ფარიკაობა. პირველად ელიტაში: ნაკრების ისტორიული მიღწევა ჩინეთში - ბაზაძეები!

ჩინეთში მოფარიკავეთა მსოფლიოს ჩემპიონატზე გუშინ მედლები მოხმალავე ვაჟთა გუნდურ პირველობაში გათამაშდა.

როგორც ვწერდით, შეჯიბრებაში 25 ქვეყნის წარმომადგენლები ჩაებნენ. საქართველოს ნაკრებმა (სანდრო და ბექა ბაზაძეები, მიხეილ მარდალეიშვილი, ვაჟა რეჭია) ზედიზედ სძლია ტაილანდისა (45:20) და აშშ-ის (45:38) გუნდებს და მეოთხედფინალში გავიდა, სადაც ირანის ძალიან ძლიერ მოხმალავეებს დაუპირისპირდა.

შეხვედრა დაძაბულად და დრამატულად წარიმართა: პირველსავე პაექრობაში სანდრო ბაზაძემ 5:3 მოუგო მოჯთაფა აბედინის, რომელიც მსოფლიოს საუკეთესო ოცეულში შედის.

მომდევნო ორთაბრძოლა მარდალეიშვილმა ალი რაკდამანთან 2:7 დათმო, მაგრამ შემდეგ მოჯთაფას 10:2 სძლია და თავისი გუნდი წინ გაიყვანა - 20:17. ირანელები მატჩში კიდევ ერთხელ დაწინაურდნენ, როცა რაკდამანმა ბექა ბაზაძეს 8:4 აჯობა.

ბოლო სამ პაექრობაში ჩვენებმა აშკარად დაჯაბნეს მეტოქე: მიხეილ მარდალეიშვილი-მოჰამად რაჰბასი 6:2, ბექა ბაზაძე-მოჯთაფა აბედინი 5:3, სანდრო ბაზაძე-ალი რაკდამანი 5:2, საბოლოოდ კი საქართველოს ნაკრებმა 45:37 გაიმარჯვა და საუკეთესო ოთხეულში დაიმკვიდრა ადგილი.

ნახევარფინალში ჩვენები 2012 წლის ოლიმპიურ ჩემპიონ კორეასთან დამარცხდნენ - 34:45, ხოლო მესამე ადგილისთვის პაექრობა ოლიმპიური თამაშების ათგზის გამარჯვებულ უნგრეთთან დათმეს - 36:45 და მეოთხე ადგილი დაიკავეს, თან 72 სარეიტინგო ქულა გამოიმუშავეს და ამჟამად მსოფლიოს კლასიფიკაციაში 199 ქულით მეთორმეტედან მე-9 ადგილზე აინაცვლეს - მერვე ადგილზე მყოფ საფრანგეთს მხოლოდ 3 ქულით ჩამორჩებიან.

საგულისხმოა, რომ საქართველოს მოხმალავე ვაჟთა ნაკრები 2007 წელს "ქართუ ბანკის" თანადგომით პირველად გაემგზავრა გუნდურ მსოფლიოს ჩემპიონატზე, რომელსაც გერმანიამ უმასპინძლა. მაშინ ჩვენმა ახალგაზრდებმა 25-ე ადგილი დაიკავეს

. მას შემდეგ მნიშვნელოვან ტურნირებზე არაერთ წარმატებას მიაღწიეს და ახლა იმ ოქტეტს მიუახლოვდნენ, რომელიც 2020 წლის ტოკიოს ოლიმპიადაზე გუნდის გამგზავრების საშუალებას იძლევა. რაც შეეხება ჩინეთის მსოფლიოს ჩემპიონატს, პირველი ადგილი კორეელებმა დაიკავეს, რომლებმაც ფინალში იტალიას სძლიეს - 45:39. მესამე ადგილზე უნგრელები გავიდნენ...

- ქართველმა მოხმალავე ვაჟებმა შესანიშნავი შედეგი აჩვენეს, - გვითხრა შეჯიბრების დამთავრებისთანავე ვეტერანმა მოფარიკავემ, რაპირაში 1962 წლის მსოფლიოს ჩემპიონმა იური ოსიპოვმა. - კარგია, რომ სპორტსმენებს, მათს მაწვრთნელებსა და ფედერაციას ბოლო წლების მუხლჩაუხრელი გარჯა დაუფასდათ.

გრანდები ჩამოიტოვეს. სიამაყით სავსე ვუყურებდი მათს გამოსვლებს ჩინეთში და უნებურად შორეული 1957 წლის ამბები გამახსენდა: მაშინ საქართველოდან მე და რეზო ცირეკიძე მოვხვდით საბჭოთა კავშირის ნაკრებ გუნდებში და პარიზში მსოფლიოს ჩემპიონატზე ვიასპარეზეთ.

