უკვე ოფიციალურად დადასტურდა! - საქართველოს მორაგბეთა ნაკრები ნოემბრის ტესტებზე იტალიას დაუპირისპირდება

საქართველოს ნაკრები ნოემბრის ტესტებზე იტალიის ნაკრებს დაუპირისპირდება. უკვე ოფიციალურად დადასტურდა, რომ ეს მატჩი 10 ნოემბერს ფლორენციაში, არტემიო ფრანკის სტადიონზე გაიმართება.

იტალიის ნაკრებთან მომავალი მატჩის მნიშვნელობაზე აქამდეც ბევრჯერ დაიწერა და ითქვა. ექვსი ერის მამებზე ამ მატჩის შედეგმა, შესაძლოა, გავლენა იქონიოს. თუმცა, გადაჭრით იმის თქმა, რომ ახლა იტალიას მოვუგებთ და ექვსი ერის კარი გაიღებაო, ცხადია, არ შეიძლება. გამორიცხული არ არის, ექვსი ერის ბოსებმა ჩვენი იტალელებთან გამარჯვება არაფრად ჩააგდონ.

ერთი სიტყვით, მატჩის დღე და ადგილი ცნობილია და ახლა ჯერი "ბორჯღალოსნებზეა".

ნოემბერში, ამ მატჩის გარდა, საქართველოს ნაკრები თბილისში ორ შეხვედრას გამართავს. მეტოქეები, სავარაუდოდ, სამი კუნძულელიდან ორი ან სამი კუნძულელიდან ერთი და იაპონია იქნება.

შეგახსენებთ, რომ იტალიის ნაკრებთან აქამდე სამჯერ გვითამაშია და სამჯერვე გამარჯვება მეტოქეს დარჩა. ბოლოს "ბორჯღალოსნები" იტალიის ეროვნულ გუნდს 15 წლის წინათ, 2003 წელს მსოფლიოს თასისთვის მზადების სტადიაზე დაუპირისპირდნენ.

ყოველდღიური სპორტული გაზეთი "ლელო"
1543
მკითხველის კომენტარები / 0 /
მსგავსი ამბები
რუბრიკის სხვა სიახლეები
;