უელსელთა მწვრთნელი: საქართველო უკეთესია, ვიდრე გგონიათ!

საქართველოს ნაკრები კარდიფში უელსის ნაკრებთან მატჩისთვის მზადებას განაგრძობს. "ბორჯღალოსნების", ისევე როგორც "წითელი ურჩხულების", საბრძოლო რაზმები ცნობილი დღეს საღამოს გახდება. იქამდე კი ჩვენი ნაკრები ბრიტანული მედიისგან უყურადღებობას არ უჩივის.

საქართველოსა და უელსის ნაკრებების დაპირისპირებაზე "წითელი ურჩხულების" დაცვის მწვრთნელმა შონ ედვარდსმა ილაპარაკა, რომელიც უელსის რაგბის კავშირის ოფიციალურმა ვებგვერდმა გამოაქვეყნა. გთავაზობთ ამონარიდს ამ პუბლიკაციიდან:

"უელსის ნაკრების დაცვის მწვრთნელმა შონ ედვარდსმა იცის, რომ საქართველოს ნაკრები შაბათის მატჩისთვის გაათკეცებული მონდომებით ემზადება და "პრინსიპალიტი სთედიუმზე" "წითელ ურჩხულებს" "შეასკდება". მან იცის, რომ უელსის ნაკრებს რთული ამოცანის გადაჭრა მოუწევს.

თუ მსოფლიოს თასის მატჩებს არ ჩავთვლით, უელსთან მატჩი საქართველოს ნაკრებისთვის, ალბათ, ყველაზე დიდი მოვლენაა ბოლო ათი წლის განმავლობაში. ისინი თავდაუზოგავად იბრძვიან, რათა ექვსი ერის კარი შეაღონ.

ქართველებმა კარგად იციან, რომ უელსის ნაკრებთან ღირსეული თამაში მათ ამბიციებს კიდევ უფრო საფუძვლიანს გახდის. ისინი ყველაფერს იღონებენ, რომ კარგად ითამაშონ.

ჩვენ ვიცით, რომ ქართველები მძიმე, მორკინალებით თამაშის მიმდევრები არიან. თუმცა, სინამდვილეში, ისინი უკეთეს რაგბის თამაშობენ, ვიდრე გგონიათ. მათი დაუფასებლობა არ შეიძლება.

საყოველთაოდაა ცნობილი, რომ მათი შერკინება ძალიან ძლიერია, კარგად აქვთ აწყობილი დერეფანში თამაში. ამით ყველაფერი არ მთავრდება: საქართველოს ნაკრების მგეზავი (#10, ლაშა ხმალაძე) კრეატიული მოთამაშეა, შუამარბი (#12, მერაბ შარიქაძე), მთასავითაა და ხშირად ჭრის მეტოქის ხაზს. ისინი სახიფათონი არიან ფეხით თამაშისასაც. ჩვენ მუდმივად ფხიზლად უნდა ვიყოთ. - თქვა შონ ედვარდსმა."

შეგახსენებთ, რომ საქართველოსა და უელსის ნაკრებების მატჩი შაბათს, "პრინსიპალიტი სთედიუმზე" თბილისის დროით 18 საათსა და 30 წუთზე დაიწყება.

(იბეჭდება მცირე ცვლილებით)
ყოველდღიური სპორტული გაზეთი "ლელო"
2964
მკითხველის კომენტარები / 0 /
მსგავსი ამბები
რუბრიკის სხვა სიახლეები
;