ფარიკაობა. მსოფლიოს თასი: გუნდურში უკეთ, ვიდრე პირადში

ალჟირში გუშინ დამთავრდა მოფარიკავეთა მსოფლიოს თასის პირად-გუნდური გათამაშების მორიგი ეტაპი, რომელშიც სხვადასხვა ქვეყნის 132 მოხმალავე მონაწილეობდა, მათ შორის - ოთხი საქართველოდან: რიოს ოლიმპიადის მონაწილე და ახალგაზრდებში ევროპის სამგზის ჩემპიონი სანდრო ბაზაძე, მისი ძმა, 23-წლამდელთა შორის ევროპის ბრინჯაოს პრიზიორი ბექა ბაზაძე, მიხეილ მარდალეიშვილი და საბა სულამანიძე (მწვრთნელი ალექსანდრ ტორჩუკი).

სანდრო ბაზაძე ალჟირში განთესვით მეთხუთმეტე იყო, ამიტომ პირდაპირ პლეი ოფში ჩაებმება. იქ კი სტარტზე ამერიკელი პეტერ საუდერსი ჩამოიშორა გზიდან - 15:12. მერე იტალიელ ალბერტო პელეგრინისთან არკვევდა ურთიერთობას. როცა ანგარიში გახდა 11:11, ბაზაძემ ფეხი იტკინა და ორთაბრძოლა კარგა ხნით შეჩერდა. სანდრომ მაინც შეძლო პაექრობის გაგრძელება, თუმცა საბოლოოდ 13:15 წააგო, მეოცე ადგილზე გავიდა და 4 სარეიტინგო ქულა მოინაგრა.

სანდროს ხუთი საფეხურით ჩამორჩა თანაგუნდელი მიხეილ მარდალეიშვილი, რომელმაც საკვალიფიკაციო ეტაპზე ჯგუფში ექვსიდან ხუთი შეხვედრა მოიგო: დაამარცხა ფრანგი ჰუგო სოლე (5:2), ბრიტანელი ვილიამ დირი (5:4), ბელგიელი ემილი დე ვისშერი (5:3), ამერიკელი ხალილ ტომპსონი (5:1), გერმანელი ლორენც კამპფი (5:4) და მხოლოდ რუს დმიტრი დანილენკოსთან წააგო - 2:5. პლეი ოფის პირველ პაექრობაში მან ჰონგკონგელი ლამ ჰინ ჩანგი იოლად დაჯაბნა - 15:5 და მეთექვსმეტედფინალში კორეელ ბონგილ გუს დაუპირისპირდა. აზიელი მოხმალავე 2012 წლის ლონდონის ოლიმპიადისა და 2017 წლის მსოფლიოს ჩემპიონატის გამარჯვებულია, კონტინენტის ცხრაგზის ჩემპიონს აზიური თამაშები სამჯერ აქვს მოგებული. ტიტულოვან მეტოქესთან პაექრობისას ჩვენებური 8:7 დაწინაურდა, მერე 10:10 გახდა ანგარიში. ოლიმპიური ჩემპიონი 12:11 წინ რომ გავიდა, მსაჯმა მარდალეიშვილს რატომღაც სამი ჩხვლეტა არ ჩაუთვალა. საბოლოოდ მან 12:15 დათმო შეხვედრა და 25-ე ადგილთან ერთად 4 სარეიტინგო ქულას დასჯერდა.

ბექა ბაზაძემ ჯგუფში მხოლოდ ორ მეტოქეს აჯობა - იაპონელ კუნიჰიკო ჯერალდისა (5:2) და ბრიტანელ ნათან პოტერს (5:2). წააგო ოლიმპიური თამაშების, მსოფლიოს და ევროპის ჩემპიონატების მრავალგზის გამარჯვებულ ალდო მონტანასთან (იტალია, 3:5), ამერიკელ ანდრეუ მასკიევიჩსა (2:5) და ფრანგ ელიოტ ბიბისთან (4:5). მერე პლე იოფში იტალიელ ლორენცო რომანოსთანაც ვერაფერს გახდა (10:15) და 89-ე ადგილი დაიკავა.

ტურნირზე ვერც საბა სულამანიძემ იყოჩაღა - მის ანგარიშზე ერთი გამარჯვება (ამერიკელ ჯეფრი უსალოსთან 5:3) და ოთხი წაგებაა (ირანელ მოჰამად ფოტუნისთან - 4:5, ბელგიელ სეპე ბელვან ჰოლსბეკესთან - 2:5, იაპონელ იასუტომო იპნიმაისა - 1:5 და რუმინელ გეორგე როუიანკუსთან - 0:5). ამის მიუხედავად, პლეი ოფში მაინც გავიდა, მაგრამ იქ დაძაბულ პაექრობაში ჯონათან ვებთან (დიდი ბრიტანეთი) დამარცხდა - 14:15 და 106-ე ადგილზე გავიდა. საპრიზო ადგილები კი ასე განაწილდა: 1. ელი დერშვიცი (აშშ), 2. ენრიკო ბურე (იტალია), 3. კამილ იბრაგიმოვი და ვენიამინ რეშეტნიკოვი (ორივე-რუსეთი).

გუშინ ასპარეზობის ბოლო დღეს გუნდური პაექრობები გაიმართა. მთავარი პრიზისთვის ბრძოლაში 16 ნაკრები ჩაება. ჩვენები პირველსავე შეხვედრაში ფრანგების უძლიერეს გუნდთან ორი ჩხვლეტით დამარცხდნენ - 43:45. მეცხრე-მეთექვსმეტე ადგილებისთვის გამართულ შეხვედრებში ქართველმა მოხმალავეებმა ჯერ ბელგია დაჯაბნეს - 45:35, მერე დიდ ბრიტანეთს მოუგეს - 45:39 და მე-9 ადგილისთვის უკრაინელთა მძლეველ (45:44) რუმინელებს დაუპირისპირდნენ. ჩვენმა ბიჭებმა შემართებით იბრძოლეს და 45:38 გაიმარჯვეს.

მე-10 ადგილი რუმინელებს ერგოთ. შეგახსენებთ, რომ ალჟირულ ბატალიებამდე საქართველოს მოხმალავე ვაჟთა ნაკრები მსოფლიოს კლასიფიკაციაში მე-10 ადგილზე იყო.
ნახევარფინალი: გერმანია-ირანი 45:34, იტალია-უნგრეთი 45:34.

მე-3 ადგილისთვის: ირანი-უნგრეთი
ფინალი: გერმანია-იტალია

ყოველდღიური სპორტული გაზეთი "ლელო"
380
მკითხველის კომენტარები / 0 /
მსგავსი ამბები
რუბრიკის სხვა სიახლეები