ფარიკაობა. ქართველი მოფარიკავის ათსაფეხურიანი ნახტომი რეიტინგში

ჩეხეთის ქალაქ ბრნოში დამთავრდა 23-წლამდელ მოფარიკავეთა ევროპის თასის გათამაშება.

შეჯიბრებაში რვა ქვეყნის 65 სპორტსმენს შორის ქართველი რაპირისტები - ამ ასაკში 2017 წლის ევროპის ბრინჯაოს პრიზიორი ლუკა ღაღანიძე და 18 წლის ლაშა გალუაშვილიც გამოდიოდნენ.

ჩვენებურებმა შესანიშნავად იასპარეზეს ჯგუფურ ეტაპზე. ღაღანიძემ ზედიზედ სძლია ჩეხებს - ლუკას ჩემალსა (5:2) და ჯანი კულფელრტს (5:3), მოლდოველ ვლადისლავ მინდრესკუს (5:1), ბელარუს ვლადისლავ კურილოვიჩსა (5:3) და ავსტრიელ მაქსიმილიან ეკელტს (5:3).

გალუაშვილმა რუმინელი ბოგდან დასკალუ (51), ხორვატი ლეო სმერკარი (5:4), ჩეხები - მარეკ ტოტუსეკი (5:1) და ლუკას ჯანესეკი (5:1), უნგრელი პეტერ ზალაბა (5:3), მოლდოველი ევგენი ვადანიუცი (5:2) დაამარცხა და ღაღანიძესთან ერთად 64 საუკეთესოში მოხვდა.

პლეი ოფში ლუკამ სამი მეტოქე ჩამოიშორა გზიდან - ანტონიო გოიაკი (ხორვატია, 15:6), სრნა ჟენი (ჩეხეთი, 15:12), აუგუსტო ლარგე (საფრანგეთი, 15:13), მეოთხედფინალში კი თასის მომავალ გამარჯვებულ საშა ჩუპენიჩთან (ჩეხეთი, 9:15) დამარცხდა და მე-5 ადგილზე გავიდა.

აქ მოპოვებული 14 სარეიტინგო ქულით 23-წლამდელთა ევროპულ კლასიფიკაციაში მეთორმეტედან მეორე ადგილზე გადაინაცვლა.

გალუაშვილს პლეი ოფში უფრო მოკრძალებული შედეგი ჰქონდა - პირველ წრეში ბელარუსი ანტონ მრავუნაცი კი დაჯაბნა - 15:11, მაგრამ რამან ბიალიაევთან (დიდი ბრიტანეთი, 13:15) ვერაფერს გახდა და მე-17 ადგილს დასჯერდა.

ქართველი რაპირით მოფარიკავეები მარტში ბუდაპეშტის მსოფლიოს თასის ეტაპზე გამოვლენ, აპრილში კი 23-წლამდელთა ევროპის ჩემპიონატზე მოსინჯავენ ძალებს. ამ შეჯიბრებას ერევანი უმასპინძლებს.

ყოველდღიური სპორტული გაზეთი "ლელო"
4424
მკითხველის კომენტარები / 1 /
გაიოზ გოშაძე
0
გილოცავ ლუკა რეიტინგში დაწინაურებას, მალე ჩემპიონობაც მოგველოცოს.
მსგავსი ამბები
რუბრიკის სხვა სიახლეები
;