ბორჯღალოსნების მეტოქე: უელსს მორაგბეები ხელიდან ეცლება

უელსის ნაკრები ჩვენი ეროვნული გუნდის მეტოქეა 2019 წლის მსოფლიოს თასზე და ნოემბრის ტესტებზე. იქაურ რაგბიში კი სერიოზული ცვლილებები ხდება. უელსის რაგბის კავშირის გადაწყვეტილებით, იმ მორაგბეს, რომელსაც 60 კეპზე მეტი არ აქვს მოხვეჭილი და უცხოეთში თამაშობს, ეროვნულ ნაკრებში თამაშის უფელბა არ ექნება.

ასეთები კი ცოტანი არ არიან. წესით, უელსის ნაკრებში ვეღარ უნდა ითამაშონ ლიამ უილიამსმა, დებ ბიგარმა, ტომას ფრენსისმა და რის ვებმა. სავარაუდოდ, ამ უკანასკნელის გარდა, სხვა დანარეჩენი ვერც ნოემბრის ტესტებზე დაეხმარება უელსელთა გუნდს. ვები კი "ტულონში" მხოლოდ მომდევნო სეზონიდან გადადის.

"ეს ჩემთვის უდიდესი დარტყმაა. ვერც წარმომიდგენია, ეროვნულ ნაკრებში როგორ არ უნდა ვითამაშო. იმ დროისთვის, როცა "ტულონთან" კონტრაქტზე ხელი მოვაწერე, რაიმე მსგავსი თუ მოხდებოდა, ცხადია, არ ვიცოდი. მსგავსი რამის გაფიქრებაც არ შემეძლო" - თქვა რის ვებმა.

გამორიცხული არ არის, უელსელებს ნოემბრის ტესტებზე ერთ-ერთი საუკეთესო მორაგბე, გარემარბი ჯორჯ ნორსიც დააკლდეს. მან ჩემპიონთა თასის ჯგუფური ეტაპის მატჩში, "ნორსჰემთონსა" და "სარასენზს" შორის, რომელიც ამ უკანასკნელის დიდი ანგარიშით გამარჯვებით დასრულდა, მარცხენა მუხლი დაიზიანა. ნორსმა მოედანი 25-ე წუთზე დატოვა.

უელსელ გარემარბს ეროვნულ ნაკრებში 69 კეპი აქვს მოხვეჭილი და ამიტომ მას ახალი წესი არ ეხება. ინგლისურ "ნორსჰემპთონში" არხეინად შეუძლია კარიერის გაგრძელება. აი, ტრავმა, კი სერიოზული უნდა იყოს. მით უფრო, რომ ნორსმა წლეულს "ბრიტანელი ლომების" ტურნე გამოტოვა, რადგან მუხლის მყესი ჰქონდა გაწყვეტილი.

შეგახსენებთ, რომ "წითელი ურჩხულები" ნოემბრის ტესტებზე ოთხ მატჩს გამართავენ, ავსტრალიის, საქართველოს, ახალი ზელანდიისა და სამხრეთ აფრიკის ნაკრებებთან.

ყოველდღიური სპორტული გაზეთი "ლელო"

2111
მკითხველის კომენტარები / 0 /
მსგავსი ამბები
რუბრიკის სხვა სიახლეები
;