ფარიკაობა. ევროპის ჩემპიონატზე ნიკა შენგელია ვერცხლის მედალი მოიპოვა

შარშან მინსკში 23-წლამდელ მოფარიკავეთა ევროპის ჩემპიონატზე საქართველოს მოხმალავე ვაჟთა ნაკრებმა ოქროს მედალი მოიპოვა, ხოლო რაპირით მოფარიკავე ლუკა ღაღანიძემ მე-3 ადგილი დაიკავა.

ამჟამად მსგავს შეჯიბრებას სომხეთის დედაქალაქი ერევანი მასპინძლობს. მედლებისთვის ბრძოლაში ქართველი მუშკეტერებიც ჩაებნენ. ასპარეზობის პირველ დღეს თავი გამოიჩინა ნიკა შენგელიამ, რომელმაც მხოლოდ ფინალური პაექრობა დათმო და ვერცხლის მედალი დაიმსახურა.

არადა, ქართველმა მოხმალავემ ჯგუფში ორთაბრძოლები გაუბედავად დაიწყო - ექვსიდან მხოლოდ სამი შეხვედრა მოიგო: სძლია ფრანგ ბაპტისტ დუბარის (5:4), ბელგიელ ადრიან პოიზატისა (5:1) და ესპანელ ორიოლ ფარეს (5:0), ხოლო კონსტანტინ ვორონოვთან (ისრაელი, 0:5), ილია სიომინსა (რუსეთი, 3:5) და დომენიკ კოჩისთან (გერმანია, 2:5) ვერაფერს გახდა.

სამაგიეროდ, ნიკა შეუდარებელი იყო პლეი ოფში, სადაც ზედიზედ გზიდან ჩამოიცილა რუსები - კირილ ტროფიმოვი (15:9) და ვასილი შირშოვი (15:14). მერე მათს გზას გაუყენა კონსტანტინ ვორონოვი (15:14), რითაც ჯგუფში მარცხისთვის რევანში აიღო. ნახევარფინალში ბაპტისტ დუბარის აჯობა - 15:12, გადამწყვეტი პაექრობა კი იტალიელ დარიო კავალიერესთან დათმო (6:15) და ვერცხლის მედალს დასჯერდა.

მოხმალავეთა შეჯიბრებაში კიდევ სამი ქართველი გამოდიოდა. ვაჟა რეჭიამ ჯგუფში ექვსიდან ოთხი მეტოქე დაჯაბნა - პაულ მონახი (გემანია,5:4), ჰუბა გემეში (უნგრეთი, 5:1), ედენ ანიკი (საფრანგეთი, 5:4) და ემილ დე ვისჩერი (ბელგია, 5:2), ხოლო მომავალ ჩემპიონ დარიო კავალიერესა (იტალია, 1:5) და სტეფან ბულდეევთან (ბულგარეთი, 3:5) წააგო, მერე პლეი ოფში პირველივე შეხვედრა დათმო ბრინჯაოს პრიზიორ დმიტრი დანილეკოსთან (რუსეთი, 10:15) და საბოლოოდ 23-ე ადგილი დაიკავა.

ნიკოლოზ ჭეიშვილმა და საბა სულამანიძემ საკუთარი შესაძლებლობები ვერ წარმოაჩინეს - ჯგუფში მხოლოდ თითო ორთაბრძოლაში გაიმარჯვეს, შესაბამისად, ევგენი ტრიფონოვსა (უკრაინა, 5:2) და მათეუშ გოდლევსკისთან (პოლონეთი, 5:3), დანარჩენებში დამარცხდნენ, პლეი ოფში ვერ გავიდნენ და მეორმოცე-ორმოცდამეერთე ადგილები გაიყვეს. კვარცხლბეკზე კი ავიდნენ: 1. დარიო კავალიერე (იტალია), 2. ნიკა შენგელია (საქართველო), 3. ბაპტისტე დუბარი (საფრანგეთი), დმიტრი დანილენკო (რუსეთი).

ქალთა დაშნაში ძალებს ცდიდა ქუთაისელი მარიამ ზაკირჩენკო. ჯგუფში მან დაამარცხა ემა პოღოსოვა (სომხეთი, 5:4), ვიკტე აზუკაიტე (ლიტვა, 5:3) და კატერინა მალვიკი (ნორვეგია, 5:1), ხოლო სამი შეხვედრა ჟინევრა ნოატოსთან (იტალია, 1:5), კრისტინა იასინსკაიასა (რუსეთი, 2:5) და კორალი ვიტალისთან (საფრენგეთი, 3:5) წააგო.

პლეი ოფში ლიზავეტა ხლისტუნოვას (ბელარუსი, 15:14) აჯობა, მაგრამ პოლონელ ბარბარა რუცის (4:15) ვერ გასცდა და 30-ე ადგილზე გავიდა. ჩემპიონობა პოლონელმა ალექსანდრა ზამაჩოვსკამ მოიპოვა, რომელმაც ფინალში იტალიელი რობერტა მარზანი დაამარცხა. ბრინჯაოს მედლები მარია ობრაზცოვასა და კიმ ჟასმინ ბუჩის (შვეიცარია) ერგოთ.

30-ე ადგილს ვერ ასცდა რაპირით მოფარიკავე მარიამ ცუხიშვილი. აქ პირველ-მესამე ადგილებზე მარტინა სინიგალია (იტალია), მარია ბოლდორი (რუმინეთი), ევა ლაჩერი (საფრანგეთი) და ელიზაბეტა ბიანჩინი (იტალია) გავიდნენ.

დღეს ერევნის საფარიკაო ბილიკებზე პირად პირველობაში მედლებისთვის რაპირისტი ვაჟები (ლუკა ღაღანიძე, ლაშა გალუაშვილი, გიორგი ჭუმბურიძე) და მოხმალავე გოგონები (ლიკა ჯიჯეიშვილი, მარიამ აფციაური, ანა აფრასიძე) იბრძოლებენ.

ყოველდღიური სპორტული გაზეთი "ლელო"
812
მკითხველის კომენტარები / 0 /
მსგავსი ამბები
რუბრიკის სხვა სიახლეები
;