ევრო 2024-ს გერმანია უმასპინძლებს

24 სექტემბერს უეფას შტაბბინაში გაცხადდა აღმასკომის გადაწყვეტილება ევროპის 2024 წლის ჩემპიონატის მასპინძელი ქვეყნის არჩევასთან დაკავშირებით. ამ უფლების მოსაპოვებლად გერმანია და თურქეთი იბრძოდნენ.

შუაევროპული დროით 17 საათსა და 24 წუთზე უეფას პრეზიდენტმა ალექსანდერ ჩეფერინმა გახსნა კონვერტი და გამოაცხადა საბოლოო შედეგი - 6 წლის შემდეგ ევროპის ჩემპიონატს გერმანია უმასპინძლებს. აღმასკომის 17 წევრიდან ამ ქვეყანას  მხარი 12-მა დაუჭირა, 4-მა თურქეთს მიანიჭა უპირატესობა, ხოლო ერთმა წევრმა თავი შეიკავა.

გადაწყვეტილების გამოცხადების შემდეგ უეფას პრეზიდენტმა სცენაზე უხმო გერმანიის საფეხბურთო კავშირის თავკაც რაინჰარდ გრინდელსა და გერმანული განაცხადის ელჩს, ბუნდესნაკრების ყოფილ კაპიტან ფილიპ ლამს. ჯერ ჩეფერინმა თქვა:

"უკვე წარმომიდგენია, რამხელა ზეიმი გველოდება 2024 წელს გერმანიაში. დარწმუნებული ვარ, ეს ქვეყანა ღირსეული მასპინძელი იქნება და ჩვენ ვნახავთ ფანტასტიკურ ტურნირს როგორც მოედანზე, ასევე მის გარეთ".

"მადლობა უნდა გადავუხადო უეფას აღმასკომს ესოდენ დიდი ნდობისთვის. აღსავსე ვარ პასუხისმგებლობით და ვიცი, რამდენს ნიშნავს ეს ტურნირი უეფასთვის. უკვე ხვალიდან ჩვენ ვიწყებთ მზადებას ევროპის ჩემპიონატის ღირსეულად ჩატარებისთვის, რადგან ვიცით, რამდენად დიდია ამის მოლოდინი და არ გვაქვს უფლება, მილიონობით ფეხბურთის მოყვარულს იმედები გავუცრუოთ", - ეს უკვე გრინდელის სიტყვებია.

აქვე გეტყვით, რომ ევროპის ჩემპიონატს გერმანიის 10 ქალაქი უმასპინძლებს - ბერლინი, მიუნხენი, დორტმუნდი, გელზენკირხენი, შტუტგარტი, ჰამბურგი, დიუსელდორფი, კიოლნი, ლაიპციგი და მაინის ფრანკფურტი.

1280
მკითხველის კომენტარები / 0 /
მსგავსი ამბები
რუბრიკის სხვა სიახლეები
;