ფარიკაობა. მსოფლიოს თასი: როგორ გაჭრის ქართული ხმალი ალჟირში?

გუშინ მოფარიკავეთა მსოფლიოს თასის პირად-გუნდური გათამაშების მორიგ ეტაპში საასპარეზოდ საქართველოს მოხმალავე ვაჟთა ნაკრები ახალი მწვრთნელის - ალექსანდრ ტორჩუკის (უკრაინა) ხელმძღვანელობით ალჟირს გაემგზავრა.

საპრიზო ადგილებისთვის 132 მუშკეტერი იბრძოლებს. ჩვენი ქვეყნის სპორტულ ღირსებას ოთხი სპორტსმენი დაიცავს - რიოს ოლიმპიადის მონაწილე და ახალგაზრდებში ევროპის სამგზის ჩემპიონი, მსოფლიოს კლასიფიკაციაში მე-16 ადგილზე მყოფი სანდრო ბაზაძე (84 ქულა), მისი ძმა, 23-წლამდელთა შორის ევროპის ბრინჯაოს პრიზიორი ბექა ბაზაძე (რეიტინგით 67-ე), მიხეილ მარდალეიშვილი (91-ე) და საბა სულამანიძე (122-ე).

სანდრო ბაზაძე ალჟირის მსოფლიოს თასზე განთესვით მეთხუთმეტეა, ამიტომ საკვალიფიკაციო ორთაბრძოლებისგან თავისუფალია - ხვალ პირდაპირ პლეი ოფში ჩაებმება. დანარჩენი სამი მოხმალავე კი დღეს მოსინჯავს ძალებს.

მათგან ყველაზე რთული წილისყრა ბექა ბაზაძეს შეხვდა - მომდევნო ეტაპზე გასასვლელად მასთან ერთად იბრძოლებენ ოლიმპიური თამაშების, მსოფლიოს და ევროპის ჩემპიონატების მრავალგზის გამარჯვებული და პრიზიორი ალდო მონტანა (იტალია), ასევე, ამერიკელი ანდრეუ მასკიევიჩი და უკრაინელი ბოგდან პლატონოვი. ჩვენებურს, ასევე, მეტოქეობას გაუწევენ ფრანგი ელიოტ ბიბი, იაპონელი კუნიჰიკო ჯერალდი და ბრიტანელი ნათან პოტერი.

მიხეილ მარდალეიშვილი ფრანგ უგო სოლეს, ბრიტანელ უილიამ დირის, რუს დმიტრი დანილენკოს, ბელგიელ ემილი დე ვისშერს, ამერიკელ ხალილ ტომპსონსა და გერმანელ ლორენც კამპფს დაუპირისპირდება, საბა სულამანიძე კი ირანელ მოჰამად ირიფოტუნისთან, ამერიკელ ჯეფრი უსალოსთან, ბელგიელ სეპე ბელვან ჰოლსბეკესთან, იაპონელ იასუტომო იპნიმაისა და რუმინელ გეორგე როუიანკუსთან გაარკვევს ურთიერთობას. 5 ნოემბერს გუნდური პაექრობები გაიმართება.

ყოველდღიური სპორტული გაზეთი "ლელო"
407
მკითხველის კომენტარები / 0 /
მსგავსი ამბები
რუბრიკის სხვა სიახლეები