ფარიკაობა. ინტერვიუ მერაბ ბაზაძესთან: უნგრელმა მსაჯმა რუსეთის ნაკრებთან 8 ქულა დაგვაკლო

 გასულ უქმეებზე პოლონეთის დედაქალაქმა ვარშავამ მოხმალავე ვაჟთა მსოფლიოს თასის გათამაშების მორიგ ეტაპს უმასპინძლა.

შეჯიბრებაში ოთხი ქართველი მოფარიკავეც მონაწილეობდა - სანდრო და ბექა ბაზაძეები, მიხეილ მარდალეიშვილი და საბა სულამანიძე. ტურნირის შთაბეჭდილებებს გვიზიარებს საქართველოს ნაკრების მთავარი მწვრთნელი მერაბ ბაზაძე:

- რაც დრო გადის და ტოკიოს ოლიმპიურ თამაშებს ვუახლოვდებით, მსოფლიო სარბიელზე სულ უფრო იზრდება კონკურენცია, - გვითხრა მან. - ეს არც არის გასაკვირი, რადგან ყველას სურს, რეიტინგით იმ რვა საუკეთესოში მოხვდეს, რომელიც ოლიმპიადაზე გუნდურში გამოსვლის უფლებას იძლევა. ამიტომ თითოეულ შეჯიბრებაზე მოპოვებულ ყოველ ქულას ოქროს ფასი ედება.

ვარშავაში 24 ნაკრები მონაწილეობდა, პირად პირველობაში კი 202 მოხმალავე ეცილებოდა ერთმანეთს საპრიზო ადგილებს. საკვალიფიკაციო ეტაპი შესანიშნავად განვლეს სანდრო ბაზაძემ და საბა სულამანიძემ, რომლებმაც ხუთ-ხუთ მეტოქეს სძლიეს, ხოლო ბექა ბაზაძემ და მიხეილ მარდალეიშვილმა ოთხ-ოთხი მოწინააღმდეგე დაჯაბნეს.

ვერ გეტყვით, პლეი ოფის პირველ წრეში რა მოხდა - სანდროს გარდა, ყველამ წააგო. არადა, შესაძლებლობებისა და რეიტინგის გათვალისწინებით ეს ბარიერი ყველას უნდა გადაელახა.

მით უმეტეს - მარდალეიშვილმა ბელარუს სიარხეი კისელს თბილისის ტურნირში დიდი სხვაობით აჯობა, სხვა დროსაც მოუგია მისთვის, ვარშავაში კი დამარცხდა.

ვფიქრობ, ეს წარუმატებლობა უფრო ფსიქოლოგიური წნეხითაა გამოწვეული, ამიტომაც მოვიწვიეთ ამ დარგის უცხოელი სპეციალისტი, რომელიც გარკვეული დროის განმავლობაში ჩვენს მოფარიკავეებთან იმუშავებს.

- ბოლო დროს სანდროსთვის რუსი კამილ იბრაგიმოვი გადაულახავ წინაღობად იქცა, არადა, ახალგაზრდებში ევროპის ჩემპიონობის მოპოვება ფინალში სწორედ ამ მოფარიკავის ძლევით შეძლო.

- ბოლომდე ვერ დაგეთანხმებით. მართალია, რუსი მოფარიკავე ძლიერია, მაგრამ სულაც არ არის დაუძლეველი: მას შემდეგ, რაც სანდრომ პლეი ოფში ბრიტანელ უილიამ დიარსა და გუნდურში კორეელ მსოფლიოს ჩემპიონ იუნჰო კიმს აჯობა, მესამე წრეში იბრაგიმოვთან დამარცხდა.

ფეხის ტრავმამ შეახსენა თავი და აღარ გარისკა, რადგან გუნდურში ჰქონდა უფრო მნიშვნელოვანი ორთაბრძოლები. მესამე წრეში რუსეთის ნაკრებთან დაპირისპირებისას მან სწორედ იბრაგიმოვი დაჯაბნა - ექვსი ქულით მოუგო.

რუსეთთან შეხვედრამდე გუნდურში ჯერ ჩილეს ნაკრებს ვძლიეთ იოლად - 45:23. სანდრო იქ მხოლოდ ერთხელ გავიყვანეთ საფარიკაო ბილიკზე, დანარჩენი დრო დავასვენეთ. მატჩის მთელმა სიმძიმემ ახალგაზრდა საბა სულამანიძის მხრებზე გადაიარა და მანაც იმედები გაამართლა.

