უჩა სოსიაშვილი: ცვლილებები იქნება, მაგრამ...

სეზონის დასრულების შემდეგ "სამტრედია" ყურადღების ცენტრში მოექცა . საქართველოს ექსჩემპიონის საკადრო ცვლილებები ყველასთვის საინტერესოა - ვინ წავა, ვინ მოვა და რა სახეს შეიძენს უჩა სოსიაშვილის ხელში გუნდი, რომელმაც სამტრედიელებს ბოლო წლებში ფეხბურთის გემო გაახსენა.

- ჯერ სეზონი შევაფასოთ - გუნდმა მესამე ადგილი კი დაიკავა, მაგრამ გულშემატკივრებში კმაყოფილება მაინც არაა - ჩემპიონი გუნდისგან ისინი ყოველთვის ოქროს მედალს ითხოვენ.

- მუდმივად პირველ ადგილზე გასვლა შეუძლებელია. მიმაჩნია, რომ წლეულს გუნდმა კარგი შედეგი აჩვენა და გულშემატკივრებს, ფეხბურთელებსა და ხელმძღვანელობას სეზონის ბრინჯაოს მედლით დასრულებას და ევროტურნირებზე გასვლას ვულოცავ!

ბოლო სამი სეზონის განმავლობაში "სამტრედიამ" მოიპოვა ვიცეჩემპიონობა, ჩემპიონობა, სუპერთასი, გავიდა თასის ფინალში და ახლა ბრინჯაოც დავამატეთ. ასეთ მოკლე დროში ამდენი ტიტული სერიოზული მიღწევა უნდა იყოს, რადგან მანამდე მხოლოდ ერთხელ ვიყავით ვიცე-ჩემპიონები.

- როდის დაიწყებს "სამტრედია" ახალი ჩემპიონატისთვის მზადებას?

- 10 იანვრისთვის შევიკრიბებით და ვარჯიშს სამედიცინო შემოწმების შემდეგ დავიწყებთ.

- სად მოემზადებით?

- ეს კლიმატურ პირობებზე იქნება დამოკიდებული. ჩვენი მიზანია, იქ მოვემზადოთ, სადაც ამინდი ხელს შეგვიწყობს და სადაც ვარჯიში უფრო მოხერხებული იქნება. პირველ ეტაპს ნებისმიერ შემთხვევაში საქართველოში გავივლით, მეორეს კი საზღვარგარეთ ვგეგმავთ.

- ამ დროისთვის გუნდში დიდი ცვლილებები იქნება? სეზონის დასრულების შემდეგ გუნდის საკადრო ცვლილებებზე მხოლოდ ისაა ცნობილი, რომ დათო ჯიქიამ და ბაქარ ბალდემ დაგტოვეს.

- ცვლილებები იქნება, მაგრამ ჯერ ბევრი რამ არის გადასაწყვეტი.
- კონკრეტულად რა არის გადასაწყვეტი?

- ფეხბურთელებთან კონტრაქტები დეკემბრის ბოლომდე გვაკავშირებს. ოფიციალურად ვინმეს გაშვება ან დამატება ამის შემდეგ გადაწყდება. ჯერ კი ტრანსფერებზე ვერაფერს გეტყვით.

- მაგრამ ჩანაფიქრი გექნებათ.

- რა თქმა უნდა, მაგრამ ფეხბურთელებსაც უნდა დაველაპარაკოთ და გავიგოთ, ვის სურს ჩვენს გეგმებში მონაწილეობა და ვინ აპირებს წასვლას.

- სამტრედიელ გულშემატკივრებში ცნობილია, რომ გუნდი ომარ მიგინეიშვილის, დავით რაჟამაშვილისა და ლეგიონერების გარდა, ყველამ დატოვა...

- ყველამ იცოდეს, რომ ეს არასწორი ინფორმაციაა. ჩვენ საკმაოდ კარგი ფეხბურთელები გვყავს და მათთან მუშაობა გვსურს. მაგრამ კონტრაქტები იმის გათვალისწინებით გაფორმდება, ჩვენ ვის რა პირობებს შევთავაზებთ და ვის ექნება სურვილი, "სამტრედიას" წინადადებას დათანხმდეს.

- ლეგიონერებიდან კლასით ინტერს გიი და მაიკლ ოლაიტანი გამოირჩეოდნენ და მათ დატოვებას თუ ეცდებით?

- შემიძლია გითხრათ, რომ ორივე მათგანმა თავი კარგად გამოავლინა და "სამტრედიაში" დარჩებიან, სხვაზე კი ჯერ ვერაფერს ვიტყვი. გიიც და ოლაიტანიც არა მხოლოდ თითით საჩვენებელი მოთამაშეები არიან, არამედ, სხვებს პროფესიონალიზმის მაგალითსაც აძლევენ - თანაც, არა მხოლოდ მოედანზე, არამედ, მის გარეთაც.

- ცნობილია ფეხბურთის ფედერაცის პროექტი, რომ ეროვნული ლიგის გუნდებმა მხოლოდ ბუნებრივ საფარზე ითამაშონ - სამტრედიის "ეროსი მანჯგალაძეზე" საფარის შეცვლა იგეგმება თუ ახალი სეზონიდან დროებით სხვა სტადიონზე ითამაშებთ?

- მეც ასე ვიცი, რომ საფარს ფედერაცია დააგებს და ეს ფეხბურთის ფედერაციისა და ადგილობრივი ხელისუფლებების ერთობლივი პროექტია. დანარჩენ დეტალებზე ვერაფერს გეტყვით, ვინ რა თანხას დებს და სამუშაოები კონკრეტულად როდის დაიწყება და დასრულდება. მაგრამ დარწმუნებული ვარ, ყველაფერი გაკეთდება საიმისოდ, "ეროსი მანჯგალაძეზე" საფარი დროულად რომ დაიგოს და "სამტრედიამ" თავის ქალაქში ითამაშოს.

ყოველდღიური სპორტული გაზეთი "ლელო"
1157
მკითხველის კომენტარები / 0 /
მსგავსი ამბები
რუბრიკის სხვა სიახლეები
;