ფარიკაობა. ინტერვიუ მერაბ ბაზაძესთან: ოლიმპიადაზე მედლებისთვის? რატომაც არა!

რამდენიმე დღის წინათ ჩინეთში მოფარიკავეთა მსოფლიოს ჩემპიონატში შესანიშნავად იასპარეზა მოხმალავე ვაჟთა ნაკრებმა (სანდრო და ბექა ბაზაძეები, მიხეილ მარდალეიშვილი და ვაჟა რეჭია), რომელმაც გუნდური მე-4 ადგილი დაიკავა, რაც ქართული სპორტის ისტორიაში სენსაციური შედეგია.

ჩინურ ბატალიებზე გუშინ საქართველოს მოფარიკავეთა ნაკრების მთავარ მწვრთნელ მერაბ ბაზაძეს ვესაუბრეთ.

- მსოფლიოს ჩემპიონატისთვის საფუძვლიანად მოვემზადეთ, - გვითხრა მან. - საქართველოს ფარიკაობის ფედერაციის ხელშეწყობით ჯერ თბილისში ვივარჯიშეთ, შემდეგ ტაილანდში გვქონდა ერთკვირიანი საწვრთნელი შეკრება, რომელმაც დადებითად იმოქმედა ბიჭების ფიზიკურ და ტაქტიკურ მომზადებასა და აკლიმატიზაციაზე, ამიტომ, ამ მხრივ, პრობლემები არ გვქონია.

- ამ ფონზე, ცხადია, ინდივიდუალურში უკეთეს შედეგებს ველოდით...

- გეთანხმებით. მით უმეტეს, რომ სანდრო ბაზაძემ წლეულს ევროპის ჩემპიონატზე ზედიზედ მეორედ მოიპოვა ბრინჯაოს მედალი. ჩინეთშიც კვალიფიკაცია შესანიშნავად გაიარა - ჯგუფში ხუთივე მეტოქე დაამარცხა, მათ შორის - ფრანგი მაქს ლამბერტი (5:3) და პირდაპირ 64 საუკეთესოში დაიბევა ადგილი, სადაც პირველი შეხვედრა რუმინელ ალინ ბადეასთან გამართა.

სანდროს კარპატელისთვის არაერთხელ მოუგია და ახლაც წარმატებას ველოდით. ასეც იქნებოდა, მიკერძოებული მსაჯობა რომ არა. ასეთი დონის შეჯიბრებაზე ოთხ დარტყმას რომ არ ჩაგითვლიან, ცხადია, გამარჯვებაზე ლაპარაკიც ზედმეტია.

ბექამ საკვალიფიკაციო ეტაპზე ხუთიდან სამ მეტოქეს სძლია, პლეი ოფში კი იტალიელმა ებრიკო ბერემ აშკარად აჯობა. უკეთეს შედეგს ველოდი მიხეილ მარდალეიშვილისგან, რომელსაც ბევრად მეტი შეუძლია და ეს მან გუნდური შეჯიბრებისას დაამტკიცა.

რაც შეეხება ვაჟა რეჭიას, ის შეჯიბრების დებიუტანტი იყო. ახალგაზრდა სპორტსმენმა ჩემპიონატის ფსიქოლოგიურ დატვირთვას და დაძაბულობას ვერ გაუძლო, სამაგიეროდ, ნიჭიერმა მოფარიკავემ სამომავლოდ კარგი გამოცდილება შეიძინა.

- ჩემპიონატში ორი ქართველი მოხმალავე ქალიც გამოდიოდა.

- 2017 წლის ევროპის ჩემპიონი თეოდორა კახიანი და 18 წლის ლიკა ჯიჯეიშვილი. ამ უკანასკნელმა, ახალგაზრდული ასაკის მიუხედავად, კარგად გაართვა თავი უფროსებთან ორთაბრძოლებს და ჯგუფში ექვსიდან ოთხი შეხვედრა მოიგო.

საკვალიფიკაციო ეტაპზე მან მომავალი მსოფლიოს ჩემპიონი რუსი სოფია პოზდნიაკოვა დაამარცხა 5:4. ლიკა პირდაპირ 64 საუკეთესოში გავიდა და პლეი ოფის პირველივე შეხვედრა აზიის ორგზის ჩემპიონთან, 22 წლის ჰენგი იანისთან დათმო.

ამის მიუხედავად, ამ ახალგაზრდა მოხმალავის მსოფლიოზე გამოსვლა დადებითად უნდა შევაფასო. ორ-სამ წელიწადში იგი მსოფლიოში ყველასთვის ანგარიშგასაწევი მეტოქე იქნება.

რაც შეეხება კახიანს, მან საკუთარი შესაძლებლობები ვერ გამოავლინა. ჩვენ ჩინეთში უკვე ვისაუბრეთ ამ თემაზე: თეოდორას თუ კარიერის გაგრძელება და საერთაშორისო სარბიელზე წარმატების მიღწევა სურს, აუცილებლად უნდა დაბრუნდეს საქართველოში და აქ ივარჯიშოს. იგი ამჟამად ამერიკაში ცხოვრობს. ცხადია, ჩინეთში უფრო მეტს მოველოდით დაშნით მოფარიკავე მაია გუჩმაზოვასა და რაპირისტ ლუკა ღაღანიძისგან. ორივე ნიჭიერი სპორტსმენია და უკეთ უნდა გაისარჯონ.

