უელსი-საქართველო 13:6 - ომი, ფარსი და აღიარება [VIDEO]

"პრინსიპალიტი სთედიუმი" (ყოფილი მილენიუმი), შორიდან იალქნიან გემს გაგონებს. რაც უფრო უახლოვდები, მით უფრო მკვეთრად ხედავ მის სიდიადეს. მისი მომნუსხველი სილამაზე "უცხო ტომის მომხვდურზე" ერთგვარად დამთრგუნველადაც კი მოქმედებს.

სტადიონზე შესული კიდევ უფრო ბრწყინვალე სანახაობის მომსწრე შეიქნები. ვინც კი ერთხელ მოხვედრილა უელსის ნაკრების თუნდაც უმნიშვნელო მატჩზე, უნახავს "პრინსიპალიტის" ელვარება, შეუგრძნია იქაური აურა, ატმოსფერო, სამუდამოდ დაავადდება რაგბით.

ეს უელსის ნაკრების, "წითელი ურჩხულების" სახლია. უდიდესი ისტორიით, ტრადიციებითა და სარაგბო ფასეულობებით.

გადაჭედილი სტადიონი. ქომაგების ჟრიამული მატჩის, შესანიშნავი სანახაობის მოლოდინში. აგერ, გუნდებიც გამოდიან და მოედნის გარშემო ცეცხლი იფრქვევა. ეს "წითელი ურჩხულის" ცეცხლია. სანახაობა შთამბეჭდავია, მაგრამ...

როგორ არ მოდის ყოველივე ამასთან შესაბამისობაში ის, რაც უელსის ნაკრებმა, მისმა მწვრთნელთა შტაბმა "ბორჯღალოსნებთან" მატჩის მიწურულს ჩაიდინეს. უელსელებმა, ამ ბრძოლისუნარიანობითა და შეუდრეკელი ხასიათის მქონე ხალხმა, სარაგბო ეშმაკობას მიმართეს - მატჩის გადარჩენის მიზნით ტყუილი იკადრეს.

უელსი
13
საქართველო
6
უელსი: (15-9) ლ. უილიამსი (ბიგარი 56), ქათბერთი, ს. უილიამსი, უოტკინი, ეიმოსი, პრისთლენდი, ვები (ა. დევისი 57); (1-8) ნ. სმითი (ვ. ჯოუნზი 56), დეისი (დი 68) ბრაუნი (ფრენსისი 56) ბერდი, ჰილი, (ფალეტაუ 75) ლიდიატი, ქროსი (ნავიდი 41), სბ. დევისი (დეისი 8)
ლ: ეიმოსი; 2ს, გ: პრისთლენდი
სინბინი: ფრენსისი
საქართველო: (15-9) მათიაშვილი, კოშაძე (კვირიკაშვილი 75), კაჭარავა, შარიქაძე, მოდებაძე, ხმალაძე (ჯინჭველაშვილი 47), ლობჟანიძე (ბეგაძე 56); (1-8) ნარიაშვილი (ასიეშვილი 67), ბრეგვაძე (მამუკაშვილი 67), ჩილაჩავა (ბეკოშვილი 63), მიქაუტაძე, ნემსაძე (ჩხაიძე 66), ლომიძე, კოლელიშვილი (თხილაიშვილი 63), ბიწაძე
2ს: მათიაშვილი
მსაჯი: მატიო რეინალი (საფრანგეთი)

თამაში დასასრულს უახლოვდებოდა. საქართველოს ნაკრები მეტოქის ლელოს მისადგომებთან უტევდა და მატჩის ფრედ დასრულებისთვის იბრძოდა. რაკში თამაშისას შეცვლაზე შესულმა პირველხაზელმა თომას ფრენსისმა განზრახ ბინძურად ითამაშა და არბიტრმა ის სინბინში გაუშვა. "ბორჯღალოსნებმა" შერკინება მოითხოვეს. წესით, მეტოქეს შერკინებაში ყველა პირველხაზელი უნდა ჰყავდეს. ამიტომ, ნებადართულია უკვე შეცვლილი ბურჯის უკან მოედანზე დაბრუნება.

