უკვე ოფიციალურად: ცეცაძე დაბრუნდა ...ჯერ მხოლოდ ევროპალიგამდე

"ლელოს" ინფორმაცია ოფიციალურად დადასტურდა - გია ცეცაძე კვლავ "სამტრედიას" მთავარ მწვრთნელად იმუშავებს. ევროპალიგის მატჩამდე გუნდს ის სპეციალისტი დაუბრუნდა, რომელსაც კლუბის ყველაზე დიდი წარმატებები უკავშირდება.

ცეცაძის დაბრუნებას ის აბრკოლებდა, რომ ნაკრებში დასაქმებულ მწვრთნელს კლუბში მუშაობა ეკრძალება, ცეცაძე კი სწორედ საქართველოს ახალგაზრდული ნაკრების მთავარი მწვრთნელია.

საქართველოს ფეხბურთის ფედერაციამ გაითვალისწინა "სამტრედიას" თხოვნა და მიღწეულია შეთანხმაბა, რომ ცეცაძე "სამტრედიაში" სანაკრებო პაუზისას იმუშავებს, ხოლო 21-წლამდელებს მომდევნო შეკრებისთანავე დაუბრუნდება.

"საქართველოს ფეხბურთის ფედერაციას თხოვნით მიმართა საფეხბურთო კლუბმა "სამტრედიამ", რათა ევროპალიგისთვის დროებით კლუბში ემუშავა გია ცეცაძეს, რომელიც, მოგეხსენებათ, 21-წლამდელთა ნაკრების მთავარი მწვრთნელია.

მწვრთნელთან მოლაპარაკებების შედეგად, მივიღეთ გადაწყვეტილება, რომ დროებით, ახალგაზრდულის შეკრებამდე, გიას ემუშავა "სამტრედიას" მთავარ მწვრთნელად, რადგან კლუბის ხელმძღვანელობის აზრით, მათთვის ეს იქნებოდა ძალიან მნიშვნელოვანი ევროტურნირისთვის მოსამზადებელ ეტაპზე.

ჩვენი მხრივ, კიდევ ერთხელ ვადასტურებთ, რომ ყველა კლუბს მაქსიმალურად შევუწყობთ ხელს, რადგან მათი წინსვლა მთლიანად ქართული ფეხბურთის წარმატებაა", - ამბობს სფფ-ის ვიცე-პრეზიდენტი ალექსანდრე იაშვილი.

შევიტყვეთ ისიც, რომ ცეცაძეს "სამტრედიაში" კვლავ თემურ ლორთქიფანიძე დაეხმარება - ფიზიკური მომზადების სპეციალისტი, რომელთანაც თანამშრომლობდა თითქმის ყველა კლუბსა თუ ნაკრებში, სადაც კი მთავარ მწვრთნელად უმუშავია - გორის "დილაში", თბილისის "ლოკომოტივში", საქართველოს 19-წლამდელთა ნაკრებსა და "სამტრედიაში" წინა კამპანიისას. რაც შეეხება მეკარეების მწვრთნელს, მისი ვინაობა ჯერჯერობით არ გარკვეულა.

შეგახსენებთ, რომ სამტრედიელები ევროპალიგის პლეი ოფში ყაზახურ "ტობოლს" დაუპირისპირდებიან, სადაც საქართველოს ნაკრების წევრები - ნიკა კვეკვესკირი და ჯაბა კანკავა თამაშობენ. პირველი მატჩი 10 ივლისს, მიხეილ მესხის სახელობის სტადიონზე გაიმართება.

ყოველდღიური სპორტული გაზეთი "ლელო"
923
მკითხველის კომენტარები / 0 /
მსგავსი ამბები
რუბრიკის სხვა სიახლეები
;