მეტოქე წილისყრის დაწყებამდე. ვფიქრობთ, შეგვხვდა ერთ-ერთი ყველაზე სასურველი მეტოქე. 

რაც მთავარია, აგვცდა ბოლო დროს დაღმართზე მყოფი, მაგრამ ევროპულ ფეხბურთში ძალიან გამოცდილი “სელტიკი” (თუმცა ჭიაბრიშვილმა კი თქვა, “სელტიკთან” გვერჩივნა შეხვედრაო). ალბათ, უფრო სასურველი იყო თამაში ლუქსემბურგულ “დუდელანჟთან”, მაგრამ ესეც საკითხავია. კარგად გვახსოვს - წინა სეზონში “დუდელანჟი” ევროპალიგის ჯგუფურ ეტაპზე გავიდა.

რა თქმა უნდა, “შერიფი” ძლიერი გუნდია. ის სისტემატურად არის მოლდოვის ჩემპიონი და სხვა თუ არაფერი, ევროპალიგაზე ასპარეზობის დიდი გამოცდილება აქვს. მისთვის უცხო არც ევროტურნირების ჯგუფში თამაშია, მაგრამ შანსი გვაქვს და ამის უარყოფა შეუძლებელია.

ჩვენი აზრით, ერთადერთი ფაქტორი, რაშიც “შერიფი” მნიშვნელოვნად აღემატება საქართველოს ჩემპიონს, ესაა მისი დიდი ევროპული გამოცდილება. შემადგენლობის თვალსაზრისით კი წლევანდელი “შერიფი” შარშანდელზე სუსტია. 

ორი აზრი არ არის, “ტორპედო” შარშან ეთამაშა "შერიფს" და ჩვენს ჩემპიონს უფრო ძლიერი გუნდი დაუპირისპირდა, მაგრამ აქ გასათვალისწინებელია ერთი მნიშვნელოვანი ფაქტორიც - წლეულს ევროთასებამდე დარჩენილ დროში “შერიფი” უსათუოდ გააძლიერებს შემადგენლობას და ამაში არც “საბურთალო” უნდა ჩამორჩეს. როგორც ვიცით, საამისო სურვილიც არსებობს და რეალური შანსიც.

შერიფი” არ არის დაუმარცხებელი გუნდი, მაგრამ მის ძალაზე ნათლად მეტყველებს ერთი ფაქტი: საქართველოს ეროვნული ჩემპიონატის გამორჩეული ფეხბურთელი, გორის “დილას” ყოფილი ლიდერი ლეანდრო რიბეირო არაერთი ჩვენი გუნდისთვის იყო სასურველი, მაგრამ მან კარიერა “შერიფში” გააგრძელა. სხვანაირად რომ ვთქვათ, “შერიფმა” შეძლო ის, რაც ვერ შეძლეს ქართულმა კლუბებმა - დააკმაყოფილეს ფეხბურთელის ფინანსური მოთხოვნები.

დინამო თბ მოგება შინ და მოგება გარეთ!

თბილისისდინამო” ვალდებულია, ეს ბარიერი გაიაროს - არა უბრალოდ გაიაროს, არამედ, ეს დამაჯერებლად გააკეთოს, რაც გულისხმობს ორივე მატჩში გამარჯვებას (არ აქვს მნიშვნელობა მეტოქეს) და ბლომად გოლს. 

ტეუტა (ალბანეთი), ლა ფიორიტა (სან მარინო)/ენგორდანი (ანდორა) წყვილში გამარჯვებული, შიროკი ბრიეგი (ბოსნია), დუნაისკა სტრედა (სლოვაკეთი), კაუნო ჟალგირისი (ლიეტუვა) - ამ გუნდებიდან ერთ-ერთი უნდა შეხვედროდა საქართველოს ყველაზე ტიტულვან კლუბს.

საბოლოოდ, “დინამოს” ერგო “ლა ფიორიტა” (სან მარინო)/”ენგორდანის” (ანდორა) წყვილში გამარჯვებული. ვერაფერს იტყვი - მართლაც დიდებული ვარიანტია. ახლა “დინამოს” ცხოვრებაში ისეთი ხანა დგას, ხელაღებით ვერ იტყვი, რომ “დუნაისკა სტრედასა” თუ “შიროკი ბრიეგის” ბარიერებს დაძლევდა...

ფაქტია, “დინამოს” სატრანსფერო პოლიტიკა უკეთესის სურვილს ტოვებს. გუნდი ისე ვერ ძლიერდება, როგორც საჭიროა, მაგრამ თუნდაც ეს რესურსი აბსოლუტურად საკმარისია იმისათვის, რომ გუნდმა პირველი ბარიერი დამაჯერებლად გაიაროს.

