ფარიკაობა. მერაბ ბაზაძე: წლეულს მსოფლიო მედლის ჯერია

ქართველმა მოფარიკავეებმა 2017 წელს საერთაშორისო სარბიელზე მნიშვნელოვანი წარმატებებით გამოიჩინეს თავი.

მარტო ის რად ღირს, რომ მოხმალავე თეოდორა კახიანმა ევროპის ჩემპიონატზე ისტორიულ გამარჯვებას მიაღწია - ქართველ მოფარიკავე ქალთა შორის პირველმა მოიპოვა კონტინენტის ჩემპიონატის ოქროს მედალი.

იყო სხვა საგულისხმო შედეგებიც, რომელთა შესახებ საქართველოს ფარიკაობის ფედერაციის ვიცე პრეზიდენტი და ეროვნული ნაკრების მთავარი მწვრთნელი მერაბ ბაზაძე გვესაუბრება.

- დავიწყებ იმით, რომ შარშან აპრილში მინსკმა 23-წლამდელთა ევროპის ჩემპიონატს უმასპინძლა. - გვითხრა მან. - ბელარუსის დედაქალაქში ჩვენმა მოხმალავე ბიჭებმა (მიხეილ მარდალეიშვილი, ნიკა შენგელია, საბა სულამანიძე, ვაჟა რეჭია) ყველა მეტოქეს აჯობეს,

მათ შორის ფინალში იტალიის ნაკრები დაამარცხეს იოლად - 45:36 და გუნდური ჩემპიონობა მოიპოვეს.

იტალია კი, მოგეხსენებათ, ფარიკაობაში მსოფლიოს ფავორიტი ქვეყანაა. ამავე ჩემპიონატში გვასახელა რაპირით მოფარიკავე ლუკა ღაღანიძემ, რომელმაც მხოლოდ ნახევარფინალური პაექრობა დათმო მომავალ რუს ჩემპიონ რაგოზინთან და ბრინჯაოს მედალი დაიმსახურა, რაც დამოუკიდებელი საქართველოს ისტორიაში პირველი შემთხვევაა.

არადა, ამ სახეობაში საქართველოს მსოფლიოს ჩემპიონის პირველი ოქროს მედალი გასული საუკუნის სამოციან წლებში იური ოსიპოვმა მოუტანა, შემდეგ ოლიმპიური და მსოფლიოს ჩემპიონი გახდა ვლადიმერ აფციაური, გივი ანდრიაძემ ახალგაზრდებში მოიპოვა მსოფლიოს ჩემპიონობა. ასე რომ, რაპირაშიც დიდი ტრადიციები გვაქვს და მის აღორძინებასაც ვიმედოვნებთ.

- შარშანდელი მიღწევებიდან, ალბათ, ევროპის ჩემპიონატის შედეგებია გამორჩეული...

- გეთანხმებით. ეს შეჯიბრება თბილისში გაიმართა, მოხმალავე თეოდორა კახიანმა ნახევარფინალში უნგრელი პუშტაი დაამარცხა, ფინალში იტალიელ გრეგორიეს მოუგო და კვარცხლბეკის უმაღლეს საფეხურზე ავიდა.

თეოდორამ ფარიკაობაში მეცადინეობა თამაზ კაკულიასთან დაიწყო, კადეტობისას მე ვავარჯიშებდი და პერსპეტიულ მოხმალავედ მიიჩნეოდა. მას შემდეგ, რაც პენსილვანიის უნივერსიტეტის სტუდენტი გახდა, იქაურ მწვრთნელ ვეს გლონთან იმაღლებდა ოსტატობას.

შარშან უმაღლესი სასწავლებლის დამთავრების მერე საქართველოს ნაკრებთან ერთად გაიარა რამდენიმე საწვრთნელი შეკრება და, როგორც ვთქვი, ივნისში ევროპის ჩემპიონი გახდა.

მას ყველა მონაცემი აქვს საიმისოდ, რომ 2020 წლის ოლიმპიური თამაშების ლიცენზია მოიპოვოს. თუმცა გავუსწრებ მოვლენებს და ვიტყვი, რომ ბოლო დროს საქართველოს მოხმალავე ქალთა ნაკრებში რამდენიმე ნიჭიერი ახალგაზრდა მოფარიკავე გამოჩნდა, რაც ჯანსაღ კონკურენციას შეუწყობს ხელს.

უპირველესად ლიკა ჯიჯეიშვილი მინდა გამოვყო, რომელმაც გასულ უქმეებზე ბუდაპეშტში 20-წლამდელ მოხმალავეთა მსოფლიოს თასზე ძალიან ძლიერი მუშკეტერები დაამარცხა.

- მოხმალავე ვაჟებზე არაფერი გვითქვამს.

