ფარიკაობა. მსოფლიოს თასზე ალჟირში

ფარიკაობაში ტოკიოს 2020 წლის ოლიმპიური თამაშების ლიცენზიების მოსაპოვებლად უდიდესი მნიშვნელობა რეიტინგებს ენიჭება - პირადში ვინც მსოფლიოს კლასიფიკაციის 14 საუკეთესოში მოხვდება, იაპონიაში გამგზავრება, ფაქტობრივად, გარანტირებული ექნება.

ამიტომაც ექცევა ყველა ქვეყანაში რეიტინგის გაუმჯობესებას განსაკუთრებული ყურადღება. გამონაკლისს არც ქართველი მუშკეტერები წარმოადგენენ, რომლებიც კარგა ხანია, თბილისში ემზადებიან 2018-2019 წლების სეზონისთვის: 16-18 ნოემბერს კი მოხმალავე ვაჟები (სანდრო და ბექა ბაზაძეები, მიხეილ მარდალეიშვილი და ვაჟა რეჭია) ალჟირში მსოფლიოს თასის პირად-გუნდურ შეჯიბრებაში მოსინჯავენ ძალებს.

- დღეში ორჯერადი ვარჯიშები გვაქვს, - გვითხრა საქართველოს მოფარიკავეთა ნაკრების მთავარმა მწვრთნელმა მერაბ ბაზაძემ. - საერთო განწყობისთვის სეზონის პირველ ტურნირში კარგი შედეგები გვინდა ვაჩვენოთ, მით უმეტეს, რომ ეს ჩვენი მოხმალავეების რეიტინგზეც აისახება. დეკემბრის დასაწყისში პოლონეთი უმასპინძლებს მოხმალავე ქალებისთვის მსოფლიოს თასის გათამაშებას. ქართველთაგან იქ ლიკა ჯიჯეიშვილი და 2017 წლის ევროპის ჩემპიონი თეოდორა კახიანი იასპარეზებენ.

- სალიცენზიო ტურნირები როდის გაიმართება?

- 2019 წლის მაისიდან 2020 წლის მაისის ჩათვლით - მსოფლიოს თასის ეტაპები და რამდენიმე გრან პრი იქნება. ბოლო აკორდი ევროპის სალიცენზიო ტურნირია, სადაც საგზურს მხოლოდ პირველი ადგილი იძლევა.

დღევანდელი მონაცემებით, რამდენიმე ქართველ მოფარიკავეს შეუძლია, ტოკიოში გამგზავრების უფლება მოიპოვოს, ამიტომ 2019 წლის იანვრიდან ინტენსიურ მზადებაზე გადავალთ. საწვრთნელ შეკრებებს გაივლიან და ყველა მნიშვნელოვან შეჯიბრებაზე გამოვლენ მოხმალავეები - სანდრო და ბექა ბაზაძეები, მიხეილ მარდალეიშვილი, ნიკა შენგელია, ვაჟა რეჭია, საბა სულამანიძე, ლიკა ჯიჯეიშვილი, თეოდორა კახიანი და დარია ანტონოვა, რომელიც ამჟამად უნგრეთში ცხოვრობს და იქვე ვარჯიშობს, მაგრამ ტურნირებში საქართველოს სპორტის ღირსებას დაიცავს; ასევე - რაპირისტები - ლუკა ღაღანიძე, ლაშა გალუაშვილი და არჩილ უგულავა, დაშნით მოფარიკავე მაია გუჩმაზოვა.

რაც შეეხება გუნდურს, მოხმალავეთა ოლიმპიადაზე მოსახვედრად აუცილებელი იქნება, ევროპაში ოთხ საუკეთესოს შორის დავიბევოთ ადგილი. ამჟამად მსოფლიოს კლასიფიკაციაში მე-9 ადგილზე ვართ და საფრანგეთს სამი ქულით ჩამოვრჩებით. ალჟირის ტურნირი წინსვლის საშუალებას მოგვცემს.

ყოველდღიური სპორტული გაზეთი "ლელო"
736
მკითხველის კომენტარები / 0 /
მსგავსი ამბები
რუბრიკის სხვა სიახლეები
;