უმცროსმა დინამოელებმა თენგიზ ბურჯანაძის მემორიალზე პირველობა ისევ არ დათმეს

თბილისის ,,დინამო" ზედიზედ მესამედ გახდა გორში გამართული თენგიზ ბურჯანაძის ხსოვნის მემორიალური ტურნირის გამარჯვებული! 

შეჯიბრებაში, რომელიც 8–11 სექტემბერს მიმდინარეობდა, ჩვენი ქვეყნის სხვადასხვა ქალაქების და ლიეტუვის ქალაქ ვილნიუსის 2006 –2007 წწ დაბადებული ფეხბურთელებით დაკომპლექტებული გუნდები იღებდნენ მონაწილეობას. ტურნირის რეგლამენტის მიხედვით გუნდები ორ ჯგუფში იყვნენ გადანაწილებულნი, საიდანაც პირველ ადგილზე გასულები, ტურნირის გამარჯვებულის სტატუსის მოსაპოვებლად ფინალში იასპარეზებდენ, ჯგუფებში მეორე ადგილების მფლობელებს კი ბრინჯაოს მედლებისთვის მოუწევდათ ბრძოლა. 

11 სექტემბერს ფინალური ბლოკი სწორედ მესამე ადგილისთვის მატჩით დაიწყო, რომელიც გურამ გაბუნიას სახელობის არენაზე ჩატარდა. თბილისის ,,საბურთალოსა" და გორის ,,დილას" შორის უაღრესად დაძაბული პაექრობის ძირითადი დრო უგოლოდ დასრულდა, პენალტების სერიაში კი უკეთესი ,,საბურთალო" აღმოჩნდა 6:5. 

ტურნირის კულმინაცია თენგიზ ბურჯანაძის სახელობის სტადიონზე ვიხილეთ, სადაც ფინალურ დაპირისპირებაში თბილისურმა კლუბებმა ,,დინამომ" და ,,ლოკომოტივმა" ითამაშეს. ,,დინამოელებმა" ტრადიციას არც ამჯერად უღალატეს და თენგიზ ბურჯანაძის სახელობის თასი ზედიზედ მესამედ ჩაიბარეს. მატჩი 3:0 დასრულდა. ორი გოლი საჯაიამ გაიტანა, ერთიც ქელდიშვილმა.     

,,დინამომ" ფინალი შემდეგი შემადგენლობით ითამაშა: ხელაშვილი, პატარკაციშვილი, ხუფენია, ქელდიშვილი, ბენდიანაშვილი, ფეიქრიშვილი, ბუბუტეიშვილი, შაშიაშვილი, ნაჭყეპია, ვარსიმაშვილი, თურქია
შეცვლაზე შევიდნენ: საური, მესტიაშვილი, ბერძენიშვილი, საჯაია, მამასახლისი, გრიგალავა.

ტურნირის ორგანიზატორებმა გამოავლინეს სხვადასხვა ნომინაციაში საუკეთესონი. 

საუკეთესო მეკარე: ავთანდილ სართანია (დილა)

საუკეთესო მცველი: ნიკოლოზ ბენდიანაშვილი (დინამო თბ)

საუკეთესო ნახევარმცველი: თემურ ოდიკაძე (საბურთალო)

საუკეთესო თავდამსხმელი: საბა ვაშაყმაძე (ლოკომოტივი)

საუკეთესო ბომბარდირი: ლუკა ბუბუტეიშვილი (დინამო თბ)

ტურნირის სიმპათია: ნიკა დუმბაძე (დინამო ბთ)

ყველაზე პერსპექტიული ფეხბურთელი: დავით ნაზარაშვილი (დილა)

ტურნირის საუკეთესო ფეხბურთელი: ალექსანდრე ფეიქრიშვილი (დინამო თბ)

ტურნირი მაღალ დონეზე იყო ორგანიზებული. თამაშები ტარდებოდა გურამ გაბუნიას სახელობის არენაზე, გახსნა და ფინალური დაპირისპირება ,,თენგიზ ბურჯანაძეზე" ჩატარდა. შეჯიბრებას ესწრებოდა არაერთი საპატიო სტუმარი, სახელოვანი ქართველი ფეხბურთელები და სპორტსმენები. 

საუკეთესონი სწორედ მათ, აგრეთვე გორისა და შიდა ქართლის ხელისუფლების წარომადგენლებმა და თენგიზ ბურჯანაძის ვაჟმა დააჯილდოვეს. 

ტურნირის ორგანიზატორი იყო საფეხბურთო კლუბი ,,გორი", საქართველოს ფეხბურთის ფედერაციასთან, ქართული ფეხბურთის განვითარების ფონდთან და გორის მუნიციპალიტეტის მერიასთან ერთად. 

ფოტოზე: ტურნირის საუკეთესო ფეხბურთელს დინამოელ ალექსანდრე ფეიქრიშვილს აჯილდოებენ ლეგენდარული დინამოელი გრიგოლ ცაავა და თენგიზ ბურჯანაძე უმცროსი (მარცხნივ)

691
მკითხველის კომენტარები / 1 /
დინამო ელი
0
ეს ტურნირი უკვე შეიძლება ჩაითვალოს მაღალ დონეზე ორგანიზებულად. ჩვენ დინამოელები მადლობას ვუხდი თ გორელებს.
პ.ს.ვაშლი არ მოკლებიათ ფეხბურთელებს ყველა გუნდი მატჩის შემდეგ ვაშლის დიდი ყუთით იყო უზრუნველყოფილი.
მადლობა ყველას
მსგავსი ამბები
რუბრიკის სხვა სიახლეები
;