- გავიხსენოთ გუნდური ტურნირიც.

- რვა საუკეთესოში შესასვლელად ოლიმპიური თამაშების ვერცხლისა და ბრინჯაოს პრიზიორს, 2013 წლის მსოფლიოს ჩემპიონატისა და 2015 წლის პირველი ევროპული თამაშების მეორეადგილოსან რუმინეთის ძლიერ გუნდს ვძლიეთ - 45:35.

მერე იყო რუსებთან მარცხი - 42:45. საერთოდ, არ მიყვარს მსაჯებზე ლაპარაკი და წაგების მათთვის გადაბრალება, მაგრამ უნგრელ არბიტრ კოშას რუსეთთან დაპირისპირებისას ნამეტანი მოუვიდა: სულ მცირე - რვა ქულა არ ჩაგვითვალა. რამაც აღმაშფოთა და გაფრთხილებაც მივიღე.

ამ უსამართლო წაგების შემდეგ, ისევ ფსიქოლოგიურად, ვერ შეძლეს ბიჭებმა ძალების მობილიზება და ფრანგებთან მატჩი დათმეს - 38:45. არადა, ამას წინათ, იტალიურ პადოვაში მსოფლიოს თასზე ფრანგებს იოლად ვძლიეთ.

მეშვიდე ადგილისთვის პაექრობაში ამერიკელების ძლიერი ნაკრები დავამარცხეთ - 45:42. ოკეანისგაღმელებს, ეტყობა, იმდენად უნდოდათ ჩვენთან გამარჯვება, რომ თავიანთ საიტზე დაწერეს, ქართველებს ვაჯობეთო. არადა, ვინც შეჯიბრებას არ ესწრებოდა, მათთვის მსოფლიო ფედერაციის ვებგვერდი ხომ უტყუარი საბუთია.

- მომდევნო პაექრობები როდის გექნებათ?

- 5 მაისს მოსკოვსა და 12 მაისს მადრიდში, ორივე - მსოფლიოს თასზე. მანამდე ვარშავაში მოპოვებული სარეიტინგო ქულებიც დაგვერიცხება და ორი საფეხურით მაინც გადავინაცვლებთ წინ. ამჟამად კი 170 ქულით მე-11 ადგილზე ვართ.

- მსოფლიოს თასების მომდევნო ეტაპებამდე ახალგაზრდებს ექნებათ მნიშვნელოვანი ასპარეზობები...

-დიახ, პირველიდან 12 მარტის ჩათვლით სოჭში ახალგაზრდა მოფარიკავეთა ევროპის ჩემპიონატი გაიმართება. იქ ჯერ კადეტები იასპარეზებენ. საქართველოს სპორტულ ღირსებას დაიცავენ მოხმალავეები - ნინი ნიქაბაძე, თამუნა ჩარკვიანი, ვატო არჩვაძე, ლუკა ლომინაძე და გიორგი მერკვილაძე.

სხვა დისციპლინებში ამ ეტაპზე ისეთი მოფარიკავეები არ გვყავს, მეტოქეებს ღირსეული კონკურენცია რომ გაუწიონ. ნინი ნიქაბაძე ახალგაზრდებშიც მოსინჯავს ძალებს.

აქ გოგონათა გუნდში მასთან ერთად იქნებიან ლიკა ჯიჯეიშვილი, მარიამ აფციაური და ანა აფრასიძე. ვაჟებში ნიკა შენგელია, ვაჟა რეჭია, ნიკა ჭეიშვილი და გოგა კაკაურიძე იხმალავებენ.

ზემოთ დასახელებული სპორტსმენები ევროპაზე თუ თავს გამოიჩენენ, 1-12 აპრილს იტალიურ ვერონაში ახალგაზრდების მსოფლიოს პირველობაზეც გაემგზავრებიან. 15 მარტს კი ჩვენი მოხმალავე დარია ანტონოვა ათენში ქალთა მსოფლიოს თასის ეტაპზე გამოვა.

ყოველდღიური სპორტული გაზეთი "ლელო"
1851
მკითხველის კომენტარები / 0 /
მსგავსი ამბები
რუბრიკის სხვა სიახლეები
;