- და, რა თქმა უნდა, მთავარი - გუნდური პირველობა.

- საქართველოს ფარიკაობის ფედერაციის მიზანია, 2020 წელს ტოკიოს ოლიმპიადაზე გუნდურში მოხმალავე ვაჟთა ნაკრებით ვიასპარეზოთ და სათანადოდ არაფერს ვიშურებთ.

ცხადია, ამოცანა იოლი არ არის - საწადელს რომ მიაღწიო, მსოფლიოს კლასიფიკაციაში, სულ მცირე, რვა საუკეთესო გუნდს შორის უნდა მოხვდე. ამიტომაც ჩინეთში სარეიტინგო ქულების მოსაპოვებლად თავი არ დაგვიზოგავს. გუნდური მედლებისთვის ბრძოლაში 25 ნაკრები ჩაება. სტარტზე ტაილანდის ნაკრებს დიდი სხვაობით ვძლიეთ - 45:20.

მეორე წრეში ამერიკის უძლიერეს გუნდს დავუპირისპირდით. მის შემადგენლობაში გამოდიოდნენ ერთეულებში ამ ჩემპიონატის ვერცხლის პრიზიორი ელი დერშვიცი, რომელმაც ჩინური ბატალიების შემდეგ მსოფლიოს რეიტინგში პირველ ადგილზე გადაინაცვლა, ასევე, ოლიმპიური თამაშებისა და მსოფლიოს ჩემპიონატის მეორეადგილოსანი დერილ ჰომერი და ანდრეუ მაცკიევიჩი.

სამი პაექრობის შემდეგ ამერიკელები 15:8 გავიდნენ წინ, მაგრამ მე-4 ორთაბრძოლაში მარდალეიშვილმა დერშვიცს 12:3 აჯობა. ამის შემდეგ ჩვენ დავწინაურდით და საბოლოოდ 45:38 გავიმარჯვეთ.

მართალია, ხელწამოსაკრავი ნაკრები არ გვყავს, მაგრამ რეიტინგით მე-5 ადგილზე მყოფი გუნდის ჩვენგან დამარცხებას არავიინ ელოდა. რა იცოდნენ, რომ შეჯიბრების მეორე დღეს უფრო დიდი სენსაციის მოწმენი გახდებოდნენ - მეოთხედფინალში რეიტინგით მე-4 გუნდს - ირანის ნაკრებს დავუპირისპირდით, რომლის სამი მოხმალავე მსოფლიოს კლასიფიკაციის პირველ ოცეულში შედის. ჩვენმა ბიჭებმა აქაც შესანიშნავად იფარიკავეს.

კვლავ გაიბრწყინა მარდალეიშვილმა - მსოფლიოს ერთ-ერთ წამყვან მოხმალავე მოჯთაფა აბედინის 10:2 სძლია. მანამდე კი სანდრომ მოუგო აბედინის 5:3. ბოლო სამ პაექრობაში ჩვენებმა აშკარად დაჯაბნეს ირანელები: მიხეილ მარდალეიშვილმა მოჰამად რაჰბასს სძლია 6:2, ბექამ - აბედინის 5:3, სანდრომ კი - ალი რაკდამანს 5:2, საბოლოოდ კი საქართველოს ნაკრებმა 45:37 გაიმარჯვა და საუკეთესო ოთხეულში გავიდა, რაც ნამდვილად სენსაცია იყო. ყველა გვილოცავდა.

მართალია, ნახევარფინალი 2012 წლის ოლიმპიურ ჩემპიონ კორეასთან დავთმეთ - 34:45, ხოლო მესამე ადგილისთვის პაექრობა ოლიმპიური თამაშების ათგზის გამარჯვებულ უნგრეთთან წავაგეთ - 36:45, მაგრამ მეოთხე ადგილით 72 სარეიტინგო ქულა დავიმსახურეთ და ამჟამად მსოფლიოს კლასიფიკაციაში 199 ქულით მე-9 ადგილზე ვართ. სათანადო თანადგომა თუ იქნება, ოლიმპიადამდე აუცილებლად დავიმკვიდრებთ ადგილს რვა საუკეთესოში და ტოკიოშიც მედლებისთვის ვიბრძოლებთ.

- სამომავლო გეგმებზე რას იტყვით?

- ახლა ერთ თვეს დავისვენებთ. აგვისტოს მიწურულს შევიკრიბებით და ახალი სეზონისთვის დავიწყებთ მზადებას. სექტემბერში საწვრთნელი შეკრება გვექნება ბულგარეთში და იქვე სატელიტ ტურნირში გამოვალთ, ოქტომბერში კი თბილისი უმასპინძლებს მსგავს შეჯიბრებას ქალთა და ვაჟთა შორის. ყველაფერი ეს სხვა ტურნირებთან ერთად 2019 წლის მსოფლიოს და ევროპის ჩემპიონატებისთვის უკეთ მოსამზადებლად დაგვეხმარება.

ყოველდღიური სპორტული გაზეთი "ლელო"
1195
მკითხველის კომენტარები / 0 /
მსგავსი ამბები
რუბრიკის სხვა სიახლეები
;