უნივერსიადაზე უმედლოდ დავრჩით

60 წელი გავიდა მას შემდეგ, რაც 1959 წელს იტალიურ ნაპოლიში მსოფლიოს პირველი უნივერსიადა გაიმართა.

იმ შეჯიბრებაში საქართველოდან ორნი მონაწილეობდნენ - მოფარიკავე იური ოსიპოვი და ჩოგბურთელი ირინა რიაზანოვა, რომლებმაც ოქროს მედლები დაიმსახურეს:

მომავალმა მსოფლიოს ჩემპიონმა ოსიპოვმა (კაპიტანი) საბჭოთა რაპირისტთა ნაკრებთან (ვიქტორ ჟდანოვიჩი, იური სისიკინი და ევგენი რიუმინი) ერთად ფინალში უნგრეთის უძლიერესი გუნდი დაამარცხა 11:5, ხოლო რიაზანოვამ ერთეულებში დაიკავა პირველი ადგილი. საგულისხმოა, რომ ორივე ქართველმა კიდევ ორ უნივერსიადაში დაიმსახურა საპრიზო ადგილები. 1961 წელს სოფიაში ორ ჩვენს მოფარიკავეს სამი ვერცხლის მედალი ხვდა:

ოსიპოვი გუნდურ რაპირაში იყო მეორე, ხოლო მოხმალავე ნუგზარ ასათიანს ხმალში ერგო ორი ვერცხლი - პირადსა და გუნდურში მეორე ადგილებისთვის. 
ქართველი მოფარიკავეები ექვსი ათეული წლის შემდეგ 30-ე მსოფლიოს უნივერსიადაშიც მონაწილეობდნენ. უკვე ვწერდით, რომ მოხმალავე მიხეილ მარდალეიშვილმა მხოლოდ მეოთხედფინალური ორთაბრძოლა დათმო და მეხუთე ადგილს დასჯერდა. 

გასულ უქმეებზე კიდევ ოთხი ჩვენებური გავიდა საფარიკაო ბილიკებზე. მათგან უკეთესი შედეგი ჰქონდა მოხმალავე ლიკა ჯიჯეიშვილს: ჯგუფში მან ხუთიდან ოთხ მეტოქეს აჯობა - იულია კრეუსოტს (კანადა, 5:1), სარა ნუჩას (საფრანგეთი, 5:4), მარია ჩარტის (დიდი ბრიტანეთი, 5:2), დიანა გონსალესს (მექსიკა, 5:1) და მსოლოდ ერთი პაექრობა დათმო პოლინა კასპიაროვიჩთან (ბელარუსი, 1:5). ქართველმა მოხმალავემ პლეი-ოფში რუს ალექსანდრა კლიმოვას მოუგო - 15:7, მაგრამ კორეელ სან ჯუონისთან დამარცხდა 13:15 და მე-11 ადგილს დაყაბულდა. 58 მონაწილეს შორის 53-ე იყო თეონა გოგლიძე, რომელმაც ჯგუფში მხოლოდ ერთი მოხმალავე - მექსიკელი ვანესა ინფანტე დაჯაბნა - 5:2, რაც პლეი-ოფში გასასვლელად არ ეყო.

რაპირაში ძალებს ცდიდნენ ლუკა ღაღანიძე და ლაშა გალუაშვილი, რომლებმაც ჯგუფში კარგად იფარიკავეს, მაგრამ პლეი-ოფში საკუთარი შესაძლებლობები ბოლომდე ვერ გამოავლინეს.

20. ლუკა ღაღანიძე - ოლივერ სპლიტი (ჰოლანდია, 5:2), გრიგორი სემენიუკი (რუსეთი, 5:4), არტურ რუი კოშტა (პორტუგალია, 3:5), იოტო უენო (იაპონია, 5:4), ედვარდ ლი (კანადა, 5:1), ლუკას მოტიატი (ბელგია, 5:0), პლეი-ოფი: ბარტოშ სეგიელსკი (პოლონეთუ) - 6:15.

25. ლაშა გალუაშვილი - ბენიან მალი (ჩინეთი, 2:5), ფილიპ შონი (აშშ, 2:5), ლოვრო ბაჩოვნიკი (სლოვენია, 5:2), რიან ინ ჩუნ ჩოი (ნიკარაგუა, 5:2), ჩეოლ მიონგ სეო (კორეა, 5:2), ლუკას ტეტერისი (ლატვია, 5:0); პლეი-ოფი: ლუკას მოტიატი (ბელგია) - 15:4, გუილამ ბიანჩი (იტალია) - 5:15.
ქართველი მოფარიკავეები 15 ივლისიდან ბუდაპეშტში მსოფლიოს ჩემპიონატში ჩაებმებიან.

ყოველდღიური სპორტული გაზეთი "ლელო"
235
მკითხველის კომენტარები / 0 /
მსგავსი ამბები
რუბრიკის სხვა სიახლეები
;