უნდა ვირბინოთ!

24 მარტს საქართველოს ეროვნული ნაკრები ამხანაგურ შეხვედრაში დაუხვდება ლიტვის უპირველეს გუნდს. ჩვენი ნაკრები იწყებს ახალ სეზონს, რომელსაც ქართველი ქომაგის განსაკუთრებული იმედი უკავშირდება. შემოდგომიდან ერთა ლიგის გათამაშებაში ჩავებმებით.

ჯგუფში გვყავს ლატვია. ლიტვასა და ესტონეთთან კარსმომდგარი თამაშები ჯერ ზოგადად სასარგებლოდ მოჩანს და მერე იმ კუთხითაც, რომ ორივე ბალტიისპირული გუნდი სათამაშო სტილით ძალიან ჰგავს ლატვიას და თუ არ ჯობია, არაფრით ჩამოუვარდება მას...

ოქრიაშვილიც რომ გვყავდეს...

ლიტვასთან სპარინგის წინ საქართველოს ნაკრების შემადგენლობა თითქმის ოპტიმალურად მოჩანს. ლიდერებიდან გვაკლია მხოლოდ თორნიკე ოქრიაშვილი - ეროვნული გუნდის მთავარი "მარილი" შეტევაში.

ოქრიაშვილი სრულიად ჯანმრთელი გვჭირდება შემოდგომაზე. ალბათ, არ შევცდებით, თუ ვიტყვით, რომ ჩვენს მეტოქეებს არ ჰყავთ მისი კლასის ფეხბურთელი და ეს ერთი გვარიანი პლუსია ვლადიმირ ვაისის გაწვრთნილი გუნდისთვის.

ცუდია, რომ დაგვაკლდა დავით ხოჭოლავა. ვაისი ცენტრალურ მცველთა რომელიღაც განლაგებაში უთუოდ მოსინჯავდა დონეცკის "შახტარის" უკანახაზელს. სხვა მხრივ, ჯერჯერობით, ყველაფერი კარგადაა...

რას დაავალებს ვაისი გუნდს?

ვარჯიში ვარჯიშია, მაგრამ იმაზე, თუ რა დავალებებს მისცემს ვაისი გუნდს, მხოლოდ ვარაუდი შეგვიძლია.

ამ ორი შეხვედრის მთავარი დანიშნულება ის არის, რომ საქართველოს ნაკრები კარგად უნდა მოემზადოს ერთა ლიგის გათამაშებისთვის. იმთავითვე შევთანხმდეთ, რომ თუ ამ ტურნირში წარმატების მიღწევა გვსურს, ყველა საშინაო თამაში უნდა მოვიგოთ.

ამის გაკეთება ძალიან გაგვიჭირდება, თუ არ ვითამაშეთ შემტევი, დომინანტური ფეხბურთი და თუ საკუთარ კედლებში მაინც არ ვუკარნახეთ მეტოქეებს ჩვენი პირობები. ამდენად, საქართველოს ნაკრებისგან შემტევ და აგრესიულ ფეხბურთს ველით.

რაც გვაიმედებს...

გვაიმედებს ის, რაც ბოლო უქმეებზე ვნახეთ. საქართველოს ნაკრების არაერთი ფეხბურთელი მოხვდა თავისი ჩემპიონატის სიმბოლურ ნაკრებში და არაერთმა მათგანმა გამოიჩინა თავი გოლებით, მეტიც - თვით ჰეთ-თრიკითაც (გიორგი ქვილითაია) კი.

ფურცელზე ისე ჩანს, რომ ვაისის კრებული ამ დროისთვის კარგ ფორმაში უნდა იყოს. დანარჩენი უშუალოდ მინდორზე გამოჩნდება. ფაქტია, ქართველი ქომაგი ნაკრებისგან მხოლოდ გამარჯვებას ელის ლიტვასთანაც და ესტონეთთანაც. იმისაც გვჯერა, რომ ეს ჩვენს ძალას ნამდვილად არ აღემატება.

საქართველოს ნაკრები ამ ორი ამხანაგური მატჩისთვის 23 ფეხბურთელით ემზადება.

მეკარეები - გიორგი ლორია (ანჟი, რუსეთი), გიორგი მაკარიძე (რიუ ავე, პორტუგალია), როინ კვასხვაძე (ტორპედო);

მცველები - ოთარ კაკაბაძე (ჟიმნასტიკი, ესპანეთი), გურამ კაშია (ვიტესი, ჰოლანდია), საბა კვირკველია (ლოკომოტივი, რუსეთი), გიორგი ნავალოვსკი (სკა ენერგია, რუსეთი), ლაშა შერგელაშვილი (რიგასი, ლატვია), ჯიმი ტაბიძე (უფა, რუსეთი), ლაშა დვალი (პოგონი, პოლონეთი);