ლეონ ბრაუნი, უელსელთა პირველხაზელი, კიდესთან იდგა და მზად იყო, მოედანზე დაბრუნებულიყო, მაგრამ "წითელი ურჩხულების" მწვრთნელები შეშინდნენ. ჩვენს შერკინებას შეეძლო მეტოქე ლელოში შეეთრია და ეს მათ კარგად იცოდნენ. ამიტომ, მოიტყუეს და ბრაუნი მოედანზე არ შეუშვეს, აქაოდა, ტრავმირებულიაო.

მერე რაც მოხდა, ყველამ ნახა. ცხადია, მატჩის შემდეგ ამ თემაზე ორივე გუნდის მწვრთნელს დაუსვეს შეკითხვა. აი რა უპასუხა "ბორჯღალოსნების" თავკაცმა მილტონ ჰეიგმა:

"რა თქმა უნდა, შედეგი გულდასაწყვეტია. სულ რამდენიმე ქულა დაგვაკლდა, მაგრამ რაც არის, არის. ახლა ისღა დაგვრჩენია მომხდარს სწორი შეფასება მივცეთ. რაც შეეხება ბოლო წუთების მოვლენებს, დარწმუნებული ვიყავი, რომ შერკინებით ლელოს გავიტანდით. ამაში უელსელებიც დარწმუნებულნი იყვნენ. არ ვაპირებთ, რომ ამას მსვლელობა მივცეთ. არ ვაკნინებ მას, ვინც ასე მოიქცეოდა."

სამაგიეროდ, აღშფოთებას ვერ მალავს უელსის ნაკრების ქომაგთა უმრავლესობა. აი, რას წერს ერთ-ერთი მათგანი ერთ-ერთ ფორუმზე:

"მე ვარ უელსის მხარდამჭერი, მაგრამ ვერაფრით დავუჭერ მხარს ფარსს, თამაშის ბოლოს რომ იყო. როდესაც აგებ ან ფრედ თამაშობ, შენ ინარჩუნებ პატივისცემას. როდესაც თაღლითობით იგებ, ეს შემაძრწუნებელია. შენ თამაშობ, ცდილობ ბოლომდე და იღებ ნებისმიერ შედეგს. რაც დღეს საღამოს მოხდა, ეს იყო უდიდესი სირცხვილი. ვითხოვთ პასუხებს გეთლენდ და კომპანია".

რას ამბობს უორენ გეთლენდი? ცხადია, თავის მართლებას მოჰყვა:

"ჩვენც უხერხულად ვიგრძენით თავი. ლეონ ბრაუნი ტაქტიკური მოსაზრებით შევცვალეთ, თუმცა, ვიცოდით, რომ მას პრობლემები ჰქონდა. ყვითელი ბარათის შემდეგ მისი დაბრუნება ექიმმა აგვიკრძალა. შემიძლია დაგარწმუნოთ, რომ ჩვენი მხრიდან მანიპულაციას ადგილი არ ჰქონია".

ერთი სიტყვით, რაც უნდა მომხდარიყო, როგორც უნდა მოიქცეულიყო მეტოქე, ჩვენს გუნდს მატჩის გადარჩენის შანსი ჰქონდა და ეს ვერ გამოვიყენეთ. ცხადია, კარგია, რომ როგორც მწვრთნელი, ისე გუნდის კაპიტანი ამაში მხოლოდ საკუთარ თავს ადანაშაულებენ, მხოლოდ საკუთარ ნაკლოვანებებს ეძებენ. სწორედ ასეთი მიდგომაა წინსვლის საწინდარი.

კაცმა რომ თქვას, თამაშამდე თუნდაც ერთი წუთით ადრე, ვინმე იფიქრებდა, რომ მოვლენები ასე განვითარდებოდა? საქართველოს ნაკრები მეტოქეს ასეთ მედგარ წინააღმდეგობას გაუწევდა? ცხადია, არავინ! მაგრამ, ეს საერთო ჯამში მაინც არაფერს ნიშნავს.

კარგია, რომ მეტოქის ტემპმა არ დაგვღალა. პირიქით, მატჩის მიწურულს ისინი უფრო ჩანდნენ გასავათებულები. ფაზებიც ხშირად ავკინძეთ. ხელდახელ ბურთაობაც ვცადეთ, მაგრამ უმეტეს შემთხვევაში, წინსვლას ვერ ვახერხებდით. მეტოქეს ვაჯობეთ შერკინებაში, ორჯერ წამოვიღეთ მათი დერეფანი, როცა მათ ეს მხოლოდ ერთხელ შეძლეს. ჯარიმებიც მათზე ნაკლები ავიკიდეთ.

