უეფას განვითარების პროექტი. დავით მუჯირი: ეს პროგრამა დიდი სტიმულია...

"ახალგაზრდული საფეხბურთო განვითარების სქემას შედეგები მოაქვს", - ამ სათაურით გამოაქვეყნა უეფას ოფიციალურმა გვერდმა წერილი, რომელშიც 2014 წლიდან დაწყებული პროექტია შეჯამებული...

უეფას ერთ-ერთი მთავარი ამოცანა ევროპის ყველა კუთხეში ფეხბურთის განვითარებაა, რაც ახალგაზრდა ფეხბურთელთა გაზრდაზე ზრუნვას ნიშნავს.

ამ მიზნით წამოიწყო უეფამ ახალგაზრდული ფეხბურთის განვითარების პროგრამა, რომელშიც 2014 წლიდან 4 ქვეყანა მონაწილეობს - საქართველო, ბელარუსი, სომხეთი და მაკედონია.

"უეფას ამბიციური პროგრამის მიზანი იმ ახალგაზრდების მოძებნა და მათთან მუშაობაა, რომლებიც შემდეგ ეროვნული ნაკრებისა და კლუბების ლიდერები გახდებიან.

ახლა კი დადგა დრო, პირველი შედეგები შევაჯამოთ და სამომავლო გეგმებში კორექტივები შევიტანოთ. ოთხი ჩამოთვლილი ასოციაცია საპილოტო პროექტში მონაწილეობის მისაღებად შეირჩა, ხოლო ახლა პროგრამა 55 ევროპის საფეხბურთო ფედერაციას მოიცავს.

ავტორთა აზრით, ეს პროგრამა წლების განმავლობაში უზრუნველყოფს ნიჭიერი ბავშვების აღმოჩენასა და გაზრდას. უეფას პროგრამას მისი მონაწილეებისთვის შედეგები უკვე მოაქვს", - წერს უეფას გვერდი.

უეფა 2014/15 წლების სეზონიდან აფინანსებს საპილოტე პროექტის ოთხივე მონაწილეს, რომელიც ამის ხარჯზე უზრუნველყოფს 14 და 15-წლამდელთა საფეხბურთო აკადემიის მუშაობას, სასწავლო პროცესის ოპტიმიზაციას და ტექნიკური პროგრამების დანერგვას. ყოველწლიურად უეფა ამ ქვეყნებში ექსპერტების რამდენიმე ვიზიტს უზრუნველყოფდა, რომლებიც ადგილობრივებს ყველაზე მნიშვნელოვან რჩევებს უზიარებენ არა მარტო ტექნიკური გეგმის, არამედ განათლებისა და მართვის საკითხებში. მწვრთნელებმა და ინსტრუქტორებმა ექსპერტებისგან ფასეული ცოდნა მიიღეს. ეს მათ მუშაობის სტანდარტების ამაღლებაში ეხმარება და, ამავდროულად, მათ მოტივაციაზე დადებით გავლენას ახდენს.

უეფას დახმარებით, საქართველომ, ბელარუსმა, სომხეთმა და მაკედონიამ შეიმუშავეს ეროვნული აკადემიების მუშაობის ოპტიმალური სქემა, რომელიც აერთიანებს ფედერაციებს, სკოლებსა და კლუბებს. ამის შედეგად სასწავლო პროცესის სავარჯიშოსთან შერწყმა შესაძლებელი გახდა.

ასოციაციების სპეციფიკური მოთხოვნების და აუცილებლობის მიხედვით, ინდივიდუალური სპეციალიზებული პროგრამები შემუშავდა. წმინდა საფეხბურთო ვარჯიშების გარდა, ახალგაზრდა ფეხბურთელებს ცხოვრებისეულ ღირებულებებსაც ასწავლიან - ქცევის ნორმებს, სწორ დამოკიდებულებას და პასუხისმგებლობას.

უეფა შედეგებით კმაყოფილია, მაგრამ ამაზე შეჩერებას არ აპირებს: "პროექტმა ნაყოფი უკვე გამოიღო. უეფას საკვალიფიკაციო ტურნირებში ამ ასოციაციების შედეგები გაუმჯობესდა, განსაკუთრებით 17-წლამდელთა ევროპის ჩემპიონატზე. დროა, მომავალს გავხედოთ.

ერთი წლის შემდეგ საპილოტე პროექტი დასრულდება, უეფამ კი ასოციაციებს სთხოვა, მუშაობა გააგრძელონ. ორგანიზაცია მომავალშიც გააგრძელებს ასოციაციების ფინანსურ მხარდაჭერას, ასევე დახმარებას - განვითარების ბიზნესპროექტების შედგენასა და მოთამაშეთა მომზადების სტანდარტის გაუმჯობესებაში. მაგრამ აუცილებელია ახალ დონეზე გასვლა".

უეფას ფეხბურთის განვითარების დეპარტამენტის ხელმძღვანელმა, საფრანგეთის ნაკრების ყოფილმა მცველმა ჟან-ფრანსუა დომერგმა საპილოტე პროექტის შედეგები დადებითად შეაფასა: "ამ პროექტების განხორციელება ასოციაციებისთვის უდიდესი წარმატება იყო. ამავე დროს, მათ უეფას აჩვენეს, რა მიმართულებით უნდა გააგრძელონ მუშაობა ამ ასოციაციებმა, რადგან მათ მნიშვნელოვან პროგრესს მიაღწიეს".

საპილოტე პროექტში ჩართული ოთხივე ასოციაციის წარმომადგენელი განვითარების პროგრამებისა და ინფრასტრუქტურის მშენებლობაში უეფას დახმარებას ერთსულოვნად აფასებს. კომენტარი საქართველოს ფეხბურთის ფედერაციის გენერალურმა მდივანმა დავით მუჯირმაც გააკეთა.

"ეს პროგრამა ჩვენი მწვრთნელებისა და ფეხბურთელებისთვის უზარმაზარი მოტივაციაა. დარწმუნებული ვარ, მისი განხორციელება ქართული ფეხბურთის განვითარებას ხელს შეუწყობს", - ამბობს მუჯირი.

ჟან-ფრანსუა დომერგი კი ამტკიცებს, რომ ასეთი პროექტები მთლიანად ფეხბურთისთვისაა სასარგებლო: "ჩვენ გვინდა, რომ ასოციაციებს უკეთესი ფეხბურთელების გაზრდაში დავეხმაროთ. ამით ევროპის საფეხბურთო მომავლისთვის ინვესტიციებს ვაბანდებთ".

ყოველდღიური სპორტული გაზეთი "ლელო"
1303
მკითხველის კომენტარები / 0 /
მსგავსი ამბები
რუბრიკის სხვა სიახლეები
;