ფარიკაობა. სეზონის ფარდის დაშვების წინ

ნუგზარ ასათიანის სახელობის თბილისის ფარიკაობის დარბაზში სამ დღეს გრძელდებოდა მოფარიკავეთა საქართველოს თასის ღია გათამაშება, რომელშიც ქვეყნის უძლიერესი სპორტსმენები, ასევე, სომხეთისა და უკრაინის წარმომადგენლები მონაწილეობდნენ.

მოასპარეზეთა შორის იყვნენ ხმალში ევროპის 2017 წლის ჩემპიონი თეოდორა კახიანი და უფროსებში კონტინენტის პირველობების ორგზის ბრინჯაოს პრიზიორი სანდრო ბაზაძე.

შესანიშნავად იასპარეზა კახიანმა, რომელმაც ყველა მეტოქეს სძლია. ფინალში მან დაძაბულ პაექრობაში აჯობა ლიკა ჯიჯეიშვილს 15:13 და თასი მოიპოვა. უფრო დრამატული აღმოჩნდა ძმების - სანდრო და ბექა ბაზაძეების ორთაბრძოლა: ხან ერთი იყო წინ, ხან - მეორე, საბოლოოდ კი ბექამ ერთი ჩხვლეტით მოიგო - 15:14 და კვარცხლბეკის უმაღლეს საფეხურზე ავიდა. გადამწყვეტ პაექრობამდე ნახევარფინალში ბექამ საბა სულამანიძეს (15:9), ხოლო სანდრომ ნიკა შენგელიას (15:8) დააყრევინა ფარ-ხმალი.

რაპირაში ქალთა შორის ტოლი არ ჰყავდა საქართველოს მრავალგზის ჩემპიონ თეონა გოგლიძეს, რომელმაც ნახევარფინალში ლიზა ლხინაძე (15:11), ფინალში კი მარიამ ტუღუში (15:5) დაამარცხა. ვაჟებში მთავარი პრიზი 23-წლამდელებში ევროპის ჩემპიონატის ბრინჯაოს პრიზიორმა ლუკა ღაღანიძემ მოიპოვა - გადამწყვეტ პაექრობაში ლაშა გალუაშვილს 15:11 აჯობა.

სამაგიეროდ, გალუაშვილმა დაშნაში არავის დაუთმო პირველობა - ფინალში სომეხი მოფარიკავე არამაის გაბოიანი დაჯაბნა - 15:12. ქალებში ისევ შეუდარებელი იყო ქვეყნის მრავალგზის ჩემპიონი და თასის მფლობელი მარია ზაკირჩენკო. გადამწყვეტ პაექრობაში მან თანაგუნდელ ქრისტინა ჭიტაძეს სძლია- 15:10.

- სამი დღის განმავლობაში საინტერესო ორთაბრძოლების მოწმე გავხდით, - გვითხრა ეროვნული ნაკრების მთავარმა მწვრთნელმა მერაბ ბაზაძემ. - ეს ტურნირი წლევანდელი სეზონის დამთავრებამდე ერთ-ერთი ბოლო შეჯიბრება იყო. კარგ სასპორტო ფორმაშია თეოდორა კახიანი, რომელიც ორი თვეა ჩვენთან ვარჯიშობს. ოქტომბრის ბოლოს იგი ამერიკაში გაემგზავრება.

იანვრიდან კი ისევ შემოგვიერთდება და საქართველოს ნაკრებთან ერთად გაივლის საწვრთნელ შეკრებებს. 2019 წელი განსაკუთრებით მნიშვნელოვანია ტოკიოს თამაშების საგზურების მოსაპოვებლად. მაღალი რანგის პაექრობებში ვიასპარეზებთ. კერძოდ, 5 მსოფლიოს თასზე, 3 გრან პრიზე, ევროპისა (ივნისი, დიუსელდორფი) და მსოფლიოს (ივლისი, ბუდაპეშტი) ჩემპიონატებზე გამოვალთ.

საგულისხმოა ისიც, რომ ამ შეჯიბრებამ წარმოაჩინა 14 წლის მოხმალავე ტალანტი აჭარიდან თემურ კუჭუხიძე, რომელიც, დარწმუნებული ვარ, მალე ნაკრების წევრებს გაუწევს კონკურენციას.

აღსანიშნავია ისიც, რომ წლეულს პირველად ჩავატარეთ თასის გუნდური გათამაშებაც, ოღონდ ხმალში. ქალთა ფინალში ლიკა ჯიჯეიშვილმა, ნინი ნიქაბაძემ და მარიამ ცუხიშვილმა თეოდორა კახიანს, თამარ ჩარკვიანსა და ლიზი ბაციაშვილს აჯობეს, ხოლო ვაჟებში სანდრო ბაზაძემ, ვაჟა რეჭიამ და გოგა კაკაურიძემ ბექა ბაზაძეს, ნიკა შენგელიასა და ნიკა ჭეიშვილს ერთი ჩხვლეტით მოუგეს. აჭარის ახალგაზრდულმა გუნდმა საქართველოს კადეტთა ნაკრებს სძლია და მესამე ადგილზე გავიდა...

კვარცხლბეკი

ხმალი
ქალები. 1. თეოდორა კახიანი, 2. ლიკა ჯიჯეიშვილი, 3. ანა აფრასიძე (სამივე-თბილისი), თამარ ჩარკვიანი (ქუთაისი).
ვაჟები. 1. ბექა ბაზაძე, 2. სანდრო ბაზაძე (ორივე-ქუთაისი), 3. ნიკა შენგელია, საბა სულამანიძე (ორივე-თბილისი).

რაპირა
ქალები. 1. თეონა გოგლიძე, 2. მარიამ ტუღუში, 3. ლიზა ლხინაძე, ნატალია ხარაიშვილი (ოთხივე-თბილისი).
ვაჟები. 1. ლუკა ღაღანიძე, 2. ლაშა გალუაშვილი (ორივე-თბილისი), 3. ალექს აზიზიანი (სომხეთი), თემურ ჟუჟუნაშვილი (რუსთავი).

დაშნა
ქალები. 1. მარია ზაკირჩენკო, 2. ქრისტინე ჭიტაძე, 3. თინათინ ნუცუბიძე (სამივე-ქუთაისი), ევა აგამიანი (აჭარა).
ვაჟები. 1. ლაშა გალუაშვილი (თბილისი), 2. არამაის გაბოიანი, 3. მიქაელ კაზარიანი (ორივე-სომხეთი), ლევან ფცქიალაძე (ქუთაისი).

ყოველდღიური სპორტული გაზეთი "ლელო"
853
მკითხველის კომენტარები / 0 /
მსგავსი ამბები
რუბრიკის სხვა სიახლეები
;