ფალავნები მეტეხის არენაზე

სოფელ მეტეხის (კასპის მუნიციპალიტეტი) ქართული ჭიდაობის არენაზე 4 ოქტომბერს ქართლის რეგიონის ფალავნები შეიკრიბნენ. გუნდურ პირველობაზე კასპის, გორის, ქარელის და ცხინვალის გუნდები ივანე ბოჭორიძის სახელობის თასის მოსაპოვებლად იბრძოდნენ.

ივანე ბოჭორიძე ქართული სპორტის მოღვაწე გახლდათ. მის სახელთანაა დაკავშირებული საქართველოს სხვადასხვა კუთხეში სპორტული ობიექტების მშენებლობა. წლეულს ამ ადამიანის დაბადებიდან 100 წელი შესრულდა და მისი ოჯახისა და კასპის საჭიდაო სამყაროს წარმომადგენლებმაც სწორედ ამ თარიღთან დაკავშირებით მოაწყვეს საინტერესო და წარმომადგენლობითი შეჯიბრება. განსაკუთრებული წვლილი შეჯიბრების ჩატარებაში ღვაწლმოსილი ადამიანის შვილიშვილს ბატონ ირაკლი ბოჭორიძეს მიუძღვის.

ოთხივე გუნდში გამოდიოდნენ ტიტულოვანი სპორტსმენები, ჩვენი ქვეყნის ჩემპიონები. ძიუდოში, სამბოსა და ქართულ ჭიდაობაში საერთაშორისო შეჯიბრებების გამარჯვებულები.

ირაკლი ბოჭორიძე აჯილდოებს აბსოლუტურში გამარჯვებულ გიორგი პაპუნაშვილს

პირველობა არავის დაუთმეს კასპელებმა, რომლებმაც ჯერ გორის, ფინალში კი ქარელის გუნდები დაამარცხეს. თავის მხრივ ქარელმა ფინალამდე ცხინვალს სძლია.
გადამწყვეტი დაპირისპირება კასპის და ქარელის გუნდებს შორის დაძაბული გამოდგა. ტრისტან ფეიქრიშვილის (66 კგ) და გიორგი კაციაშვილის (80) გამარჯვებებით ორჯერ დაწინაურდნენ მასპინძლები, მაგრამ შალვა გაზაშვილის (73) და დავით იმერლიშვილის (90) მოგებებით ორივეჯერ შეძლო ქარელმა გათანაბრება.

პირველი ადგილის მფლობელი გუნდის ვინაობა მძიმე წონის მოჭიდავეებს უნდა გაერკვიათ კახაბერ გაზაშვილმა (ქარელი) და გიორგი კობაიძემ (კასპი) ერთობ დაძაბული პაექრობა აჩვენეს მეტეხის მაყურებლით სავსე საჭიდაო არენას. ქულებით წარმატების მოპოვება კობაიძემ შეძლო და თასიც 1200 ლარიან ფულად ჯილდოსთან ერთად კასპელებს ჩაბარდათ. 800 ლარი და მიიღო ქარელმა.

გამარჯვებულ კასპის გუნდს (კაპიტანს ამირან იანვარაშვილს) გადასცემენ ივანე ბოჭორიძის თასს

მესამე ადგილისთვის დაპირისპირებაში გორელმა მოჭიდავეებმა ცხინვალს 4:1 სძლიეს. ცხინვალის გუნდის სპორტსმენებს 400 ლარი და სამხრეთ ოსეთის ადმინისტრაციის ხელმძღვანელისგან დიმიტრი სანაკოევისგან - ყოჩი ერგოთ.

გაგაცნობთ გამარჯვებული გუნდის შემადგენლობას: ტრისტან ფეიქრიშვილი, გიორგი გუგულაშვილი, გიორგი კაციაშვილი, ამირან იანვარაშვილი, გიორგი კობაიძე. მწვრთნელი: ნუგზარ მამულაშვილი.

გუნდური შეჯიბრების შემდეგ აბსოლუტური პირველობა ჩატარდა, სადაც უკვე გორელმა მოჭიდავემ გიორგი პაპუნაშვილმა იმარჯვა. ფინალში მან ქარელელი დავით იმერლიშვილი დაამარცხა.

1019
მკითხველის კომენტარები / 0 /
მსგავსი ამბები
რუბრიკის სხვა სიახლეები