ფარიკაობა.ქართველები მსოფლიოს თასზე

ბუდაპეშტში 20-წლამდელ მოფარიკავეთა მსოფლიოს თასის გათამაშებამ 300-ზე მეტ მოხმალავეს მოუყარა თავი. შეჯიბრებაში საქართველოს 11 წარმომადგენელიც (მწვრთნელი ალექსანდრ ტორჩუკი) ცდიდა ძალებს.

მათგან ლიკა ჯიჯეიშვილი გამოირჩა, რომლემაც 147 მონაწილეს შორის 31-ე ადგილი დაიკავა. ჯგუფში ქართველმა სპორტსმენმა ექვსი ორთაბრძოლა გამართა.

ზედიზედ დაამარცხა მედინა ზინგელშტეინი (საფრანგეთი, 5:2), ლილი ვუდი (დიდი ბრიტანეთი, 5:0), ელენა ერნანდესი (ესპანეთი, 5:3), იასმინ მიზრაკი (ავსტრია, 5:4), ხოლო კაროლ-ანა კუნცსა (გერმანია, 3:5) და ლიზა პუშტაისთან (უნგრეთი, 2:5) წააგო.

პლეი ოფში ჯიჯეიშვილმა ზიტა ფენიოში (უნგრეთი, 15:8) და ან პუპინი (საფრანგეთი, 15:12) გაისტუმრა მაყურებლებში, მერე კი უკრაინელ ოლენა პისარენკოსთან დაძაბულ პაექრობა 13:15 დათმო.

ოლიმპიური ჩემპიონის - ვლადიმერ აფციაურის ქალიშვილმა მარიამ აფციაურმა ჯგუფში ექვსი შეხვედრიდან სამ გამარჯვებას მიაღწია - დაჯაბნა ალისა უტუკი (ბელარუსი, 5:4), პალმა მიშურაი (უნგრეთი, 5:2), სოფია პოტერი (გერმანია, 5:4),

ხოლო სამი ორთაბრძოლა წააგო ანა-ლენა ბუერკერტთან (გერმანია, 3:5), აისულუ უსმატდინოვასა (უზბეკეთი, 3:5) და რაჩელ რალოსთან (საფრანგეთი, 1:5), ამის მიუხედავად, პლეი ოფში მაინც გავიდა, მაგრამ იქ იტალიელ ფრანჩესკა ისეპისთან ერთი ჩხვლეტით (14:15) დამარცხდა და საბოლოოდ 85-ე ადგილს დასჯერდა.

ტურნირზე ანა აფრასიძემ ორი მეტოქე (იაპონელი მარინა შილო - 5:3 და ბელარუსი ნატალია კოსმაჩი - 5:4) ჩამოიცილა გზიდან, მაგრამ ოთხთან წააგო, პლეი ოფშიც რუმინელ საბინა მარტიშთან ვერაფერს გახდა (8:15) და 105-ე ადგილზე გავდა.

ქართველთაგან თამარ ჩარკვიანი (მხოლოდ დიანა გრეტუს სძლია - 5:2) და ნინი ნიქაბაძე (ყველა შეხვედრა დათმო) პლეი ოფში ვერ გავიდნენ და, შესაბამისად, 128-ე და 144-ე ადგილები ერგოთ.

* * *

ვაჟთა ტურნირში უფრო მეტს მოველოდით ნიკა შენგელიასგან, რომელმაც შარშან შემოდგომაზე სოჭში მსგავსი ტურნირის ბრინჯაოს მედალი დაიმსახურა.

მას ჯგუფურ ეტაპზე ჟაკ შნელის (ავსტრია, 5:2), ჰეი ჩუნგ ჩოუს (ჰონკონგი, 5:3), ბალონტ ფროლიხის (უნგრეთი, 5:2) და ქუენტონ ვერვოიტეს (საფრანგეთი, 5:2) ძლევა არ გასჭირვებია,

მაგრამ გალონ გენოვსა (ბულგარეთი, 2:5) და რომან კუკსენკოსთან (უკრაინა, 4:5) ვერაფერს გახდა. პლეი ოფში ანდრაშ საბოს (უნგრეთი, 15:5) აჯობა, მაგრამ ბელარუს კირილ კირპიჩოუსთან 14:15 წააგო და 50-ე ადგილი ხვდა.

მსგავსი შედეგებით 49-ე იყო ვაჟა რეჭია: ჯგუფში მან იან კრუშევსკი (პოლონეთი, 5:1), ქუინტონ ფაასი (ჰოლანდია, 5:3), შაროფიდინ ხაშიმოვი (უზბეკეთი, 5:4) და კენძო მაცუნაგა (იაპონია, 5:2) გააწბილა (ორი პაექრობა დათმო), პლეი ოფში რაზვან სტანესკუს (რუმინეთი, 15:9) გადაუღობა კვარცხლბეკისკენ მიმავალი გზა, თუმცა თავად უგო სოლერს (საფრანგეთი, 11:15) ვერ გასცდა.

ნიკოლოზ ჭეიშვილი ჯგუფში იოლად გაუმკლავდა კრისტიან ბორკიევიჩსა (პოლონეთი, 5:3) და ჯალოლიდინ დუშამბოევს (უზბეკეთი, 5:2), ხოლო რუმინელ პეტრუ ანტიკულოესეის მინიმალური უპირატესობით (5:4) აჯობა.

მართალია, მერე სამი პაექრობა დათმო, მაგრამ პლეი ოფში მაინც გავიდა, სადაც წინ ნიკოლას ჰოვესი (დიდი ბრიტანეთი, 8:15) გადაეღობა. საბოლოოდ ჭეიშვილი 98-ე ადგილზე აღმოჩნდა.

გოგა კაკაურიძე, გიორგი ჭუმბურიძე და ვახტანგ არჩვაძე ჯგუფში ჩარჩნენ და, შესაბამისად, 157-ე, 158-ე და 166-ე ადგილები დაიკავეს.

ქართველი მოხმალავეები ახლა ევროპისა და მსოფლიოს პირველობებისთვის მოემზადებიან, რომლებიც, თებერვალ-მარტში გაიმართება.

ყოველდღიური სპორტული გაზეთი "ლელო"
439
მკითხველის კომენტარები / 0 /
მსგავსი ამბები
რუბრიკის სხვა სიახლეები