ფარიკაობა. ბაზაძე მსოფლიოს თასის ფინალში

11 ქვეყნის 46 მოხმალავე მონაწილეობდა მსოფლიოს თასის (სატელიტი შეჯიბრება) გათამაშებაში, რომელსაც სასპორტო კომპლექსმა "არენამ" უმასპინძლა.

ჯგუფურ ეტაპზე შესანიშნავად იასპარეზეს მიხეილ მარდალეიშვილმა, სანდრო და ბექა ბაზაძეებმა. სანდრომ ექვს მეტოქეს სძლია:

კონსტანტინ ბონფელდს (ისრაელი, 5:0), მანუელ ბაამონდეს (ჩილე, 5:1), ელვინ რზაზადეს (აზერბაიჯანი, 5:1), სერგეი ანისკოვს (ყაზახეთი, 5:2), ვიაჩასლა ლუკიანცოუს (ბელარუსი, 5:3) და აარონ ჰუ ზე ლონგს (ჰონკონგი, 5:1).

ხუთ-ხუთ გამარჯვება მოიპოვეს ბექა ბაზაძემ (დაჯაბნა ჩილელი რიკარდო ალვარესი-5:0, პოლონელი იაკუბ ოსინსკი-5:1, აზერბაიჯანელი ხალიდ ასადოვი-5:2, ყაზახი მიხამე რახმანალი-5:2, ბელარუსი ულაძი შაიმარდანაუ-5:3) და მიხეილ მარდალეიშვილმა (დაამარცხა ბელარუსი მაქსიმ პინჩუკი-5:0, ამერიკელი ტომაშ კოლასა-5:3, ჩილელი დანიელ რამირესი-5:1, ირანელი ნიმა ზაჰედი-5:3 და ყაზახი ნუჟან კარიმი-5:4).

ხუთ მოწინააღმდეგეს მოუგო (ბელარუს სიარჰეი კისელს-5:2, ამერიკელ დენიზ ბერკაის-5:3, ბელარუს ანდრეი ვასკოს-5:2, ქართველ გიორგი ჭუმბურიძეს-5:2 და ჰონკონგელ კიტ ჰიუ ლის-5:1) და მხოლოდ ერთი ორთაბრძოლა დათმო (ირანელ ალი პაკდამანთან-3:5) საბა სულამანიძემ.

ამ ოთხეულთან ერთად პლეი ოფში გავიდნენ ვაჟა რეჭია და ნიკა შენგელია, რომლებმაც ჯგუფში, შესაბამაისად, სამ და ორ მეტოქეს სძლიეს, დანარჩენი შეხვედრები კი დათმეს.

თუმცა, მათ ვერც პლეი ოფში იყოჩაღეს: პირველსავე ორთაბრძოლაში რეჭია ნიმა ზაჰედისთან (ირანი, 8:15) დამარცხდა, ხოლო შენგელიამ ტურნირის მომავალ გამარჯვებულთან - მოჰამად რახბარისთან (ირანი) წააგო - 7:15.

სულამანიძემ მანუელ ბაამონდე (ჩილე, 15:10) დაჯაბნა, მაგრამ თურქ ენვერ ილდირიმთან ვერაფერს გახდა - 13:15. ამ უკანასკნელს მეოთხედფინალში აჯობა (15:12) სანდრო ბაზაძემ, რომელმაც მანამდე გზიდან მაქსიმ პინჩუკი (ბელარუსი, 15:11) და აარონ ჰუ ზე ლონგი (ჰონკონგი, 15:10) ჩამოიცილა.

პლეი ოფში მას შემდეგ, რაც მიხეილ მარდალეიშვილმა ჯავანს აგაკიშიევსა (აზერბაიჯანი, 15:8) და სერგეი ანისკოვს (ყაზახეთი, 15:5), ხოლო ბექა ბაზაძემ დამირ იბრაგიმოვსა (ყაზახეთი, 15:9) და ანტონ დავიდჟენკას (ბელარუსი, 15:13) სძლიეს, ნახევარფინალში გასასვლელად ერთმანეთს დაუპირისპირდნენ.

დაძაბულ პაექრობაში მარდალეიშვილმა 15:14 გაიმარჯვა. ორ ქართველთან ერთად საუკეთესო ოთხეულში მოხვდნენ ირანელები - მოჰამად რახბარი და ალი პაკდამანი, რომლებმაც, ასევე, ყველა შეხვედრა მოიგეს. და ეს არ ყოფილა შემთხვევითი, რადგან მსოფლიოს კლასიფიკაციით პაკდამანი მე-13-ეა, სანდრო ბაზაძე - მე-18, რახბარი - 21-ე და მარდალეიშვილი 67-ე.

ნახევარფინალში რახბარიმ იოლად მოუგო მარდალეიშვილს - 15:9, სანდრო ბაზაძემ პაკდამანს სძლია - 15:13. ფინალში იგი რახბარისაც უგებდა, მაგრამ ირანელმა ჯერ წონაწორობა აღადგინა - 14:14, შემდეგ კი ბოლო შეტევაც შედეგიანად წარმართა და გაიმარჯვა. მესამე ადგილებზე მიხეილ მარდალეიშვილი და ალი პაკდამანი გავიდნენ.

- მსოფლიოს თასის მაღალ დონეზე ორგანიზება შევძელით, - გვითხრა საქართველოს ფარიკაობის ფედერაციის პრეზიდენტმა ზაზა მჭედლიძემ. - ძალიან გვინდოდა, მთავარი პრიზი თბილისში დარჩენილიყო, მაგრამ...

შედეგით მაინც კმაყოფილი ვარ, რადგან ჩვენი მოხმალავეებისთვის ეს ახალ სეზონში პირველი შეჯიბრება იყო. როგორც პაექრობებმა გვიჩვენა, ურიგოდ არ არიან მომზადებული.

რაც მთავარია, აქ აღებული ქულებით სანდრო ბაზაძე რეიტინგში რამდენიმე საფეხურით დაწინაურდება და 16 საუკეთესოში მოხვდება, ეს კი მას 2-4 თებერვალს პადოვაში (იტალია) მოხმალავეთა მსოფლიოს თასის პირად-გუნდურ გათამაშებაში (საქართველოს ნაკრები:

სანდრო და ბექა ბაზაძეები, მიხეილ მარდალეიშვილი, საბა სულამანიძე) შესაძლებლობას მისცემს, პირდაპირ პლეი ოფში ჩაებას. ჩვენთვის, ასევე, მნიშვნელოვანია გუნდურში კარგი გამოსვლა, რადგან სათანადო სარეიტინგო ქულები მოვაგროვოთ ტოკიოს 2020 წლის ოლიმპიურ თამაშებში მოსახვედრად.

იქ კი მედლებისთვის პლანეტის 16 საუკეთესო ნაკრები იბრძოლებს.

ყოველდღიური სპორტული გაზეთი "ლელო"
961
მკითხველის კომენტარები / 0 /
მსგავსი ამბები
რუბრიკის სხვა სიახლეები
;