უკრაინის ტოპტალანტებში გიორგი წიტაიშვილიც მოხვდა

გიორგი წიტაიშვილი უკრაინის საუკეთესო 19-წლამდელებში მე-4 ადგილზე დაასახელეს. უკრაინაში არსებობს ასეთი პროექტი - „ოქროს ტალანტი“ - რომლის გამარჯვებულიც 19 და 21-წლამდელ ფეხბურთელებს შორის ვლინდება.

გამოკითხვას ინტერნეტგამოცემა footboom-ი ყოველთვე ატარებს. ამჯერად, ნოემბრის საუკეთესო მოთამაშე დაასახელეს. „ოქროს ტალანტის“ გამოკითხვებში 100-ზე მეტი ექსპერტი, მწვრთნელი, ვეტერანი ფეხბურთელი, აგენტები და ჟურნალისტი მონაწილეობენ. ამას გარდა, გულშემატკივრის კოლექტიურ ხმასაც ითვალისწინებენ.

19-წლამდელთა შორის საუკეთესოდ კიევის „დინამოს“ მცველი ვიტალი მიკოლენკო აღიარეს, რომელმაც ნოემბერში უკრაინის ეროვნულ ნაკრებში სადებიუტო შეხვედრა ჩაატარა. მეორე-მესამე ადგილებზე კი გავიდნენ ესპანური „ლეგანესისა“ და ნაკრების მეკარე ანდრეი ლუნინი და „მარიუპოლის“ ფეხბურთელი ვლადისლავ ვაკულა.

გიორგი წიტაიშვილმა კიევის „დინამოს“ მთავარი გუნდის ფორმით სადებიუტო შეხვედრა ევროპალიგაზე ჩაატარა. ჩეხურ „იაბლონეცთან“ ჯგუფური ეტაპის ბოლო შეხვედრაში 18 წლის შემტევი ნახევარმცველი მოედანზე მე-60 წუთზე გამოჩნდა.

ქართველმა კიევურ კლუბთან კონტრაქტი 2018 წლის 21 ნოემბერს 5 წლით გაახანგრძლივა. ის „დინამოს“ აკადემიაში ვარჯიშობდა. მწვრთნელების ყურადღება 16 წლისამ მიიქცია და ჯერ „დინამოს“ იუნიორთა გუნდში ათამაშებდნენ, შემდეგ -“დინამოს“ 19-წლამდელებსა და ახალგაზრდულში და ორივეგან ერთ-ერთი ლიდერი იყო. არის უკრაინის მოქალაქე და ამ ქვეყნის 19-წლამდელთა ნაკრების წევრი.

საუკეთესო ოთხეული

ვიტალი მიკოლენკო         32%

ანდრეი ლუნინი              24%

ვლადისლავ ვაკულა         14%

გიორგი წიტაიშვილი         12%

ყველასთვის ცნობილია, რომ გიორგი წიტაიშვილი ახლო წარსულში ცნობილი თავდამსხმელის, კობა წიტაიშვილის ვაჟია. მაგრამ ბევრისთვის უცნობია, რომ გიორგი ცნობილი ქართველი მსაჯის, სერგო კვარაცხელიას შვილიშვილი და ფიფას არბიტრ ლევან კვარაცხელიას დის შვილია. მოკლედ, თავიდან ბოლომდე ქართულ გარემოშია გაზრდილი და იმედია, ადრე თუ გვიან „ჯვაროსანიც“ გახდება.

ყოველდღიური სპორტული გაზეთი "ლელო"
523
მკითხველის კომენტარები / 0 /
მსგავსი ამბები
რუბრიკის სხვა სიახლეები
;