ნახევარმცველები - ჯაბა კანკავა, ნიკა კვეკვესკირი (ორივე - ტობოლი, ყაზახეთი), ვაკო გვილია (ლუცერნი, შვეიცარია), გიორგი აბურჯანია (სევილია ატლეტიკო, ესპანეთი), ჯანო ანანიძე (სპარტაკი, რუსეთი), ვაკო ყაზაიშვილი (სან ხოსე, აშშ), გიორგი მერებაშვილი (პლოცკი, პოლონეთი), გიორგი პაპუნაშვილი (სარაგოსა, ესპანეთი), ჯაბა ჯიღაური (ორდაბასი, ყაზახეთი), გიორგი ჩაკვეტაძე (გენტი, ბელგია);

თავდამსხმელები - გიორგი ქვილითაია (რაპიდი, ავსტრია), ნიკა კაჭარავა (კორონა, პოლონეთი), ბაჩანა არაბული (ბალმაზივაროში, უნგრეთი).

როცა მთავარი ვარსკვლავი მწვრთნელია

როგორც ყველა გუნდს, ლიტვის ნაკრებსაც ჰყავს ლიდერები და მათ შესახებ ჩვენს წერილში აუცილებლად ვისაუბრებთ. ისე კი, საკამათო არავისთვის უნდა იყოს, რომ ამ ქვეყნის ნაკრების მთავარი ვარსკვლავი... მისი მწვრთნელია.

43 წლის ედგარას იანკაუსკასს სხვადასხვა დროს ისეთი კლუბების ღირსება დაუცავს, როგორებიც არიან "ბრიუგე", "სოსიედადი", "ბენფიკა", "პორტუ", "ნიცა", "ჰართსი", აეკ-ი, "ბელენენსეში"... უთამაშია MLშ-ის "ნიუ ინგლენდში", ასევე, რუსულ (ცსკა, "ტორპედო", "ფაკელი") კლუბებში. მისი საფეხბურთო კარიერა კი ვილნიუსის "ჟალგირისში" დაიწყო.

იანკაუსკასი ლიტვის ეროვნული ნაკრების შემადგენლობაში 1991-2008 წლებში თამაშობდა. ამ დროის განმავლობაში მან ქვეყნის ღირსება 56 შეხვედრაში დაიცვა და 10 გოლი გაიტანა.

სამწვრთნელო ასპარეზზე იანკაუსკასი 2011 წელს გამოჩნდა და მოსკოვის "ლოკომოტივის" მთავარი მწვრთნელის ასისტენტი გახდა. ამავე თანამდებობაზე იმუშავა შოტლანდიურ "ჰართსშიც". შემდეგ იყო ლიტვური "ტრაკაი", 2016 წლიდან კი ქვეყნის უპირველეს გუნდს მოძღვრავს.

ზოგადად, იანკაუსკასი ხასიათდება როგორც შემტევი ფეხბურთის მიმდევარი. ეს არცაა გასაკვირი მისი სათამაშო ამპლუიდან გამომდინარე. გარდა ამისა, ლიტველთა თავკაცს დისციპლინასა და სათამაშო ორგანიზაციასაც უქებენ.

ლიდერები

დავიწყოთ გუნდის კაპიტნით. ფიოდორ ჩერნიხი 26 წლისაა. ამჟამად ის მოსკოვის "დინამოს" ფეხბურთელია. მანამდე წარმატებით იცავდა პოლონური "იაგელონიას" ღირსებას.

სხვადასხვა დროს უთამაშია "მოგილიოვში", "ნაფტანსა" და კიდევ ერთ პოლონურ კლუბ "გურნიკში". ლიტვის ნაკრების ღირსებას 2012 წლიდან იცავს. იქიდან მოყოლებული, ამ გუნდის შემადგენლობაში მან 33 შეხვედრა ჩაატარა და 8 გოლი მიითვალა.

ლიტველთა ნახევარდაცვაში კიდევ ერთი მთავარი კაცი არვიდას ნოვიკოვასია. 27 წლის ფეხბურთელი ამჟამად პოლონური "იაგელონიას" მაისურით ასპარეზობს. საერთოდ, ეს კლუბი ძალიან ახლობელია ლიტველი ფეხბურთელებისთვის.

ნოვიკოვასს უთამაშია ასევე "ვილნიუსში", "ინტერასში" (ორივე - ლიტვა), შოტლანდიურ "ჰართსსა" და "სენტ ჯონსტონში", გერმანულ "აუესა" და "ბოხუმში". ლიტვის ნაკრებში ნოვიკოვასს 2010 წლიდან იწვევენ (37 მატჩი, 5 გოლი).

ლიტველთა თავდასხმის ლიდერად 33 წლის დარვიდას შერნასი მიიჩნევა. 33 წლის ფეხბურთელს პოლონეთში, თურქეთსა და ავსტრალიაში უთამაშია, ამჟამად კი ებრაული "ჰაპოელის" (კფარ-საბა) ღირსებას იცავს.