ერთი სიტყვით, ტოლ-სწორად ვებრძოლეთ და როგორც ბრიტანული Daily Mail წერს,

"წაგების მიუხედავად, საქართველოს მოთხოვნამ ექვსი ერის გათამაშებაში ჩართვაზე უფრო ხმამაღლა გაიჟღერა და მალე ეს ყვირილში გადაიზრდება."

მატჩის სტენოგრამა

მე-3 წუთი: საქართველოს ნაკრები პირველად დაჯარიმდა. უელსელთა ცხრა ნომერმა რის ვებმა საჯარიმო სწრაფად გაათამაშა და სახიფათოდ შეუტია.
მე-4 წუთი: "ბორჯღალოსნების" სასარგებლოდ პირველი შერკინება დაინიშნა.
მე-7 წუთი: საქართველოს ნაკრები რაკში თამაშისას დაჯარიმდა და უელსელთა მგეზავმა რის პრისთლენდმა საჯარიმო კარში დაარტყა. უელსელი ზუსტი იყო - 3:0.
მე-12 წუთი: უელსელებმა სახიფათო იერიში წამოიწყეს. გარემარბმა ალექს კატბერთმა ლელოშიც შეაღწია, მაგრამ "ბორჯღალოსნების" ცხრა ნომერმა ვასილ ლობჟანიძემ ბურთი არ დაამიწებინა.
21-ე წუთი: მასპინძლებმა დერეფნიდან ჯერ მოლი ააგორეს, მერე ბურთი მარცხნივ, გრძელ ფრთაზე ჩაათამაშეს და გარემარბმა ჰალამ ეიმოსმა ლელო გაიტანა. პრისთლენდმა გარდასახა - 10:0.
23-ე წუთი: საჯარიმო აუტში გადავიტანეთ და უელსის ნაკრები საკუთარ 22-მეტრიან ზონაში ჩავკეტეთ. "ბორჯღალოსნებმა" 19-ფაზიანი შეტევა განახორციელეს. ერთ მომეტში ბურთი რაკიდან ამოუვარდათ და უელსელებმა ლელო გაიტანეს, თუმცა ვიდეორეფერის გადამოწმების შემდეგ აღმოჩნდა, რომ მასპინძლებს ბურთი წინ გაუვარდათ.
27-ე წუთი: უელსელები შერკინებაში დაჯარიმდნენ და სოსო მათიაშვილმა ხელსაყრელი პოზიციიდან საჯარიმო ზუსტად დაარტყა - 3:10.
48-ე წუთი: "ბორჯღალოსნებმა" შერკინებაში კიდევ ერთხელ დაჩაგრეს მოწინააღმდეგე. უელსელები ისევ დაჯარიმდნენ და სოსო მათიაშვილმა საჯარიმო 40 მეტრიდან გაიტანა - 6:10.
წუთი წუთში
62-ე წუთი: საქართველოს ნაკრები არბიტრმა მაღალი ბოჭვისთვის დააჯარიმა. პრისთლენდმა, რომელმაც იქამდე რამდენიმე საჯარიმო აუტში გადაიტანა, იკადრა და კარში დაარტყა - 13:6.
71-ე წუთი: უელსელები საკუთარი ლელოდან ხუთ მეტრში დაჯარიმდნენ. "ბორჯღალოსნებმა" შერკინება მოითხოვეს. სამიდან ორში ისევ მასპინძლები დაჯარიმდნენ. მესამე ჯერზე კი, ზეწოლას შეცვლაზე შესულმა სოსო ბეკოშვილმა ვერ გაუძლო, შერკინებიდან ამოვარდა და დავჯარიმდით. ასე გადაგვირჩა ერთხელ უელსი ლელოს.
მე-80 წუთი: საქართველოს ნაკრების მორიგი იერიში. უელსელები ისევ საკუთარი ლელოს მისადგომებთან ჯარიმდებიან. არბიტრმა პირველხაზელი ტომას ფრენსისი გაასინბინა. წესით, ის უკვე შეცვლილ შერკინების ბურჯს უნდა შეეცვალა, მაგრამ... ბურთი აუტში გადავიტანეთ. მეტოქეს ისევ მივეძალეთ, თუმცა დავჯარიმდით და მატჩიც დასრულდა.

