უჩვეულო ამბავი - ხინჩეგაშვილის მარცხი

დასასრულს უახლოვდება გერმანიის ალტერნატიული ბუნდესლიგის - რინგერლიგის გათამაშება ჭიდაობაში.

ნაახალწლევს დაიწყო ნახევარფინალური ეტაპის პაექრობები, სადაც, როგორც ადრე გაუწყეთ, საკვალიფიკაციო ეტაპის ხუთი მონაწილიდან ოთხი საუკეთესო გავიდა. ბუნებრივია, ყველა მათგანში ირიცხებიან ჩვენები, მაგრამ ნაახალწლევს მათ უმეტესობას არ უჭიდავია, რადგან საქართველოს ჩემპიონატისთვის ემზადებიან. შეგახსენებთ, რომ ქვეყნის პირველობას 10-13 იანვარს თბილისის გივი კარტოზიას სახელობის სპორტის ძველი სასახლე უმასპინძლებს.

როგორც გითხარით, რინგერლიგაში ნახევარფინალური შეხვედრები დაიწყო და გაიმართა პირველი ორთაბრძოლები. მათზე თხრობას „ისპრინგენი“-“გერმანიან ვაინგარტენის“ წყვილით დავიწყებთ, სადაც ჩვენთვის არცთუ სასურველი, მსოფლიოს ჭიდაობისთვის კი იშვიათი ამბავი მოხდა - დამარცხდა „ისპრინგენის“ შემადგენლობაში მოჭიდავე მსოფლიოსა და ოლიმპიური, ევროპის სამგზის ჩემპიონი ვლადიმერ ხინჩეგაშვილი.

ჩვენებური ჯერ ხომ ისედაც ახალი გადასულია ახალ წონაში - 65 კილოგრამში, თუმცა ბუნდესლიგაში სულ სხვა წონითი კატეგორია - 67 კილოგრამია და გასაგებია ჩვენებურის მარცხი: ის ახალ წონასთან ჯერ კიდევ არაა ადაპტირებული, ხოლო კიდევ უფრო მძიმე წონაში გამოსვლა გაცილებით რთულია. თანაც, ჯერ ფორმაშიც არაა და გასაგებია მისი მარცხი კუბელ ალეხანდრო ტობიერ ვალდესთან: 0:4. ამ დაპირისპირებაში სხვა ქართველებს მონაწილეობა არ მიუღიათ იმის მიუხედავად, რომ ორივე გუნდში გამოდიან ჩვენებურები.

ისინი განსაკუთრებით ბლომად „ისპრინგენში“ ჭიდაობენ, რომლის ღირსებასაც დავით ტლაშაძე, რევაზ ნადარეიშვილი, რობერტ კობლიაშვილი და მძიმეწონოსანი ზვიად პატარიძე იცავენ, „ვაინგარტენში“ კი  ჯუმბერ ყველაშვილი ჭიდაობს. თავად შეხვედრა დიდი ძალისხმევით მასპინძელმა „ისპრინგენმა“ მოიგო - 11:10, თუმცა, ამის მიუხედავად, განმეორებით შეხვედრაში მას ფრიად გაუჭირდება „გერმანულ ღვინის ბაღებში“ (ასე ითარგმნება მათი მეტოქის სახელი) გასეირნება.

მეორე ნახევარფინალურ წყვილში „შიფერშტადტი“ და „ნენდინგენი“ გავიდნენ. მათ პაექრობაშიც მხოლოდ ერთმა ქართველმა იჭიდავა, მაგრამ ისიც ყაზახეთის სახელით გამოდის - ცოტნე ბარამიძე და ისიც დამარცხდა: უკრაინელ ანდრეი კვიარტკოვსკისთან 0:2 წააგო. ქართველები ამათაც ჰყავთ. „შიფერშტადტში“ რამაზ ზოიძე და ზურაბ ერბოწონაშვილი ასპარეზობენ, „ნენდინგენში“ კი ზურაბ იაკობიშვილი და ბრუნეის სასულთნოში გადასული გიორგი საკანდელიძე გამოდიან.

ეს პაექრობა „შიფერშტადტმა“ მოიგო დიდი უპირატესობით - 21:5 და განმეორებითი შეხვედრისთვის ჩინებული განწყობა შეიქმნა, თითქმის გაინაღდა ფინალში გასვლა.

განმეორებითი ნახევარფინალური შეხვედრები 12 იანვარს გაიმართება.

ყოველდღიური სპორტული გაზეთი "ლელო"
983
მკითხველის კომენტარები / 0 /
მსგავსი ამბები
რუბრიკის სხვა სიახლეები
;