უიმბლდონის გადატანა არ იგეგმება აშშ-ის ღია პირველობა, შესაძლოა, მოგვიანებით ჩატარდეს

უიმბლდონის ორგანიზატორები ჯერჯერობით არ გეგმავენ ტურნირის გადატანას კორონავირუსის პანდემიის გამო, - წერია „დიდი სლემის“ ტურნირის ორგანიზატორთა განცხადებაში. 2020 წელს, უიმბლდონი 29 ივნისიდან 12 ივლისამდე უნდა გაიმართოს.

„ვაგრძელებთ სიტუაციაზე დაკვირვებას და აქტიურად ვთანამშრომლობთ მთავრობასთან და ჯანდაცვის სისტემის წარმომადგენლებთან... ამ მომენტისთვის ჩვენ, ჯერჯერობით, ვაგრძელებთ ტურნირისთვის მზადებას. გვსურს საჩოგბურთო კომპლექსი მაქსიმალურად შეზღუდული ძალებით მოვაწესრიგოთ, სხვა საკითხები კი დისტანციურ რეჟიმში მოვაგვაროთ“, - წერია განცხადებაში.

შეგახსენებთ, რომ გაზაფხულიდან შემოდგომაზე გადაიტანეს როლან გაროსი, რომელიც წინ უძღვის უიმბლდონს.

n n n

„დიდი სლემის“ რიგით მეოთხე ტურნირის - აშშ-ის ღია პირველობის ორგანიზატორები განცხადებით გამოვიდნენ კორონავირუსის პანდემიასთან და როლან გაროსის შემოდგომაზე გადატანასთან დაკავშირებით.

„აშშ-ის საჩოგბურთო ასოციაცია აგრძელებს მზადებას 2020 წელს აშშ-ის ღია პირველობის ჩასატარებლად და ამ მომენტისთვის, არ აპირებს რაიმე ცვლილებას განრიგში.

თუმცა, ეს არის უპრეცედენტო დრო და ჩვენ განვიხილავთ ყველა ვარიანტს, მათ შორის, ტურნირის გადატანას უფრო გვიან დროზე.

იმ მომენტში, როცა მთელი სამყარო ერთიანდება, ჩვენ გვესმის, რომ ასეთი გადაწყვეტილება არ შეიძლება მიღებულ იქნას ცალმხრივად. აშშ-ის საჩოგბურთო ასოციაცია კონსულტაციას გაივლის ამ საკითხში „დიდი სლემის“ სხვა ტურნირებთან, WTA-სთან, ATP-სთან, ჩოგბურთის საერთაშორისო ასოციაციასთან და ჩვენს პარტნიორებთან, მათ შორის, ლეივერის თასთან“, - წერია განცხადებაში.

აშშ-ის ღია პირველობა დაგეგმილია 31 აგვისტოდან 13 სექტემბრამდე. როლან გაროსი კი, რომელიც შემოდგომაზე გადაიტანეს, 20 სექტემბერს უნდა დაიწყოს.

252
მკითხველის კომენტარები / 0 /
მსგავსი ამბები
რუბრიკის სხვა სიახლეები
;