იმასაც ვისურვებდით, რომ ევროთასების დაწყებამდე “დინამოში” კიდევ გვეხილა ახალი მოთამაშეები. მაგალითად, ცენტრფორვარდისა და მეკარის პოზიციებზე. ეს აუცილებლად შეუწყობდა ხელს გუნდში კონკურენციის გაზრდას.

ჩიხურა საქმე ლაპარაკის ნაცვლად

სპარტაკ ტრნავა (სლოვაკეთი), ჟალგირისი (ლიეტუვა), ფოლა (ლუქსემბურგი), ალაშკერტი (სომხეთი), ოლიმპია (სლოვენია) - ეს გუნდები შეიძლებოდა შეხვედროდა სოსო ფრუიძის კრებულს და მადლობა ფორტუნას, რომ ამჯერადაც დაგვინდო - ალბათ, ყველაზე სუსტი მოწინააღმდეგე შეგვხვდა!

რა თქმა უნდა, ბოლო დროს ლუქსემბურგული ფეხბურთის პროგრესი თვალსაჩინოა. თქმა არ უნდა იმასაც, რომ შარშანდელი წარმატებული ევროოდისეის შემდეგ “ჩიხურა” რამდენიმე წამყვანმა ფეხბურთელმა დატოვა, მაგრამ, რატომღაც, გვჯერა, რომ ფრუიძე ისევ მოახერხებს ბრძოლისუნარიანი გუნდის შექმნას და, რატომღაც, იმისიც გვჯერა, რომ საჩხერული კლუბის რამდენიმე ფეხბურთელი თავს უკეთესად წარმოაჩენს, ვიდრე - საქართველოს ჩემპიონატის შეხვედრებში.

ჩიხურაში” მთავარი კაცი ფრუიძეა - ძალიან გამოცდილი და თავისებური მწვრთნელი, ვისაც ხშირად აუტსაიდერის როლში ყოფნა ურჩევნია, მაგრამ ძალიან კარგად იცის ფავორიტების გამწარება.

ამ შემთხვევაში “ფოლა” განთესილია, მაგრამ ფავორიტი მაინც ქართული კლუბი გვგონია. ფრუიძე კი ისევ არ ბაქიბუქობს და ეს ძალიან კარგია. ჩვენი აზრით, “ჩიხურას” შესწევს იმის ძალა, რომ ეს ბარიერი გაიაროს. დანარჩენი მინდორზე გამოჩნდება...

ტორპედო თუ შემადგენლობას 
შეინარჩუნებს...

ლეგია (პოლონეთი), ჰაიდუკი (ხორვატია), ცსკა სოფია (ბულგარეთი), რადნიჩკი (სერბეთი), ორდაბასი (ყაზახეთი) - ეს იყო ქუთაისის “ტორპედოს” სავარაუდო მეტოქეთა ჩამონათვალი. თუ არ ჩავთვლით სერბულ “რადნიჩკის”, ალბათ, ყველაზე სასურველი მეტოქე შეგვხვდა.

გავრისკავთ და ვიტყვით - თუ “ტორპედომ” შეძლო შემადგენლობისა და მოტივაციის შენარჩუნება, კაცმა არ იცის, რომელი გუნდი იქნება ამ წყვილში ფავორიტი. ამას რომ ვწერთ, “ორდაბასის” დადებითი მხარეები სულაც არ გვავიწყდება. 

არ გვავიწყდება უპირველეს ყოვლისა ის, რომ ამ გუნდს კახა ცხადაძე წვრთნის. არც ის, რომ შიმკენტელებს ჰყავთ კარგი ლეგიონერები, მაგრამ სადაც ერთ მხარეს “ორდაბასია” და მეორე მხარეს “ტორპედო”, იქ ქართული კლუბი უშანსოდ ვერაფრით იქნება.

ეს “ორდაბასი” ცხადაძის აწყობილია. ძალიან კარგია დაცვაში და შეტევაში ჰყავს მთავარი ხალხი, მაგრამ ქუთათურებს აშკარად შეუძლიათ ამ ბარიერის გადალახვა, ოღონდ... რა უნდა მოხდეს ამისთვის, ამაზე ზემოთ უკვე დავწერეთ. გუნდის ძირითადი ბირთვი უსათუოდ უნდა შენარჩუნდეს. ვნახოთ, რამდენად მოხდება ეს. წინააღმდეგ შემთხვევაში, ძალიან გაგვიჭირდება... 

ყოველდღიური სპორტული გაზეთი "ლელო"
2382
მკითხველის კომენტარები / 0 /
მსგავსი ამბები
რუბრიკის სხვა სიახლეები
;