- თბილისში გამართულ ევროპის ჩემპიონატში წარმატებით იასპარეზა ახალგაზრდებში ევროპის სამგზის ჩემპიონმა და რიოს ოლიმპიადის მონაწილე სანდრო ბაზაძემ - მან მხოლოდ ნახევარფინალური პაექრობა წააგო მომავალ ჩემპიონთან - გერმანელ მაქს ჰარტუნგთან და იტალიელ მსოფლიოს ჩემპიონ ლუკა კურატოლისთან ერთად მესამე ადგილი დაიკავა.

საგულისხმოა, რომ ამ შეჯიბრებამდე სანდრო ესპანეთში მსოფლიოს თასის ეტაპზე მეორე იყო - ფინალი ფრანგ ოლიმპიურ ჩემპიონ ანსტეტთან დათმო. ევროპის ჩემპიონატზე ბექა ბაზაძე 16 საუკეთესოში მოხვდა - მისი წინსვლა ლუკა კურატოლიმ შეაფერხა.

ჩვენი მოხმალავეთა ნაკრები კი მერვე ადგილზე გავიდა, რაც მნიშვნელოვანი წარმატება იყო, რადგან აქ მოპოვებული სარეიტინგო ქულებით ქართველმა მოხმალავეებმა მსოფლიოს კლასიფიკაციაში მე-10 ადგილზე აინაცვლეს. მიზანი რვა საუკეთესოში მოხვედრაა, რომ ტოკიოს ოლიმპიადისთვის გუნდური პირველობის ლიცენზია მოვიპოვოთ.

- ევროპის ჩემპიონატი საქართველოსთვის სხვა რამითაც იყო მნიშვნელოვანი.

- ასპარეზობის დასრულების შემდეგ სტუმრებმა ერთხმად აღნიშნეს ტურნირის მაღალი დონე, რაშიც ჩვენს პრეზიდენტ ზაზა მჭედლიძეს მიუძღვის დიდი წვლილი.

სპორტის სამინისტრომ საშეჯიბროდ 10 საფარიკაო ბილიკი და ხუთი ელექტროფიქსატორი, ასევე, ფორმა-ინვენტარი შეგვიძინა, რისთვისაც ტარიელ ხეჩიკაშვილისა და შალვა გოგოლაძის მადლიერი ვართ.

თბილისში ჩვენი ფედერაციის გენერალური მდივანი დავით სახვაძე ევროპის ფედერაციის ვიცე პრეზიდენტად აირჩიეს და მსაჯთა კომისიას ხელმძღვანელობს.

- წლევანდელ გეგმებზე რას იტყვით?

- გასულ უქმეებზე 20-წლამდელ მოხმალავეთა ნაკრების 11-მა წევრმა თანატოლთა მსოფლიოს თასის ეტაპზე იასპარეზა, რომ მათი შესაძლებლობები შეგვემოწმებინა.

მათ ახლდა უკრაინელი მწვრთნელი ალექსანდრ ტორჩუკი, რომელიც შარშან წლის მიწურულს მოხმალავეებთან სამუშაოდ მოვიწვიეთ. 9 იანვრიდან კი ინტენსიურ მზადებას დავიწყებთ - 17 სპორტსმენს წავიყვანთ ბაკურიანში როგორც ეროვნული, ისე ახალგაზრდული ნაკრები გუნდების წევრებს სამივე დისციპლინაში.

მოხმალავეთა ნაკრები 20 იანვრიდან თბილისში განაგრძობს წვრთნას უცხოელებთან ერთად. 28 იანვარს საქართველოს დედაქალაქში მსოფლიოს თასის სატელიტი შეჯიბრება გაიმართება.

მერე ჩვენები იტალიაში გადაინაცვლებენ - 1-2 თებერვალს პადოვაში მსოფლიოს თასის პირად-გუნდურ შეჯიბრებაში ჩაებმებიან, 5-6 თებერვალს კი მსგავსი შეჯიბრების გუნდურ ტურნირში იასპარეზებენ.

ორივე ასპარეზობა სარეიტინგო ქულებს იძლევა. თებერვლის მიწურულს სოჭში ახალგაზრდები ევროპის პირველობაზე, ხოლო მარტის ბოლოს სერბეთში მსოფლიოზე გამოვლენ.

ივნისში ნოვი სადი ევროპის ჩემპიონატს უმასპინძლებს, ხოლო ივლისში მსოფლიოს პირველობაა ჩინეთში დანიშნული. შარშან ევროპიული ჯილდოების ფასი გავიგეთ, წლეულს კი მსოფლიოს ჩემპიონატის მედლებს გვინდა გავუსინჯოთ გემო.

ამ შეჯიბრებებში მოხმალავეებთან ერთად ძალებს მოსინჯავენ რაპირაში ლუკა ღაღანიძე და დაშნაში მაია გუჩმაზოვა. საქართველოს ფარიკაობას მომავალშიც სათანადო მხარდაჭერა თუ ექნება, ტოკიოს 2020 წლის ოლიმპიური თამაშების ექვსი საგზურისთვის ვიბრძოლებთ.

ყოველდღიური სპორტული გაზეთი "ლელო"
590
მკითხველის კომენტარები / 0 /
მსგავსი ამბები
რუბრიკის სხვა სიახლეები