ფარიკაობა. ბულგარეთის ტურნირი: პირადში ათეულს ვერავინ უწია 

საქართველოს თერთმეტი წარმომადგენელი მონაწილეობდა 23 წლამდელ მოფარიკავეთა ევროპის ჩემპიონატში, რომელსაც ბულგარულმა პლოვდივმა უმასპინძლა.

უკვე ვწერდით, რომ მოხმალავე ვაჟთა ინდივიდუალურ შეჯიბრებაში შარშანდელი მსგავსი პირველობის ვერცხლის პრიზიორმა ნიკა შენგელიამ 27-ე ადილი დაიკავა, გოგა კაკაურიძე 39-ე, ვაჟა რეჭია 41-ე და ნიკოლოზ ჭეიშვილი 46-ე ადგილებით დაკმაყოფილდნენ. დაშნით მოფარიკავე მარია ზაკირჩენკო 67-ე ადგილს დასჯერდა.

ტურნირის პირად პირველობაში ქართველთაგან საუკეთესო იყო რაპირით მოფარიკავე ლუკა ღაღანიძე. ჯგუფში მან ოთხი შეხვედრა მოიგო და ორი დათმო: ღაღანიძე - დანიილ კიში (უნგრეთი, 5:2), მორიც რინერი (გერმანია, 5:4), ლეო სმრეკარი (ხორვატია, 5:4), ლიუბოსლავ მლადენოვი (ბულგარეთი, 5:0), ანდრეი რზადკოვსკი (პოლონეთი, 3:5), კირილ ბოროდაჩევი (რუსეთი, 1:5). პლეი ოფი: ფრანჩესკო ინგარგიოლა (იტალია) - 15:6, ისკანდერ ახმერტოვი (რუსეთი) - 12:15. საბოლოოდ ლუკამ მე-14 ადგილი დაიკავა. 53-ე იყო ლაშა გალუაშვილი, რომელმაც ჯგუფში მხოლოდ შვედ სებასტიან პერსონს სძლია 5:1 და პლეი ოფში ვერ მოხვდა. 

გოგონათა ჩემპიონატში მე-17 ადგილზე გავიდა ლიკა ჯიჯეიშვილი, არადა, ჯგუფში მან ხუთივე მეტოქე დაამარცხა, თუმცა პლეი ოფის პირველივე ორთაბრძოლა უკრაინელ მარგარიტა სმირნოვასთან წააგო - 5:15. ჯგუფში 6-6 შეხვედრიდან თამარ ჩარკვიანმა სამი, თეონა გოგლიძემ და ანა აფრასიძემ 2-2 პაექრობაში მიაღწიეს წარმატებას, თუმცა პლეი ოფის პირველ წრეს ვერც ისინი გასცდნენ:

გოგლიძე - მარია ციმბოტა (უკრაინა) 8:15, ჩარკვიანი - მიჩელა ბატისტონი (იტალია) 12:15, აფრასიძე - მარგარიტა სმირნოვა (უკრაინა) 11:15. საბოლოოდ: 28. თამარ ჩარკვიანი, 33. თეონა გოგლიძე, 34. ანა აფრასიძე. 

ოთხივე ქართველმა გოგონამ გუნდურშიც იასპარეზა, მაგრამ ხელი მოეცარათ - თერთმეტ ნაკრებს შორის მეათეზე გავიდნენ: ჯერ ესპანეთთან წააგეს 42:45, მერე გერმანიასთან დამარცხდნენ - 37:45.

მოხმალავე ვაჟთა ნაკრებმა (ნიკა შენგელია, ვაჟა რეჭია, გოგა კაკაურიძე, ნიკოლოზ ჭეიშვილი) პირველ წრეში ესპანეთი დაჯაბნა - 45:34. ჩვენი ბიჭები მეორე შეხვედრაშიც ახლოს იყვნენ გამარჯვებასთან - ბოლო ორთაბრძოლის წინ რუსებს 40:39-ს უგებდნენ, მაგრამ გადამწყვეტი პაექრობა შენგელიამ ანატოლი კოსტენკოსთან 0:6 დათმო. მერე საქართველოს ნაკრები უკრაინასთანაც დამარცხდა 42:45 და მე-7 ადგილს დასჯერდა. 

ყოველდღიური სპორტული გაზეთი "ლელო"
202
მკითხველის კომენტარები / 0 /
მსგავსი ამბები
რუბრიკის სხვა სიახლეები
;