მატჩის შემდეგ
მილტონ ჰეიგი, საქართველოს ნაკრების მთავარი მწვრთნელი: "თავი ძალიან კარგად დავიცავით და შეტევაშიც კარგები ვიყავით. შერკინებაში ჩვენი დომინირება სიახლე არავისთვისაა. ბოლო წუთებში შეგვეძლო კარგი შედეგისთვის მიგვეღწია. შარშან შოტლანდიასთან მატჩის შემდეგ, ჩვენი თამაშის ხარისხი აშკარად გამოსწორებულია. ეს იყო მაღალი ტემპის შეხვედრა და ჩვენ ამ ტემპს ალღო სწრაფად ავუღეთ, რითაც კმაყოფილი ვარ. რაც უფრო მეტი ასეთი დონის შეხვედრა გვექნება, ჩვენი შედეგები მით უფრო გაუმჯობესდება...

თუ მოგვეცემა უკეთესი თამაშები, ჩვენც უკეთეს რაგბის ვითამაშებთ. ეს ჩვენი ისტორიის შემდგომი ფურცელია და წესით, ასეც უნდა გაგრძელდეს.

ჩვენს მშობლებს, ოჯახის წევრებს და, რაც მთავარია ქომაგებს, მთელ ქვეყანას ვაჩვენეთ, რომ ასეთ ტემპში თამაში შეგვიძლია. ეს მათ ჩვენით სიამაყის კიდევ ერთ შესაძლებლობას აძლევს. მერწმუნეთ, ჩვენს სამშობლოში ახლა ყველა ბედნიერი და ამაყია. შედეგით, რა თქმა უნდა, უკმაყოფილოები ვართ, მაგრამ ბიჭებმა სული და გული ჩადეს ამ თამაშში და გაიღეს ყველაფერი, რათა სამშობლოში მათით იამაყონ".

მერაბ შარიქაძე, საქართველოს ნაკრების კაპიტანი:
"თამაშის ბოლოს ვგრძნობდით, რომ მოგება შეიძლებოდა. პირველივე წუთებიდან, როდესაც მოედანზე გავედით, ვიცოდით, რომ არავისზე ნაკლები არ ვიყავით, განსაკუთრებით კანადასთან თამაშის შემდეგ. შეიძლება ითქვას, რომ დღეს ძალიან არ გაგვიმართლა და ბოლო შეტევები ლელოთი ვერ დავასრულეთ. ეს ჩვენი შეცდომის ბრალი იყო, რადგან ასეთი დონის თამაშების გამოცდილება გვაკლია.

მიმაჩნია, რომ რადაც უნდა დაგვიჯდეს, ასეთი დონის გუნდებს უფრო ხშირად უნდა ვეთამაშოთ. შარშან შოტლანდიას შევხვდით, ამ ზაფხულს არგენტინას, 3 წლის წინ ირლანდიას და პროგრესი სახეზეა. სასიცოცხლოდ მნიშვნელოვანია მეტი ასეთი თამაში. ვეცდებით, უელსს მსოფლიოზეც არაფერი დავაკლოთ".

მირიან მოდებაძე, საქართველოს ნაკრების გარემარბი: "ძალიან დიდი გამოცდილება მივიღე. ასეთ სტადიონზე, ასეთი გუნდის წინააღმდეგ აქამდე არასდროს მითამაშია. კანადასთან შედარებით უელსი ბევრად ძლიერი გუნდი იყო და ძალიან ბევრი რამ ვისწავლე".

ნოემბრის ტესტები
იაპონია-ტონგა 39:6
ნამიბია-ურუგვაი 36:52
ბელგია-ბრაზილია 14:23
რუმინეთი-სამოა 17:13
იტალია-არგენტინა 15:31
ინგლისი-ავსტრალია 30:6
ესპანეთი-კანადა 27:37
გერმანია-აშშ 17:46
შოტლანდია-ახ. ზელანდია 17:22
ირლანდია-ფიჯი 23:20
საფრანგეთი-ს. აფრიკა 17:18.

ყოველდღიური სპორტული გაზეთი "ლელო"
3194
მკითხველის კომენტარები / 0 /
მსგავსი ამბები
რუბრიკის სხვა სიახლეები
;