[ფარიკაობა] ქართველების სატელიტური ოქრო და ვერცხლი

თბილისში სასპორტო კომპლექს „არენაში“ ორ დღეს გრძელდებოდა მოხმალავე ქალ-ვაჟთა მსოფლიოს თასის გათამაშება - სატელიტი შეჯიბრება, რომელშიც 15 ქვეყნის 65 სპორტსმენი მონაწილეობდა. სხვადასხვა მიზეზით, საქართველოს ნაკრების წევრებს - მიხეილ მარდალეიშვილსა და ნიკა შენგელიას არ უასპარეზიათ.

სტუმართა შორის რამდენიმე ცნობილი მოფარიკავე იყო: FIE-ს ქალთა რეიტინგში 26-ე საფეხურზე მყოფი ბერძენი დესპინა გეორგიადუ, 31-ე -32-ე ადგილოსნები - ანა ბაშტა (აზერბაიჯანი), გაბრიელა პეიჯი (კანადა) და ამირა ბენ შაბაანი (ტუნისი); ვაჟთა პირველი ორმოცეულის წევრები  - ენვერ იილდირიმი (თურქეთი), სტეფანო ივან ლუკეტი (არგენტინა) და სხვები.

სატელიტ ტურნირზე შესანიშნავად იასპარეზა ევროპის ჩემპიონატების ორგზის ბრინჯაოს პრიზიორმა სანდრო ბაზაზემ, რომელმაც ყველა შეხვედრა მოიგო და კვარცხლბეკის უმაღლეს საფეხურზე ავიდა: ჯგუფში სანდრომ ზედიზედ დაამარცხა ვახტანგ არჩვაძე (5:0), ლუკა ლომინაძე (5:1), ბადრ ალჰამადი (საუდის არაბეთი, 5:0), ჯავანშირ აჩაკიშიევი (აზერბაიჯანი, 5:3), ოზქან იილდირიმი (თურქეთი, 5:1) და ივან პისარენკო (უკრაინა, 5:4). პლეი ოფის პირველ წრეში ქართველი მოხმალავე თავისუფალი იყო. მომდევნო რაუნდში თანამემამულე ლაშა კუჭუხიძეს სძლია - 15:5, მეოთხედფინალში ძმას - ბექა ბაზაძეს დაუპირისპირდა. ამ ორთაბრძოლამდე ბექამ ჯგუფში ოთხ მეტოქეს აჯობა და მხოლოდ ერთი შეხვედრა დათმო თურქ უმუტ კავასთან - 3:5. პლეი ოფის სტარტზე გურამ რეხვიაშვილი დაჯაბნა - 15:2, შემდეგ დაძაბულ ორთაბრძოლაში პოლონელი კეზარი ბიალეცკი ჩამოიშორა გზიდან - 15:14. მეოთხედფინალური შეხვედრა ძმასთან 12:15 წააგო და ნახევარფინალში სანდრო გავიდა, სადაც ივან სტეფანო ლუკეტის (არგენტინა) დააყრევინა ფარ-ხმალი - 15:8. გადამწყვეტ შეხვედრაში ქართველმა მოხმალავემ ნახევარფინალში უკრაინელი ბოგდან პლატონოვის მძლეველი (15:12) ენვერ იილდირიმი (თურქთი) დაჯაბნა (15:8) და პირველი ადგილი დაიკავა. ვერცხლის მედალი თურქს ერგო, მესამე ადგილებზე სტეფანო ლუკეტი და ბოგდან პლატონოვი გავიდნენ.

ჯგუფში 4-4 მოგება და თითო წაგება ჰქონდათ გოგა კაკაურიძესა და ვაჟა რეჭიას. პლეი ოფში გოგამ ჯერ პაველ ბერანის (ჩეხეთი, 15:10) აჯობა, შემდეგ რეჭიას სძლია - 1:4, მეოთხედფინალში კი კაკაურიძე ბოგდან პლატონოვს ვერ გასცდა (7:15). საბოლოოდ კაკაურიძემ მე-6, ბექა ბაზაძემ კი მე-7 ადგილი დაიკავა.

მსოფლიოს თასის თბილისური ბატალიები ქალებშიც დაძაბულად წარიმართა. მასპინძელთაგან ევროპის 2017 წლის ჩემპიონი თეოდორა კახიანი და ლიკა ჯიჯეიშვილი გამოირჩნენ. ჯგუფში ჯიჯეიშვილმა ოთხ მეტოქეს აჯობა, ხოლო სევილ ბუნიატოვასა (აზერბაიჯანი, 4:5) და დესპინა გეორგიადუსთან (საბერძნეთი, 3:6) წააგო. კახიანმა თეონა გოგლიძე (5:3), კლარა ჰანზლიკოვა (ჩეხეთი, 5:2) და ჯულია გასპარინი (ბრაზილია, 5:4) დაამარცხა, ხოლო ანა ბაშტას (აზერბაიჯანი, 3:5) და სელინ დენიზ უნლუდაგს (თურქეთი, 1:5) ვერ გაუმკლავდა, სამაგიეროდ, პლეი ოფში იყოჩაღა - ზედიზედ ჩამოიშორა გზიდან ჯულია გასპარინი (15:4), ვალერია ბოლშაკოვა (აზერბაიჯანი, 15:13), ფატმა ზეჰრა კოში (თურქეთი, 15:9), დესპინა გეორგიადუ (საბერძნეთი, 15:13) და ფინალში გავიდა, სადაც ანა ბაშტას შეხვდა. ამ უკანასკნელმა ნახევარფინალში ირინა შჩულკას (თურქეთი, 15:12) მოუგო. გადამწყვეტი პაექრობა კახიანმა სამი ჩხვლეტით დათმო (12:15)( და ვერცხლის მედალს დასჯერდა. მესამე ადგილებზე დესპინა გეორგიადუ და ირინა შჩულკა გავიდნენ. ლიკა ჯიჯეიშვილს მე-15 ადგილი ერგო.  

151
მკითხველის კომენტარები / 0 /
მსგავსი ამბები
რუბრიკის სხვა სიახლეები
;