ფარიკაობა. ევროპის ჩემპიონატი კარგად ვერ დავიწყეთ

ნოვი სადში (სერბეთი) დაიწყო მოფარიკავეთა ევროპის ჩემპიონატი, რომელშიც საასპარეზოდ საქართველოს შვიდი წარმომადგენელი გაემგზავრა.

ორმა მათგანმა უკვე დაასრულა შეჯიბრება. რაპირით ფარიკაობაში 23-წლამდელთა შორის ევროპის 2017 წლის ბრინჯაოს პრიზიორმა ლუკა ღაღანიძემ ჯგუფში ექვსიდან სამ მეტოქეს სძლია:

დაამარცხა ლაჩლან სიკესი (ისრაელი, 5:1, იოაჰიმ ლეკოკო (ბელგია, 5:4) და რობერტ მური (პორტუგალია, 5:4), ხოლო მიხალ სიესთან (პოლონეთი, 1:5), მარკუს მეპსტიდსა (დიდი ბრიტანეთი, 1:5) და დანიელე გამოზოსთან (იტალია, 4:5), რომელმაც მერე ევროპის ჩემპიონატის ვერცხლის მედალი მოიპოვა, დამარცხდა. თუმცა სამი მოგებით პლეი ოფში მაინც გავიდა.

იქ კი პირველივე პაექრობა პოლონელ მიხალ სიესთან დათმო 11:15 და საბოლოოდ 41-ე ადგილი დაიკავა. კვარცხლბეკზე ავიდნენ: 1. ალექსეი ჩერემისინოვი (რუსეთი), 2. დანიელე გაროზო (იტალია), 3. ალექსანდრ ჩოუპენიტჩი (ჩეხეთი) და ჯორჯო ავოლა (იტალია).

მოხმალავე ქალებს დაუპირისპირდა 18 წლის ლიკა ჯიჯეიშვილი. მართალია, წლეულს მან 23-წლამდელთა ევროპის ჩემპიონატზე მე-6 ადგილი დაიკავა, მაგრამ უფროს ასაკში წარმატების მისაღწევად, ეტყობა, ჯერ ოსტატობა და გამოცდილება არ ჰყოფნის. ჯიჯეიშვილმა ჯგუფში ექვსივე ორთაბრძოლა დათმო:

იანა ეგორიანთან (რუსეთი, 1:5), ევგენია მელიუშჩენკოსთან (ისრაელი, 3:5), დენიზ სელინ უნლუდაღთან (თურქეთი, 3:5) ახალგაზრდებში მსოფლიოს ჩემპიონ ლიზა პუშტაისთან (უნგრეთი, 4:5), დარია ანდრეევასთან (ბელარუსი, 4:5) და საბოლოოდ 52-ე ადგილს დასჯერდა.

შეგახსენებთ, რომ შარშან მსგავს შეჯიბრებას თბილისმა უმასპინძლა. საქართველოს დედაქალაქში მოხმალავე ქალთა პაექრობა თეოდორა კახიანმა მოიგო.

იგი ამჟამად ამერიკაში ცხოვრობს და, როგორც გვითხრეს, ევროპაზე ჩამოსასვლელად ვიზის პრობლემა ვერ მოაგვარა. ნოვი სადში ჩემპიონობა რუსმა სოფია ველიკაიამ მოიპოვა. ფინალში მან ფრანგი სესილია ბერდერი დაამარცხა. ბრინჯაოს მედლები მართა პუდას (პოლონეთი) და სვეტლანა შეველიოვას (რუსეთი) ერგოთ.

ქართველთაგან დღეს საფარიკაო ბილიკებზე გავლენ მაია გუჩმაზოვა (დაშნა) და მოხმალავე ვაჟები - რიოს ოლიმპიადის მონაწილე, ახალგაზრდებში კონტინენტის პირველობების სამგზის გამარჯვებული და შარშანდელი ჩემპიონატის მესამე პრიზიორი სანდრო ბაზაძე, მისი ძმა ბექა ბაზაძე, მიხეილ მარდალეიშვილი და 23-წლამდელებში ევროპის წლევანდელი ვიცე ჩემპიონი ნიკა შენგელია.

ყოველდღიური სპორტული გაზეთი "ლელო"
795
მკითხველის კომენტარები / 1 /
Masina
0
ბაზაძეს ვულოცავ ბრინჯაოს, მაგრამ ჰარტუნგს როგორ ვერ უნდა მოუხერხოს რამე, სულ მარცხდება მაგასთან :( რაც შეეხება კახიანს, საწყენია, რომ არ ჩავიდა. ვიზის ვერსია სისულელეა, ბარე 2-3 თვე იქნება, სერბეთში ვიზა აღარ გვჭირდება საქართველოს მოქალაქეებს...
მსგავსი ამბები
რუბრიკის სხვა სიახლეები
;