აქვე ვთქვათ, რომ ჯაბა კანკავა და ნიკა კვეკვესკირი ძალიან კარგად იცნობენ ლიტველთა 25 წლის ნახევარმცველ არტურას ზულპას, რომელიც ყაზახური "ტობოლის" ფეხბურთელია.

რას უნდა ველოდოთ ლიტვისგან?

რა თქმა უნდა, საქმე გვაქვს აწყობილ, მაგრამ საშუალოზე დაბალი კლასის გუნდთან. ლიტველთა მთავარი ღირსება სათამაშო დისციპლინაა. თუ საქართველოს ნაკრების ფეხბურთელები შეძლებენ მეტოქის ნახევარდაცვის ერთ-ორი გამორჩეული ფეხბურთელის განეიტრალებას, მაშინ ბალტიისპირელთა კრეატივისგან თითქმის აღარაფერი დარჩება.

უნდა ვერიდოთ საკუთარი საჯარიმოს ახლოს წესის დარღვევას, რადგან ლიტველთა ერთ-ერთი მთავარი კოზირი სწორედ სტანდარტული სიტუაციების კარგად გამოყენებაა. ამ დროს მათი ტანმაღალი მცველები თამამად მიდიან შეტევაში...

საქართველოს ნაკრებს ერთი ძალიან დიდი კოზირი აქვს. ლიტვის ნაკრებს სასტიკად არ უყვარს ტექნიკურად კარგად მომზადებული მეტოქე. თუ ჩვენ რაციონალურად შევძლებთ ბურთის გაგორებას, მეტოქეს არაერთი პრობლემა შეექმნება.

თქმა რად უნდა იმასაც, რომ ლიტველებს, ასე ვთქვათ, ჯაჯგურსა და "პინგ-პონგში" არ უნდა ავყვეთ. მათ ასეთი ფეხბურთი უყვართ და ეხერხებათ. თამაშის რაღაც ეტაპზე ისინი უთუოდ ეცდებიან, სწორედ ასეთ ფეხბურთში ჩაგვითრიონ.

უნდა ვირბინოთ!

ინტერნეტში ლიტვის ნაკრებზე არაერთი საინტერესო მასალა იძებნება. ყველა უცხოელი ექსპერტი ერთხმად აღნიშნავს, რომ ამ გუნდის მთავარი ღირსება კარგი ფიზიკური მომზადებაა. ვინც ერთხელ მაინც ყოფილა ლიტვაში, დაგვეთანხმება, რომ ისინი ისედაც ძალიან ბევრს დარბიან. ხუმრობა იქით იყოს და, ლიტველები ამას ძალიან კარგად აკეთებენ მინდორზე.

აქედანვე შეიძლება იმის თქმაც, რომ ისინი თბილისშიც იმავეს გააკეთებენ. ამდენად, საქართველოს ნაკრების ფეხბურთელების წინაშე დგას ორი კონკრეტული ამოცანა: 1) რაც შეიძლება მეტი დროის განმავლობაში დავტოვოთ მეტოქე უბურთოდ; 2) არ ჩამოვრჩეთ მათ დაფარულ დისტანციაში.

ლიტვის ნაკრები საქართველოსთან მატჩისთვის ასეთი შემადგენლობით ემზადება:

მეკარეები - ერნესტას სეტკუსი (ჰაპოელ ჰაიფა, ისრაელი), ვიტაუტას ჩერნიაუსკასი (ცსკა, ბულგარეთი), ედვინას გერტმონასი (რენი, საფრანგეთი);

მცველები - ეგიდიუს ველტკუნასი (ჟალგირისი), ვალდემარ ბოროვსკი (ტრაკაი), ვალდას სლავიცკასი (სუდუვა), ლინას კლიმავიჩუსი (ჟალგირისი), ედვინას გირდვანისი (ტომი, რუსეთი), როლანდას ბარავიკასი (ჟალგირისი), ალგის იანკაუსკასი (სუდუვა), იუსტინას იაშენიკისი (ტრაკაი);

ნახევარმცველები - არვიდას ნოვიკოვასი (იაგელონია, პოლონეთი), ფიოდორ ჩერნიხი (დინამო მ, რუსეთი), მანტას კუკლისი (ჟეტისუ, ყაზახეთი), არტურას ზულპა (ტობოლი, ყაზახეთი), ოვიდიუს ვერბიცკასი (სუდუვა), სიმონას პაულიუსი (ჟალგირისი), იუსტას ლასიცკასი (ზემუნი, სერბეთი), დანიელ რომანოვსკი (ჟალგირისი), მოდესტას ვორობიოვასი (ჟალგირისი);

თავდამსხმელები - დეივიდას შერნასი (ჰაპოელ კფარ-საბა, ისრაელი), ნერიუს ველსკისი (ბნეი იეჰუდა, ისრაელი), კაროლის ლაუკზემისი (სუდუვა).

ყოველდღიური სპორტული გაზეთი "ლელო"
1317
მკითხველის კომენტარები / 0 /
მსგავსი ამბები
რუბრიკის სხვა სიახლეები