ფარიკაობა. მედლამდე ჩხვლეტა დააკლდათ

ერევანში 23-წლამდელ მოფარიკავეთა ევროპის ჩემპიონატზე გუშინ ბოლო ორთაბრძოლები გაიმართა.

საქართველოს მოხმალავე გოგონათა ნაკრებს (ლიკა ჯიჯეიშვილი, მარიამ აფციაური, ანა აფრასიძე) მედლამდე ჩხვლეტა დააკლდა: სტატზე ჩვენები პოლონელებს დაუპირისპირდნენ.

ერთ მომენტში რვა ქულით - 27:35 ჩამორჩნენ მეტოქეს. ამ მომენტში ოლიმპიური ჩემპიონის - ვლადიმერ აფციაურის ქალიშვილმა - მარიამმა იყოჩაღა - კაროლინა კალეტას 8:5 სძლია და ანგარიშში სხვაობა ხუთ ქულამდე შეამცირა.

ბოლო ორთაბრძოლაში 19 წლის ლიკა ჯიჯეიშვილმა იყოჩაღა - სილვია მატუშაკს 10:4 აჯობა და საკუთარ გუნდს გამარჯვებაც მოუტანა - 45:44. მეორე შეხვედრა ქართველებმა იტალიელებთან გამართეს: ბოლო ორთაბრძოლის წინ ჩვენები შეხვედრას 32:40-ს აგებდნენ.

ისევ ჯიჯეიშვილმა გამოიჩინა თავი - მართალია, მან მიჩელა ბატისტონთან ორთაბრძოლისას ანგარიში გაათანაბრა - 44:44, მაგრამ ბოლო ჩხვლეტისთვის ძალა არ ეყო.

აპენინელებმა 45:44 გაიმარჯვეს და ქართველები ნახევარფინალს მიღმა დატოვეს, თავად კი ფინალი რუსებთან დათმეს და მეორე ადგილზე გავიდნენ. მესამე იყო უკრაინა. საქართველოს გოგონათა ნაკრებს მე-7 ადგილი ხვდა.

რაპირით ფარიკაობაში საქართველოს ვაჟთა ნაკრები სტარტზევე 25:45 დამარცხდა საფრანგეთთან და მე-8 ადგილით დაკმაყოფილდა. საპრიზო ადგილები კი ასე განაწილდა: 1. იტალია, 2. რუსეთი, 3. საფრანგეთი.

საქართველოს ნაკრებმა ჩემპიონატი მოხმალავე ნიკა შენგელიას ვერცხლის მედლით ჩაამთავრა.

ყოველდღიური სპორტული გაზეთი "ლელო"
901
მკითხველის კომენტარები / 0 /
მსგავსი ამბები
რუბრიკის სხვა სიახლეები
;