რეზო დაშნაში რვა საუკეთესოს შორის მოხვდა; ჩვენ, რაპირისტებმა, გუნდურში მესამე ადგილისთვის ბრძოლა უნგრელებთან (!) წავაგეთ და მე-4 ადგილი დავიკავეთ. ექვსი ათეული წლის შემდეგ, ფაქტობრივად, ისტორია განმეორდა.

1964 წელს ტოკიოს ოლიმპიადაზე მოხმალავე ნუგზარ ასათიანმა ოლიმპიური ჩემპიონობა მოიპოვა. დარწმუნებული ვარ, რომ ისტორია აქაც განმეორდება და ქართველი მოხმალავეები გუნდურში ტოკიოს 2020 წლის თამაშების საგზურს მოიპოვებენ. ჩვენი ბიჭები ამას იმსახურებენ.

დავით სახვაძე, ევროპის ფარიკაობის კონფედერაციის ვიცე პრეზიდენტი: "შედეგი მართლაც სენსაციურია, რადგან საქართველოს მოხმალავეთა ნაკრები პირველად მოხვდა მსოფლიოს ჩემპიონატების ჯერ რვა, შემდეგ ოთხ საუკეთესო გუნდს შორის, მაგრამ, მართალი გითხრათ, ჩვენი ნაკრების ოთხეულში შესვლა ჩემთვის მოულოდნელი არ ყოფილა. ობიექტურად თუ ვიმსჯელებთ, კანონზომიერიცაა, რადგან ბოლო წლებში ისინი მიზანმიმართულად მიიწევენ წინ და საერთაშორისო სარბიელზე საფარიკაო ქვეყნების წარმომადგენლებსაც ამარცხებენ, მათ შორის - კორეასა და იტალიასაც. შარშან და წლეულს ევროპის ჩემპიონატებზე საქართველოს მოხმალავეთა ნაკრები რვა საუკეთესოში მოხვდა, ხოლო ახალგაზრდებში ევროპის სამგზის ჩემპიონმა სანდრო ბაზაძემ უფროსებში ზედიზედ ორი ბრინჯაოს მედალი დაიმსახურა.

ჩინეთში გამართულ ჩემპიონატზე პირველი სენსაცია ამერიკის ნაკრებთან გამარჯვება იყო: ოკეანისგაღმელებს საუკეთესო მოფარიკავეები ჰყავთ. მათი გუნდი მსოფლიოს რეიტინგში მეხუთე ადგილზეა.

ამერიკის ნაკრების წევრი ელი დერშვიცი ჩინეთში ვერცხლის პრიზიორი გახდა და მსოფლიოს ინდივიდუალურ კლასიფიკაციაში პირველ ადგილზე გადაინაცვლა. მიხეილ მარდალეიშვილმა სწორედ მას მოუგო გუნდური პაექრობისას 12:3 და მატჩში გარდატეხა შეიტანა.

მეოთხედფინალში რეიტინგით მეოთხე ადგილზე მყოფ ირანელებს დავუპირისპირდით. აზიელებს მსოფლიოს სამეულში მოხვედრის პრეტენზია ჰქონდათ და სრულიად მართებულადაც, რადგან მათი სამი მოხმალავე მსოფლიოს კლასიფიკაციის პირველ ოცეულში შედის. ამის მიუხედავად, ჩვენები არ შეუშინდნენ მრისხანე მეტოქეს და დამსახურებულად გაიმარჯვეს.

ცუდი ის იყო, რომ ამ ორთაბრძოლის შემდეგ ქართველ მოხმალავეებს ნახევარი საათიც არ დაუსვენიათ, ისე იხმეს ისინი საფარიკაო ბილიკებზე ჩემპიონატის უპირველეს ფავორიტ კორეელებთან შესახვედრად. მახსოვს, ერთხელ ჩვენებმა მსოფლიოს თასის ეტაპზე მოუგეს 2012 წლის ოლიმპიურ ჩემპიონებს.

ამჯერად კი აზიელები უფრო სოლიდურად გამოიყურებოდნენ და არა მარტო ნახევარფინალი, არამედ გადამწყვეტი ორთაბრძოლაც მოიგეს და მსოფლიოს ჩემპიონები გახდნენ. ჩვენებმა მეოთხე ადგილი დაიკავეს და ამ დიდი წარმატებით მიულოცეს მოფარიკავეთა ნაკრების მთავარ მწვრთნელ მერაბ ბაზაძეს დაბადების 55 წლის იუბილე. ისე, ცნობისთვის - სანდრო და ბექა ბაზაძეები მერაბის ვაჟები არიან, მიხეილ მარდალეიშვილი კი მათი მამიდაშვილია"...

ყოველდღიური სპორტული გაზეთი "ლელო"
1487
მკითხველის კომენტარები / 0 /
მსგავსი ამბები
რუბრიკის სხვა სიახლეები
;