ფარიკაობა. რაპირით - ნევისპირა ქალაქში

სანკტ-პეტერბურგში დამთავრდა რაპირით მოფარიკავეთა მსოფლიოს თასის გათამაშების მორიგი პირად-გუნდური ეტაპი.

ვაჟებში სხვადასხვა ქვეყნის 191 წარმომადგენელი იბრძოდა საპრიზო ადგილებისთვის, მათ შორის იყო ლუკა ღაღანიძე, 23-წლამდელებში ევროპის 2017 წლის ბრინჯაოს პრიზიორი.

ჯგუფში მან ექვსიდან სამ მეტოქეს სძლია - ეთან გასნერს (აშშ, 5:4), ჩენჯი ძიუს (ჩინეთი, 5:2) და ბენ პეგსს (დიდი ბრიტანეთი), ხოლო ბენჟამინ კლეიბრიკთან (გერმანია, 2:5), არტურ ზინატულინსა (რუსეთი, 3:5) და კენტა სუძუმურასთან (იაპონია, 0:5) დამარცხდა.

სამი წაგების მიუხედავად, პლეი ოფში მაინც გავიდა. იქ სტარტზე იოშიკუ აბე (იაპონია) კი დაჯაბნა - 15:7, მაგრამ ასეთივე ანგარიშით დათმო პაექრობა კვიპროსელ ალექს ტროფალიდისთან და საბოლოოდ 95-ე ადგილს დასჯერდა.

მომდევნო უქმეებზე რუსეთის დედქალაქში ჩვენი მოხმალავეები - ლიკა ჯიჯეიშვილი, დარია ანტონოვა, სანდრო და ბექა ბაზაძეები, მიხეილ მარდალეიშვილი, საბა სულამანიძე და ნიკა შენგელია (მთავარი მწვრთნელი მერაბ ბაზაძე) მსოფლიო გრან პრიზე - მოსკოვის ხმალზე მოსინჯავენ ძალებს.

ყოველდღიური სპორტული გაზეთი "ლელო"
707
მკითხველის კომენტარები / 0 /
მსგავსი ამბები
რუბრიკის სხვა სიახლეები
;