უიმბლდონზე დიდი სამეული დაფრინავს 

უიმბლდონის მერვედფინალში ნოვაკ ჯოკოვიჩმა, რაფაელ ნადალმა და როჯერ ფედერერმა ერთად ჯამში მხოლოდ 19 გეიმი დათმეს ცხრა სეტში.

„დიდი სამეულიდან“ პირველი კორტზე რაფაელ ნადალი გავიდა. ესპანელი აგრძელებს დამაჯერებელ სვლას. რაფაელმა სულ რაღაც საათსა და 45 წუთში 6:2, 6:2, 6:2 გაანადგურა პორტუგალიელი ჟოაო სოუზა. ნადალი 39-ედ გავიდა „დიდი სლემის“ ტურნირის მეოთხედფინალში, აქედან ბოლო რვა ჩემპიონატში ზედიზედ.

ისევე, როგორც წინა წრეში, ნადალმა ახლაც ძალიან დამაჯერებლად და საიმედოდ ითამაშა. 30 „ვინერსი“ და მხოლოდ 10 უნებლიე შეცდომა ამის დამადასტურებელია. რაფამ თავის გეიმებში ქულების 78 პროცენტი აიღო და ერთ ბრეიკ-პოინტამდეც არ მიუშვა მეტოქე.

ნიკ კირგიოსთან მეორე წრეში რთული მატჩის შემდეგ, ნადალმა ჟო-ვილფრიდ ცონგასთან და სოუზასთან მატჩებში მხოლოდ 13 გეიმი დათმო.

ნადალს მიბაძა და ასევე ძალიან იოლად გავიდა მეოთხედფინალში მსოფლიოს პირველი ჩოგანი ნოვაკ ჯოკოვიჩი. მას ესპანელზე ერთი წუთით ნაკლები დრო, მაგრამ ორი გეიმით მეტის ჩატარება დასჭირდა 21 წლის ფრანგი უგო უმბერის დასამარცხებლად - 6:3, 6:2, 6:3.

სერბმა ცხრიდან ხუთი ბრეიკ-პოინტი გამოიყენა და ერთ ბრეიკ-პოინტამდეც არ მიუშვა მეტოქე, რომელსაც დებიუტი ჰქონდა უიმბლდონზე. ფრანგმა ძალიან ბევრი - 34 უნებლიე შეცდომა დაუშვა და მხოლოდ 20 „ვინერსი“ დააგროვა.

ჯოკოვიჩმა კარიერაში „დიდ სლემზე“ 45-ე მეოთხედფინალში თამაშის უფლება მოიპოვა. ამ ეტაპზე ის ბელგიელ დავიდ გოფენს შეხვდება, რომელმაც სამ საათში მოუგო ესპანელ ფერნანდო ვერდასკოს - 7:6(9), 2:6, 6:3, 6:4. პირველი სეტის ტაი-ბრეიკზე გოფენმა ხუთი სეტბოლის მოგერიება შეძლო.
გოფენთან ურთიერთშეხვედრებში ჯოკოვიჩი წინ არის - 5:1, თუმცა, მათ ბალახზე არასოდეს უთამაშიათ.

ყველაზე დამაჯერებელი მაინც როჯერ ფედერერი იყო. მას სულ რაღაც საათი და 13 წუთი დასჭირდა უიმბლდონზე მე-17 მეოთხედფინალში გასასვლელად. შვეიცარიელი ხვდებოდა იტალიელ მატეო ბერეტინის, რომელსაც წელს ბალახზე ყველაზე მეტი მატჩი ჰქონდა მოგებული (12). მაგრამ 23 წლის აპენინელმა ვერანაირი წინააღმდეგობა ვერ გაუწია ლეგენდას - 1:6, 2:6, 2:6.

უიმბლდონის რვაგზის ჩემპიონს ფანტასტიკური სტატისტიკა ჰქონდა - 23 „ვინერსი“ და მხოლოდ ხუთი (!) უნებლიე შეცდომა, საკუთარ მოწოდებაზე წაგებული მხოლოდ 11 ქულა და შვიდიდან ექვსი გამოყენებული ბრეიკ-პოინტი.

ფედერერის შემდეგი მეტოქე იაპონელი კეი ნიშიკორია, რომელსაც ურთიერთშეხვედრებში 7:3-ს უგებს. აზიელი „დიდი სლემის“ ზედიზედ მეხუთე ტურნირზე გავიდა მეოთხედფინალში. ნიშიკორისთან მოგების შემთხვევაში, როჯერს უიმბლდონზე 100 გამარჯვება დაუგროვდება.

1/8 ფინალი
ჯოკოვიჩი (სერ, 1)-უმბერტი (საფ) 6:3, 6:2, 6:3
ფედერერი (შვეიც, 2)-ბერეტინი (იტა, 17) 6:1, 6:2, 6:2
ნადალი (ესპ, 3)-სოუზა (პორ) 6:2, 6:2, 6:2
ნიშიკორი (იაპ, 8)-კუკუშკინი (ყაზ) 6:3, 3:6, 6:3, 6:4
პეია (არგ, 26)-რაონიჩი (კან, 15) 3:6, 4:6, 6:3, 7:6(3), 8:6
გოფენი (ბელ, 21)-ვერდასკო (ესპ) 7:6(9), 2:6, 6:3, 6:4
ბაუტისტა აგუტი (ესპ, 23)-პერი (საფ, 28) 6:3, 7:5, 6:2
კუერი (აშშ)-სანდგრენი (აშშ) 6:4, 6:7(7), 7:6(3), 7:6(5)

1/4 ფინალი
ჯოკოვიჩი (სერ, 1)-გოფენი (ბელ, 21)
ბაუტისტა აგუტი (ესპ, 23)-პეია (არგ, 26)
ნადალი (ესპ, 3)-კუერი (აშშ)
ფედერერი (შვეიც, 2)-ნიშიკორი (იაპ, 8)

ყოველდღიური სპორტული გაზეთი "ლელო"
713
მკითხველის კომენტარები / 0 /
მსგავსი ამბები
რუბრიკის სხვა სიახლეები
;